1 Frats sh-surãri, mini nu voi tsi voi s-hits nishtiuts, trã atsea cã pãrintsãlji a noshtri furã tuts sum nior sh-tuts tricurã prit amari. 2 Tuts s-pãtidzarã ntru Moisiul, tu nior sh-tu amari. 3 Tuts mãcarã dit idyia mãcari sufliteascã, 4 sh-tuts biurã dit idyia biuturã sufliteascã, cã biurã dit unã cheatrã sufliteascã tsi lã sotsãsea, sh-atsea cheatrã eara Hristolu. 5 Ma ma multsãlji di elji nu lj-arsirã a Dumnidzãlui, cã trupurili a lor mortsã s-dispãrtsãrã tu irnjii.

6 Aesti lucri s-featsirã urnechi ti noi, tsi noi s-nu arsim atseali aralili, ashãtsi cum featsirã elji. 7 Nu vã fãtsets idulatori, ashã ca niscãntsã di elji, di cum easti scriatã: "Populu shidzu ti mãcari sh-ti beari shi si sculã ti giucari."* 8 Noi nu prindi s-putãnsim, cum putãnsirã niscãntsã di elji sh-cãdzurã mortsã tu unã dzuã treisprãyinghits di njilji. 9 Noi nu prindi s-bãgãm tu provã Hristolu, ashãtsi cum lu bãgarã niscãntsã di elji sh-murirã di nãpãrtitsli. 10 Sh-nu murmurats ashã di cum murmurarã niscãntsã di elji shi s-afãnisirã di anghilu afãnsitoru.

11 Aesti lucri lã undzirã a lor ca urnechi shi suntu scriati tra s-nã si facã nvitsãturi a noauã cai agiumsim tu bitisita a etilor. 12 Trã atsea, atsel cai mindueashti cã sta pri cicioari s-aibã cãshtiga s-nu cadã. 13 Vãrã cãrteari nu vã ari acãtsat voi, dicãt atsea umineascã. Pistimen easti Dumnidzãlu cai nu va vã alasã s-vã cãrtits ma multu di atsea tsi putets, ma deadun cu munduirea va vã da sh-ascãparea tsi voi s-putets s-u arãvdats.

14 Trã atsea, vrutslji a melji, fudzits di idolatrii. 15 Ma vã grescu ca a mintimenjilor, giudicats voi cã tsi ma vã dzãc. 16 Cupa a ghinicuvãntariljei tsi noi ghinicuvãntãm, nu easti pãrtashi tu sãndzili a Hristolui? Pãna tsi noi frãndzem, nu easti pãrtashi tu truplu a Hristolui? 17 Metsi easti unã pãni sh-noi multsãlji him un trup sh-tuts him pãrtashi la unã singurã pãni.

18 Mutrits Israelul dupã trup. Nu suntu elji pãrtashi la altarlu, tsi mãcã curbãnsitili? 19 Tsi voi s-dzãc cu aestã? Cã curbãnsirea a idoljilor easti tsiva, icã idolu easti tsiva? 20 Nu, ma atseali tsi curbãnsescu pãngãnjlji, li curbãnsescu a demonjilor, nu a Dumnidzãlui sh-mini nu voi tsi voi s-vã fãtsets pãrtashi cu demonjlji. 21 Voi nu putets s-bets sh-cupa a Domnului sh-cupa a demonjilor. Voi nu putets s-loats parti sh-la measa a Domnului sh-la measa a demonjilor. 22 Nacã vrem s-fãtsem Domnul geloz? Nacã him ma vãrtoshi di elu?

23 "Tuti suntu nvoljiti," ma nu tuti aduc ufelii. "Tuti suntu nvoljiti," ma nu tuti adar. 24 Vãrã s-nu caftã buna a lui, ma buna a alantului.

25 Mãcats itsido tsi s-vindi la ducheanea di carni, fãrã ntribari tsiva trã itia a conshtintsãljei, 26 cã, "a Domnului easti loclu sh-itsido tsi s-aflã pri nãsu."*

27 Macã vãrã nipistimen vã acljeami ti mãcari sh-voi vrets s-vã dutsets, imnats sh-mãcats itsido tsi vã bagã nãinti fãrã ntribari trã itia a conshtintsãljei. 28 Ma macã vãrã vã dzãtsi: "Aestã mãcari easti curbãnsitã," nu mãcats trã itia atsilui tsi vã spusi sh-trã itia a conshtintsãljei. 29 Sh-cãndu dzãc conshtintsa, nu dzãc di conshtintsa a ta, ma a alantului. Cã, cãtse s-giudicã libertatea a mea di conshtintsa a unui altu? 30 Macã mini ljeau parti cu hãristisiri, cãtse s-mi ngiurã trã atsea trã cai mini hãristisescu?

31 Trã atsea, macã mãcats, macã bets, macã fãtsets altã tsiva, tuti fãtsets-li trã mãrirea a Dumnidzãlui. 32 Nu vã fãtsets ncheadic nitsi trã Iudeilji, nitsi trã pãngãnjlji, nitsi trã bisearica a Dumnidzãlui. 33 Fãtsets ca mini tsi caftu s-mi arsescu a tutulor la itsido, nicãftãnda ufelia a mea, ma atsea a multsãlor tsi elji s-ascapã.