1 Anvãrliga di atseali tsi scriat, voi dzãtsets: "Ghini easti ti omlu s-nu cãrteascã muljeari." 2 Ma trã itia a putãnsiriljei, cathiunu prindi s-aibã muljearea a lui sh-cathiunã s-aibã bãrbatlu a ljei. 3 Bãrbatlu si mplineascã ananghili a lui cãtrã muljearea tutashã sh-muljearea cãtrã bãrbatlu a ljei. 4 Muljearea nu ari puteari pri truplu a ljei, ma ari bãrbatlu a ljei, tutashã sh-bãrbatlu nu ari puteari pri truplu a lui, ma ari muljearea a lui. 5 Nu vã alipidats a-unui-alantu, dicãt mash cu ghini-achicãsiri, ti un chiro, tsi s-vã rugats sh-nãpoi s-hits deadun, tra s-nu vã cãrteascã Satanlu di itia a nifãrnariljei a voastrã. 6 Aestã u-dzãc ca volje, nu ca un ordin. 7 Mini voi tsi tuts oaminjlji s-hibã ashã cum escu mini, ma cathiunu ari doara a lui di la Dumnidzãlu, un ashã sh-alantu altã soi.

8 Lã dzãc a ninsuratsãlor sh-a veduvilor, cã va eara ghini trã elji ca si armãnã nisurats ashã ca mini. 9 Ma, macã nu pot si s-nfãrneadzã, si nsoarã icã s-mãritã cã easti ma ghini ashãtsi dicãt si s-ardã dit orixili. 10 Iarã atsilor tsi suntu mãrtats lã ursescu, nu mini, ma Domnul, tsi muljearea s-nu si dispartã di bãrbatlu. 11 Macã si dispartã, s-armãnã nimãrtatã icã si s-puitueascã cu bãrbatlu sh-bãrbatlu s-nu u-alasã muljearea.

12 Iarã a alantsãlor lã dzãc, mini, nu Domnul: Macã vãrã frati ari muljeari nipistimenã sh-ea va s-bãneadzã cu nãsu, elu s-nu u-alasã ea. 13 Sh-macã unã muljeari ari un bãrbat nipistimen sh-aestu va s-bãneadzã cu nãsã, ea s-nu u-alasã bãrbat-su. 14 Cã bãrbatlu nipistimen easti sãmtsãsit di muljearea sh-muljearea nipistimenã easti sãmtsãsitã di bãrbat-su pistimen, cã altã soi cilimenjlji a voshtri suntu nicurats, iarã tora suntu sãmtsãsits.

15 Ma macã nipistimenlu si mparti, si s-dispartã! Tu aesti situatsii fratili icã sora nu suntu ma ligats, ma Dumnidzãlu nã ari acljimat s-bãnãm tu pace. 16 Cã tsi shtii tini la, muljeari, vahi va lu ascachi bãrbatlu? Icã tsi shtii tini lai, bãrbate, vahi va u-ascachi muljearea?

17 Cumtsido s-hibã, ashã di cum lji mpãrtsã Domnul a cathiunui, ashã di cum ari acljimat Dumnidzãlu cathiunul, ashã s-imnã. Ashãtsi ursescu la tuti biseritsli. 18 S-acljimã vãrã dupã tsi eara anvãrliga-tãljeat? Si nu s-facã nianvãrliga-tãljeat. S-acljimã vãrã, hinda nianvãrliga-tãljeat? S-nu s-anvãrliga-talji. 19 Anvãrliga-tãljearea nu easti tsiva sh-nianvãrliga-tãljearea nu easti tsiva, ma tsãnearea a dimãndãciunilor al Dumnidzãu s-lugurseashti. 20 Itsi om prindi s-armãnã tu starea tsi elji eara cãndu Dumnidzãlu li acljimã. 21 Ti acljimash cãndu earai sclav? S-nu ai gaile ti aestã, ma sh-macã pots s-hii liber, ma ghini fã-u aestã. 22 Cã atsel cai s-acljimã di Domnul hinda sclav, easti liberatlu a Domnului. Tutashã atsel tsi s-acljimã hinda liber, easti sclavlu a Hristolui. 23 Voi vã acumpãrat cu un tinjii, nu vã fãtsets sclayilji a oaminjlor. 24 Frats sh-surãri, cathiun s-armãnã nãintea al Dumnidzãu ashã cum eara cãndu s-acljimã.

25 Cãt di virghinãli nu am vãrã ordin di la Domnul, ma dau minduirea ca om njiluit di Domnul tra s-hiu axiu trã pistipsiri. 26 Minduescu cã aestã easti ghini trã itia a zurusiriljei di tora, tsi omlu s-armãnã ashãtsi di cum easti. 27 Eshti ligat cu unã muljeari? Nu caftã s-ti dizledzi. Eshti dizligat di unã muljeari? Nu caftã muljeari. 28 Ma sh-macã ti nsori, nu amãrtiseshti. Sh-macã unã virghinã s-mãritã, nu amãrtiseashti. Ghini ma aeshti oaminji nsurats va aibã mundueari sh-mini voi s-vã afirescu.

29 Mini vã dzãc aestã, frats sh-surãri, cã chirolu easti shcurtu sh-di tora sh-nclo prindi tsi sh-atselji tsi au muljeri s-hibã ca atselji tsi nu au muljeri, 30 atselji tsi plãngu, canda nu plãngu, atselji tsi hãrsescu, canda nu hãrsescu, atselji tsi acumpãrã, canda nu au tsiva a lor, 31 atselji tsi ufilisescu bunili a lumiljei aishtei, canda nu suntu spindzurati di eali, cã forma a lumiljei aishtei ma treatsi.

32 Mini voi tra s-hits nistuhinats. Ninsuratlu s-cãshtigheadzi ti lucrili a Domnului, cum s-lji arseascã a Domnului, 33 iarã atsel cai easti nsurat, s-cãshtigheadzi ti lucrili a lumiljei, cum s-lji arseascã a muljeariljei 34 sh-easti mpãrtsãt pi doauã. Sh-muljearea atsea nimãrtata sh-virghina s-cãshtigheadzã ti lucrili a Domnului, tra s-hibã sãmti tu trup sh-tu duh. Iarã atsea tsi easti mãrtatã, s-cãstigheadzi ti lucrili a lumiljei, cum s-lji arseascã a bãrbat-lui. 35 Aestã ma u-dzãc trã ghinea a voastrã, nu tra s-vã bagã tu cearcu, ma trã incurajari a voauã, trã atsea tsi easti ndreaptã shi s-lji huzmitipsim a Domnului deadun.

36 Ma, macã vãrã mindueashti cã ma s-aspuni di arushãni cãtrã virghina a lui,* ma s-hibã cã lji ari tricut chirolu sh-ashã prindi si s-facã, s-facã atsea tsi va sh-nu amãrtiseashti, si nsoarã. 37 Ma cai sta niminat tu inima a lui, fãrã s-hibã strimtã, ma s-aibã puteari pristi vrearea a lui sh-ma s-aibã giudicat aestã tu inima a lui, fatsi ghini s-nu s-mãritã virghina a lui. 38 Ashãtsi sh-atsel cai u-mãritã virghina a lui, fatsi ghini, iarã sh-atsel tsi nu u-mãritã fatsi sh-ma ghini.

39 Unã muljeari easti ligat cu bãrbatlu a ljei di cãt chiro elu bãneadzã, iarã, ma s-moarã bãrbatlu a ljei, easti liberã si s-mãritã cu cai va, mash tsi atsel s-hibã tu Domnul. 40 Ma, dupã minduirea a mea, ea easti ma hãrãcoapã ma s-armãnã ashã cum eara. Ashã minduescu mini cã sh-mini am Duhlu a Dumnidzãlui.