1 Tora, frats sh-surãri, ma vã fac cunuscut evanghelu tsi vã dimãndai cai voi loat sh-tu cai stats. 2 Prit atsel evanghelu voi vã ascãpats, macã va tsãnets zborlu tsi vã dimãndai, mash macã pistipsit vãnat.

3 Cã mini vã ded a voauã, nãinti di tuti, atsea tsi sh-mini u loai: Hristolu muri ti amãrtiili a noastri dupã Scriturili, 4 s-ngrupã, shi s-nyie a treia dzuã dupã Scriturili, 5 si aspusi al Chefa sh-apoea a doisprãdzatsilor. 6 Deapoea si aspusi di unã oarã singur la ma multsã di tsintsi suti di frats sh-surãri, di la cai ma multsãlji bãneadzã sh-tora, ma niscãntsã murirã. 7 Ma napoi si aspusi al Iacov sh-ma napoi a tuts apostuljilor. 8 Tu bitisitã nji si aspusi sh-a njia, ca a unui amintat nãinti di chirolu tsi prindi.

9 Cã mini escu ma njiclu a apostuljilor, tsi nu escu axiu s-mi acljem apostul, metsi priaĝunii bisearica a Dumnidzãlui. 10 Ma prit harul al Dumnidzãu escu atsel tsi escu, sh-harul a lui cãtrã mini nu easti vãnat. Di contra, am lucratã ma multu dicãt elji tuts, cu tutã atsea nu mini, ma harul a Dumnidzãlui easti cu mini. 11 Ashãtsi cum mini, cum elji, predicãm sh-voi tuts ashãtsi pistipsitã.

12 Macã Hristolu s-preadicã cã easti nyeat dit mortsã, cum niscãntsã di voi dzãc cã nu ari nyeari dit mortsã? 13 Ma macã nu ari nyeari dit mortsã, atumtsea nitsi Hristolu nu easti nyeat. 14 Sh-macã Hristolu nu easti nyeat, atumtsea di-vãnat easti predicarea a noastrã, di-vãnat easti sh-pistea a voastrã. 15 Ashãtsi sh-noi him martiri arãdioshi ti Dumnidzãlu, cã mãrtirsim ti Dumnidzãu cã nyie Hristolu, cai nu lu nyie, macã dealihea mortsãlji nu s-nyeadzã. 16 Cã, macã mortsãlji nu s-nyeadzã, atumtsea nitsi Hristolu nu s-nyie. 17 Sh-macã Hristolu nu easti nyeat, pistea a voastrã easti di-vãnat, sh-voi hits ninga tu amãrtiili a voastri. 18 Atumtsea sh-atselji tsi murirã tu Hristolu au chirutã. 19 Macã avem nãdãit tu Hristolu mash ti aestã banã, atumtsea him ma mãratsã di tuts oaminjlji.

20 Ma tora Hristolu easti nyeat dit mortsã sh-easti protlu frut atsilor cai au murit. 21 Cã, metsi prit un om vini moartea, sh-nyearea a mortsãlor yini prit un om. 22 Cã ashã cum tu Adam tuts mor, ashã sh-tu Hristolu tuts va si nyeadzã, 23 tuts dupã arada: protlu frut Hristolu, deapoea tu vinita a lui atselji tsi suntu a Hristolui. 24 Deapoea yini bitisita, cãndu elu s-lji-u da amirãriljea al Dumnidzãu Tatãl, cãndu s-aibã afãnisit cathi printsipatã, cathi autoritati sh-cathi fuchii. 25 Cã prindi elu s-amirãreascã pãnã cãndu s-lji bagã tuts dushmanjlji sum cicioarili a lui. 26 Dushmanlu di soni tsi va hibã afãnisit, easti moartea. 27 Cã Dumnidzãlu "lji bãgã tuts sum cicioarili a lui." Ma cãndu s-dzãtsi "tuti" suntu sumbãgati, si shtii fãrã di altã nu Dumnidzãlu, atsel cai tu Hristolu lji sumbãgã tuti. 28 Cãndu s-lji hibã sumbãgati tuti a lui, atumtsea sh-Hiljilu va lji si sumbagã a Tatãlui, atsel tsi lji li sumbãgã tuti, tsi Dumnidzãlu s-hibã itsido la tuti.

29 Altã soi, tsi va s-facã atselji cai s-pãteadzã trã mortsãlji? Macã mortsãlji nu s-nyeadzã dip, atumtsea cãtse s-pãteadzã trã elji? 30 Cãtse noi him tu piricljiu cathi oarã? 31 Cathi dzuã mini mor, ashã cum dealihea mi alavdu trã voi, frats sh-surãri, tu Hristolu Isus Domnul a nostru. 32 Macã mini ca om mi alumtai cu agrinjili tu Efes, tsi ufelii avui? Macã mortsãlji nu s-nyeadzã:

"Haidi s-mãcãm shi s-bem

cã mãni va murim."*

33 Nu vã arãdets: "Sutsãtili atseali arali aspargu adetsili atseali buni." 34 Minduits-vã ashã cum prindi sh-nu amãrtisits ma, cã niscãntsã nu au cunushtearea a Dumnidzãlui. Ti arushinea a voastrã u dzãc aestã.

35 Ma vãrã va dzãcã: "Cum s-nyeadzã mortsãlji sh-cu tsi trup va yin?" 36 O lai zurlu! Tsi seaminji tini, nu yini tu banã, macã nu moari ma nãinti. 37 Sh-cãndu seaminji tini, nu seaminji truplu cai va si s-facã, ma un gãrnuts dispuljeat, vahi grãn icã vãrã altã simintsã. 38 Ma Dumnidzãlu lji da a simintsãljei un trup, ashã cum vru elu sh-a cathiunei simintsã un trup a ljei. 39 Nu easti cathi trup idyiul: altu easti truplu a omlui, altu easti truplu a prãvdzãlor, altu easti truplu a puljilor, sh-altu easti truplu a peshtilor. 40 Suntu trupuri tsereshti sh-trupuri di loc, ma altã easti strãlutsirea atsilor dit tser sh-altã atsilor dit loc. 41 Altã easti strãlutsirea a soarilui, altã easti strãlutsirea a lunãljei, sh-altã easti strãlutsirea a stealilor, cã steaua di steaua s-aleadzi di strãlutsirea.

42 Ashã easti sh-nyearea a mortsãlor. Truplu si seaminã tu aspãrdzeari sh-va s-nyeadzã tu niaspãrdzeari. 43 Si seaminã tu nitinjii shi s-nyeadzã tu mãriri, si seaminã tu slãbintsã shi s-nyeadzã tu fuchii. 44 Si seaminã trup natural shi si nyeadzã trup duhuros. Macã ari trup natural, ari sh-trup duhuros. 45 Ashãtsi sh-easti scriatã: "Protlu om Adamlu s-featsi suflit yiu," iarã Adamlu dit soni s-featsi Duh tsi da banã. 46 Nu fu duhuroslu atsel di prota, ma fu atsel naturalu, sh-deapoea duhuroslu. 47 Omlu atsel di prota eara faptã di loc.* Omlu atsel a doilu easti dit tser. 48 Ashã cum easti atsel dit loc, suntu sh-atselji dit loc. Ashã cum easti atsel tserescu, suntu sh-atselji tsereshti. 49 Ashã cum purtãm icoana atsilui dit loc, ashã va s-purtãm sh-icoana atsilui tserescu.

50 Tora ma vã dzãc aestã, frats sh-surãri: Carnea sh-sãndzili nu pot s-mushtineadzã Amirãriljea a Dumnidzãlui sh-nitsi aspãrdzearea nu poati s-mushtineadzã niaspãrdzearea. 51 Ia, ma vã aspun un mistiryiu: Tuts nu va murim, ma tuts va nã alãxim, 52 dinãoarã, cãt s-ncljidz shi s-discljidz ocljilji la trumpeta di soni. Cã va batã trumpeta sh-mortsãlji va s-nyeadzã niaspartsã sh-noi va nã alãxim. 53 Cã prindi tsi aestu trup cai s-aspardzi si nveascã cu niaspãrdzeari, sh-aestu trup muritor si nveascã cu nimuritor. 54 Cãndu aestu trup cai s-aspardzi si nveascã cu niaspãrdzeari sh-aestu muritorlu si nveascã cu nimuritorlu, atumtsea va s-undzeascã zborlu tsi easti dzãsã: "Moartea s-ascãpitã di nichisirea."*

55 "O lea moarti, iu easti nichisirea a ta?

O lea moarti, iu easti schinlu a tãu?"*

56 Schinlu a moartiljei easti amãrtia, sh-fuchia a amãrtiiljei easti Legea. 57 Ma, s-hãristisim Dumnidzãlu cai nã da nichisirea prit Domnul a nostru Isus Hristos!

58 Trã atsea, frats sh-surãri a melji vruts, s-hits vãrtoshi sh-nu vã minats, adãvgãnda totãna tu lucrul al Domnu shi shtinda cã lucrarea a voastrã nu easti fãrã hãiri tu Domnul.