1 Urmats vrearea sh-cãftats doarili duhuroasi, ma ma multu s-prufitipsits. 2 Cã atsel cai zburashti tu unã limbã, nu zburashti cu oaminjlji ma cu Dumnidzãlu, cã vãrã nu lu aducheashti, ma prit Duh zburashti lucri mistiryioasi. 3 Iarã atsel cai prufitipseashti, lã zburashti a oaminjlor trã adrari, trã inimusiri sh-trã diznjirdari. 4 Atsel tsi zburashti tu unã limbã, s-adari idyiul elu, ma atsel tsi prufitipseashti, adari unã bisearicã ntreagã. 5 Mini vream tsi tuts si zburãts tu alti limbi, ma ma multu voi s-prufitipsits. Atsel tsi prufitipseashti easti ma mari di atsel cai zburashti tu alti limbi, dicãt mash cãndu tradutsi tsi bisearica si s-adarã.

6 Macã mini yin la voi, frats sh-surãri, zburãnda tu alti limbi, tsi ufelii va vã adutseam, ma s-nu vã zburam cu discupiriri icã cu cunushteari, cu prufitsii icã cu nvitsãturã? 7 Tut ashã sh-instrumentili di muzicã fãrã banã cum flueara icã harpa cai suneadzã, ma s-nu da tonuri soi di soi, cum va s-cunoascã melodia di fluearã di melodia di harpã? 8 Sh-trumpeta macã nu va da unã boatsi curatã, cum va s-etimãseascã suldatslji ti alumtã? 9 Ashãtsi sh-voi, ma s-nu dats prit limbã unã zbor curat, cum va s-aducheascã atsea tsi s-greashti? Va s-hits zburãnda di-vãnat. 10 Suntu multi soi di limbi tu lumi sh-vãrã di eali nu easti ni-achicãsit. 11 Atumtsea, macã nu aduchescu tsi dzãc zboarili, mini va s-hiu ca xen ti atsel tsi zburashti sh-atsel tsi zburashti va hibã ca xen ti mini. 12 Ashãtsi sh-voi metsi hits mplin di zel cãtrã doarili a Duhlui, cãftats tra s-hits artirsits tu ea trã adrarea a bisearicãljei.

13 Trã atsea atsel tsi zburashti tu unã altã limbã, si s-roagã s-traducã tsi dzãtsi. 14 Cã mãcã mi rog pi unã altã limbã, duhlu a meu s-roagã, ma mintea a mea easti nifructoasã. 15 Tsi prindi s-fac atumtsea? Va mi rog cu duhlu, ma va mi rog sh-cu mintea, va s-psãltisescu cu duhlu, ma va s-psãltisescu sh-cu mintea. 16 Cu alti zboari, macã ghinicuvintedz mash cu Duh, atsel cai easti tu loclu a nivintsatlui, cum va dzãc "Amin" ti hãristisirea a ta, macã nu aduchi tsi dzãtsesh tini? 17 Tini dealihea hãristiseshti ghini, ma alantu nu s-nvãrtuseashti.

18 Mini hãristisescu Dumnidzãlu cã zburãscu tu alti limbi ma multã di voi, 19 ma tu bisearicã ma ghini dzãc tsintsi zboari cu minti aduchiti tra s-nvets sh-alantsã, dicãt dzatsi njilji di zboari pi altã limbã. 20 Frats sh-surãri, nu vã fãtsets cilimenji di minti, fãtsets-vã ca cilimenji njitsi cãtrã arãulu, ma di minti fãtsets-vã coptsã. 21 Tu Lege easti scriatã:

"Va lji zburãscu a popului aishtui

cu altã limbã sh-cu alti budzã,

ma sh-ashãtsi nu va mi ascultã,

dzãsi Domnul."

22 Ashãtsi cã limbili suntu ca seamni nu ti atselji cai pistipsescu, ma ti atselji cai nu pistipsescu, iarã prufitsia easti ti atselji cai pistipsescu, nu ti atselji cai nu pistipsescu. 23 Trã atsea, macã va s-adunã bisearica tu un loc sh-tuts si zburascã pi alti limbi shi s-intrã nivintsats icã nipistimenji, nu va dzãc cã hits zurlji? 24 Iarã ma s-prufitipseascã tuts shi s-intrã vãrã nipistimen icã vãrã nivintsat, va si s-cãbãteadzã ti amãrtii di tuts sh-va si s-giudicã di tuts tsi avdã. 25 Ascumtili a inimãljei a lui va s-easã tu padi sh-ashãtsi cãdzãnda pri dintsã mpadi va s-alavdã Dumnidzãlu dimãndãnda: "Dealihea Dumnidzãlu easti namisa di voi!"

26 Atumtsea tsi prindi s-fãtsem, frats sh-surãri? Cãndu s-nã adunãm, cathiunu di voi tsi ari un psalmu, icã unã nvitsãturã, ari unã discupiriri, ari unã limbã nicunuscutã, ari unã tradutseari, tuti prindi si s-facã ti adrarea a bisearicãljei. 27 Macã vãrã zburashti pi unã altã limbã, si s-facã di doi icã di trei oaminji cu aradha sh-un s-traducã. 28 Ma, macã nu easti vãrã traducãtor, elu prindi s-pãpseascã tu bisearicã shi si zburascã cu mintea a lui sh-cu Dumnidzãlu.

29 Si zburascã doi icã trei prufitsi sh-alantsãlji s-giudicã atsea tsi s-dzãtsi. 30 Ma macã si discupirã tsiva a unui altu cai sheadi, protlu s-tacã. 31 Cã tuts un cãti un putets s-prufitipsits, cu nãeti tsi tuts s-nveatsã sh-tuts s-inimuseascã. 32 Duhurili a prufitsilor suntu sumbãgati a prufitsilor. 33 Dumnidzãlu nu easti Dumnidzãlu a mintituriljei, ma a paciljei.

Ashã cum easti tu tuti biseritsli a popului al Domnu, 34 muljerili s-tacã pri biseritsi, cã eali nu prindi si zburascã, ma prindi si sumbagã, ashã dupã cum dzãtsi sh-legea. 35 Macã vor s-nveatsã tsiva, s-ntreabã la casã bãrbatslji a lor, cã easti ti rushini ti unã muljeari sã zburascã tu bisearicã.

36 Nacã di la voi ishi zborlu a Dumnidzãlui? Icã mash la voi agiumsi? 37 Macã vãrã mindueashti cã easti prufit icã duhuros, prindi s-aducheascã cã aesti tsi ma vã scriu easti dimãndãciunea a Domnului. 38 Ma macã vãrã nu li cunoashti, elu s-nu si s-cunoascã! 39 Trã atsea, frats sh-surãri, cãftats ma multu s-prufitipsits sh-nu nchidicats zburarea pi alti limbi. 40 Tuti prindi si s-facã cu lizeti sh-cu aradha.