1 Iutsido s-avdi cã ntrã voi ari putãnlichi, sh-un ahtar putãnlichi tsi nu s-aflã shi ntrã pãngãnjlji, s-ari dus pãnã aclo cãt un doarmi cu muljearea a tatã-sui. 2 Sh-voi hits pirifãnsits sh-nu vã nvirinat shi s-afãniseascã dit mesea a voastrã atsel cai featsi aestu lucru? 3 Mini di parta a mea, cu tutã cã nu escu cu trup, ma escu la voi cu duh. Tora am giudicatã atsel cai featsi aestu lucru, canda s-earam atsia. 4 Tu numa a Domnului a nostru Isus Hristos cãndu s-vã adunats voi sh-duhlu a meu cu voi, deadun cu fuchia a Domnului a nostru Isus, 5 s-lu pridats ahtar om a Satanlui trã aspãrdzearea a truplui, cu nãeti tsi duhlu s-ascapã tu dzua a Domnului. 6 Nu easti bunã pirifanjea a voastrã! Nu shtits voi cã putsãnã mãeauã adari tut aloatlu? 7 Curats-vã di mãeaua atsea veacljea, tra s-hits aloat nou, ashã dupã cum hits fãrã mãeauã, cã sh-Hristolu, Pashtili a nostru, s-curbãnsi. 8 Trã atsea si-sãrbãtorim nu cu maeaua atsea veaclja sh-nitsi cu maeaua a arãutãtsiljei sh-a slãbintsãljei, ma cu pãni fãrã di mãeauã, chischinã sh-alihioasã.

9 Vã scriai tu cartea a mea tra s-nu vã misticats cu curvarlji. 10 Nu easti zborlu dip ti curvarlji a lumiljei aishtei icã ti zilichearlji sh-arãchitorlji, icã ti idulatsri, cã altã soi va lipsea s-isheat di aestã lumi. 11 Ma tora vã scriai tra s-nu vã misticats cu vãrã tsi s-acljeamã frati, iarã elu easti curvar icã zilichear, idulatru icã blãstimãtor, mbitat icã arãchitor, cu cai nu prindi s-mãcats deadun.

12 Cã tsi mi mealã mini s-giudic atselji di nafoarã? Nu lji giudicats voi atselji di nãuntru? 13 Atselji di nafoarã va lji giudic Dumnidzãlu. "Scutets-lu nafoarã arãulu dit mesea a voastrã!"*