1 Tora frats sh-surãri trã doarili duhuroasi, nu voi tsi s-hits nishtiuts. 2 Voi shtits cã, cãndu earats pãngãnji, vã trãdzeats dupã idolji muts sh-vã dutseats tu cãljuri strãmbi. 3 Trã atsea vã fac cunuscut cã vãrã tsi zburashti prit Duhlu a Dumnidzãlui nu dzãtsi: "Blãstimat s-hibã Isusul," sh-vãrã nu poati s-dzãcã "Isusul easti Domnu," dicãt mash prit Duhlu Sãmtu.

4 Doarili suntu di tuti soili, ma Duhlu easti idyiul. 5 Suntu sh-multi soi di huzmitipsiri, ma Domnul easti idyiul. 6 Suntu sh-multi soi di lucri, ma Dumnidzãlu easti idyiul, cai li lucreadzã tuti tu tuts.

7 Sh-a cathiunui lji si da fãnirusirea a Duhlui trã ufelia a tutulor. 8 A unui lji si da prit Duhlu un zbor di mintimenilji, a unui altu prit idyiul Duh lji si da un zbor di cunushteari, 9 a unui altu prit idyiul Duh lji si da pisti, a unui altu prit idyiul Duh lji si da doarili ti vindicari, 10 a unui altu lji si da puteari trã thavmati, a unui altu lji si da prufitsii, a unui altu lji si da alidzearea a duhurilor, a unui altu lji si da turlii di limbi sh-a unui altu lji si da tradutsearea a limbilor. 11 Sh-tuti aesti li lucreadzã singurlu sh-idyiul Duh, dãnda a cathiunui ashã dupã cum va elu.

12 Ashã ca truplu tsi easti un sh-ari multi mãdulari sh-tuti mãdularili a truplui, cu tutã cã suntu multi, suntu un trup singur, ashãtsi easti sh-cu Hristolu. 13 Cã sh-noi tuts nã pãtidzãm prit un idyiul Duh tra s-him un trup singur, cum Iudei cum Elinji, cum sclayi cum liberi, sh-a tutulor nã si deadi s-bem dit idyiul Duh.

14 Cã sh-truplu nu easti adrat di un mãdular, ma di multi. 15 Macã va dzãtsea ciciorlu: "Metsi nu escu mãnã, nu escu mãdular a truplui," vahi di aestã nu va s-hibã mãdular a truplui? 16 Macã va dzãtsea ureaclja: "Metsi nu escu ocljiu, nu escu mãdular a truplui," vahi di aestã nu va s-hibã mãdular a truplui? 17 Macã tut truplu va s-eara ocljiu, iu va s-eara avdzãrea? Macã va s-eara tut avdzãri, iu va s-eara anjurdzirea? 18 Ma tora Dumnidzãlu li bãgã tuti mãdularili tu trup, cathiunã di eali unã dupã unã, ashã cum vru elu. 19 Macã va s-eara tuti un singur mãdular, iu va s-eara truplu? 20 Tora suntu dealihea multi mãdulari, ma un singur trup.

21 Ocljiul nu poati s-lji dzãcã a mãnãljei: "Nu am ananghi ti tini!" Icã caplu s-lã dzãcã a cicioarilor: "Nu am ananghi ti voi!" 22 Din contra, mãdularili a truplui cai suntu ma slabi, suntu multi ma ananghioasi. 23 Iarã atseali tsi minduescu cã suntu nitinjisitili a truplui, atseali li anvãrteascã cu ma multã tinjii, sh-mãdularili a noastri ni aspusi au ma multã tinjii, 24 ma mãdularili a noastri atseali mushati nu au ananghi trã aestã. Dumnidzãlu lu adrã truplu dãnda ma multã tinjii atsiljei parti tsi lji lipsea. 25 Ashãtsi nu va s-aibã dispãrtsãri tu trup sh-mãdularili va s-aibã cãshtiga ti un-alantu. 26 Macã un mãdular s-mundueashti, tuti mãdularili s-munduescu deadun, macã un mãdular s-tinjiseashti, tuti mãdularili s-hãrsescu deadun.

27 Voi hits truplu al Hristos, sh-cathiun di voi mãdularili a lui. 28 Sh-Dumnidzãlu bãgã tu bisearicã ma nãinti di tuts apostulji, a doaua prufitsilji, a treia nvitsãtorlji, deapoea faptili a thavmatilor, deapoea doarili di vindicari, agiutãrili, chivãrnisirea sh-turlii di limbi. 29 Nacã suntu tuts apostulji? Nacã suntu tuts prufits? Nacã suntu tuts nvitsãtori? Nacã fac tuts thavmati? 30 Nacã au tuts doari di vindicari? Nacã zburãscu tuts turlii di limbi? Nacã tuts traduc? 31 Cãftats cu zel doarili atseali ma buni. Mini ma vã aspunã unã cali cai easti ma scãntilioasã.