1 Mini frats sh-surãri, nu putui si zburãscu cu voi ca oaminji duhuroshi, ma zburai cu voi ca oaminji trupeshti, ca cilimenjlji njitsi tu Hristos. 2 Vã hrãni cu lapti, nu cu mãcãri vãrtoasi, cã ninga nu putets s-u ascãpitats. Meti sh-tora nu putets, 3 cã ninga hits oaminji trupeshti. Cã pãn-cãndu ntrã voi ari zilii sh-ngrãnji, nu hits sh-voi trupeshti sh-nu ma imnats ca oaminji? 4 Cã cãndu un dzãtsi, "Mini escu al Pavlu," iarã un altu dzãtsi, "Mini escu al Apollo," nu hits tuts oaminji? 5 Cai easti Apollo? Sh-cai easti Pavlu? Huzmichearlji prit cai pistipsitã, ashã dupã cum Domnul lji deadi a cathiunui. 6 Mini siminai, Apollo adãpã, iarã Dumnidzãlu featsi crishtearea. 7 Ashãtsi cã, nu easti tsiva nitsi atsel tsi seaminã, nitsi atsel tsi adapã, ma mash Dumnidzãlu tsi fatsi crishtearea. 8 Atsel tsi seaminã sh-atsel tsi adapã suntu unã soi sh-cathiunu va ljea arãsplata a lui dupã lucrul a lor. 9 Cã noi him colucrãtori a Dumnidzãlui, voi hits agrulu al Dumnidzãu, adãrãmintul al Dumnidzãu.

10 Dupã harul al Dumnidzãu tsi nji si deadi, ca un mastru mintimen, mini bãgai timeljiu, iarã un altu adari di prisupru. Cathi unu prindi s-adarã cu cãshtigã, 11 cã vãrã nu poati s-bagã altu timeljiu, dicãt atsel tsi easti bãgat, cai easti Isus Hristos. 12 Tora, macã vãrã adarã pri aestu timeljiu ufilisinda furii, asimi, chetri scumpi, leamni, iarbã, palji, 13 lucrulu a cathiunui va easã tu padi, cã Dzua va l-facã si s-veadã, cã va s-dizvãleascã cu foc sh-foclu va s-aspunã cai easti lucrul a cathiunui. 14 Macã lucrul a vãrui tsi elu adãrã prisuprã va armãnã, elu va ljea arãsplata. 15 Macã lucrul a vãrui va si s-ardã tutã, elu va s-u chearã lucrul, ma atsel om va si ascapã ashã ca prit foc.

16 Nu shtits cã hits templul al Dumnidzãu sh-cã Duhlu a Dumnidzãlui bãneadzã tu voi? 17 Macã vãrã va aspargã templul a Dumnidzãlui, Dumnidzãlu va lu aspargã atsel om, cã templul a Dumnidzãlui, tsi hits voi, easti sãmtu.

18 Vãrã s-nu si s-arãdã. Macã vãrã di voi mindueashti cã easti mintimen tu aestã etã, si s-facã "zurlu," tra si s-facã mintimen. 19 Cã mintimeniljea a lumiljei aishtei easti zurleatsã nãintea al Dumnidzãu, cã easti scriatã: "Elu lji acatsã mintimenjilji tu ileili a lor." 20 Sh-iarã: "Domnul li cunoashti minduirili a mintimenjilor tsi suntu goali." 21 Trã atsea, vãrã s-nu si s-alavdã cu oaminjlji, cã tuti suntu a voastri, 22 cum Pavlu, cum Apollo, cum Chefa, cum lumea, cum bana, cum moartea, cum atseali tsi suntu di azã, sh-atseali tsi va yinã, tuti suntu a voastri, 23 sh-voi hits a Hristolui, sh-Hristolu easti al Dumnidzãu.