1 Pavlu, acljimat apostul al Hristos Isus prit vrearea al Dumnidzãu, sh-fratili Sosten, 2 a bisearicãljei a Dumnidzãlui tu Corintu, atsilor cai suntu sãmtsãsits tu Hristolu Isus sh-acljimats s-hibã populu a lui sãmtu, deadun cu tuts atselji cai acljeamã numa a Domnului a nostru Isus Hristos iutsido, Domnul a lor sh-a nostru:

3 Har pri voi sh-pace di la Dumnidzãlu, Tatãl a nostru, sh-di la Domnul Isus Hristos.

4 Hãristisescu Dumnidzãlu a meu totãna trã voi trã itia a harului a Dumnidzãlui tsi vã si deadi a voauã tu Hristos Isus. 5 Cã voi vã avutsãt tu elu tu tuti, tu cathi zbor sh-tu cathi shtintsã, 6 ashãtsi di cum s-alihipsi mãrtiria al Hristos ntrã voi, 7 ahãt cãt a voauã s-nu vã lipseascã vãrã doarã duhuroasã, ashtiptãnda cu niarãvdari discupirirea* a Domnului a nostru Isus Hristos. 8 Elu va s-vã nvãrtusheascã pãnã tu soni tra s-hits nivãrghits tu dzua a Domnului a nostru Isus Hristos. 9 Pistimen easti Dumnidzãlu, prit cai vã acljimat tu mpriunari cu Hiljilu a lui Isus Hristos, Domnul a nostru.

10 Tora vã acljem, frats sh-surãri, prit numa a Domnului a nostru Isus Hristos, tra si zburãts tuts unã soi shi s-nu aibã dispãrtsãri ntrã voi, ma s-hits tuts deadun pi unã minti sh-cu unã nãeti. 11 Cã nji si featsi cunuscut, frats sh-surãri a melji, di atselji di casa al Cloe, cã ntrã voi ari ngrãnji. 12 Voi s-vã dzãc aestã, cathi unu di voi dzãtsi: "Mini escu al Pavlu", "Mini escu al Apollo", "Mini escu al Chefa", iarã "Mini escu al Hristos." 13 Vahi easti mpãrtsãt Hristolu? Nacã Pavlu s-crutsisi trã voi? Nacã vã pãtidzat tu numa al Pavlu? 14 Hãristisescu Dumnidzãlu tsi nu pãtidzai vãrã di voi, dicãt singur Crispu sh-Gaiu, 15 tra s-nu dzãcã vãrã cã s-pãtidzã tu numa a mea. 16 Pãtidzai sh-oaminjlji di casa al Stefanu, nafoarã di aeshti nu shtiu cã am pãtidzat vãrã. 17 Cã Hristolu nu mi pitricu s-pãtedz, ma s-dimãndu Evanghelu, nu cu mintimeniljea a zborlui tra s-nu armãnã fãrã di puteari crutsea al Hristos.

18 Cã zborlu a crutsiljei easti zurleatsã ti atselji tsi cheru, iarã ti noi tsi nã ascãpãm easti putearea al Dumnidzãu. 19 Cã easti scriatã: "Va u-cher mintimeniljea a mintimenjilor, shi achicãsirea a shtiutslor va u-afãnisescu." 20 Iu easti mintimenlu? Iu easti scriblu? Iu easti filozoflu a etiljei aishtei? Nu u-featsi zurlã Dumnidzãlu mintimeniljea a lumiljei aishtei? 21 Cã metsi tu mintimeniljea a Dumnidzãlui, lumea nu l-cunuscu Dumnidzãlu prit mintimeniljea a ljei, lji arsi al Dumnidzãu s-lji ascapã atselji cai pistipsescu prit zurleatsa a predicariljei. 22 Cã Iudeilji caftã seamni sh-Elinji caftã mintimenilji, 23 ma noi predicãm Hristolu crutsisit, di unã parti cheatra di nchidicari trã Iudeilji sh-di alantã parti zurleatsã trã Pãngãnjlji. 24 Iarã trã atselji acljimatslji, cum Iudei sh-cum Elinji, Hristolu easti putearea sh-mintimeniljea al Dumnidzãu. 25 Cã zurleatsa a Dumnidzãlui easti ma mintimenã dicãt mintimeniljea a oaminjlor, shi slãbintsa al Dumnidzãu easti ma vãrtoasã dicãt putearea a oaminjlor. 26 Videts, frats sh-surãri, acljimarea a voastrã, cã nu earats multsã di voi mintimenji dupã trup, nu earats multsã di voi vãrtoshi, nu earats multsã di voi di soi nobilã. 27 Ma Dumnidzãlu aleapsi lucrili atseali zurli a lumiljei tra s-arushineadzã mintimenjilji, sh-Dumnidzãlu aleapsi atseali nipututili a lumiljei tra si arushineadzã vãrtoshlji. 28 Dumnidzãlu aleapsi lucrili cai nu suntu nobili, dispretsuiti sh-atseali cai nu suntu tsiva, tsi s-afãniseascã atseali tsi suntu axiusiti dupã lumea, 29 tsi vãrã s-nu si s-alavdã nãintea al Dumnidzãu. 30 Ma di la elu voi hits tu Hristolu Isus, cai s-featsi trã noi mintimenilji di la Dumnidzãlu, ndriptati, sãmtsãri sh-arãscumpãrari, 31 cã, ashãtsi cum easti scriatã, "Atsel tsi s-alavdã, prindi si s-alavdã tu Domnul."