1 Cuteadzã vãrã di voi tsi, cãndu ari unã halã contra a unui altu, si s-giudic nãintea nindreptsãlor sh-nu nãintea a oaminjlor sãmtsã a Dumnidzãlui? 2 Nu shtits cã oaminjlji sãmtsã a Dumnidzãlui va giudic lumea? Sh-macã lumea va si s-giudic di voi, atumtsea vahi hits anaxi ti giudicari lucrili ma njitsi? 3 Nu shtits cã va giudicãm anghilji? Sh-cãt ma multu lucrili aishtei lumi? 4 Trã atsea, ma s-avets niaduchiri trã lucrili a bãnãljei, va bãgats giudicãtori atselji cai suntu nitinjisits tu bisearicã? 5 Trã arushinea a voastrã vã dzãc. Ashãtsi, nu ari atsia ntrã voi vãrã mintimen, cai va s-poatã s-giudicã namisa di fratslji a lui? 6 Ashãtsi, frati s-giudicã di fratili, sh-aestã nãintea a nipistimenjilor!

7 Tora, aestã easti didip unã chireari trã voi, faptul tsi avets giudicãtsi cu un-alantu. Cãtse nu alãsats ma ghini s-vã fac nindriptati? Cãtse nu alãsats ma ghini s-vã arãdã? 8 Din contra, voi fãtsets nindriptati sh-arãdets altsãlji, sh-aestã u-fãtsets la fratslji. 9 Nacã nu shtits cã nindreptsãlji nu va u-mushtineadzã Amirãriljea a Dumnidzãlui? Nu vã arãdets! Nitsi curvarlji, nitsi idulatsri, nitsi curunã-cãlcatslji, nitsi imasculatsi sexualã, nitsi atselji tsi s-duc cu mascuri, 10 nitsi furlji, nitsi zilichearlji, nitsi mbitatsilji, nitsi blãstimãtorilji, nitsi arãchitorlji nu va u-mushtineadzã Amirãriljea a Dumnidzãlui. 11 Sh-ahtãri earats niscãntsã di voi, ma vã aspilat, vã sãmtsãtã, vã ndriptat tu numa a Domnului Isus Hristos sh-prit Duhlu a Dumnidzãlui a nostru.

12 "Tuti suntu nvoljiti trã mini," ma nu tuti suntu di ufelii. "Tuti suntu nvoljiti trã mini," ma mini nu va mi bag tu domniljea a vãrui lucru. 13 Voi dzãtsets, "Mãcãrili suntu ti pãnticlu sh-pãnticlu easti ti mãcãrili, ma Dumnidzãlu va li afãniseascã sh-atsel sh-aesti." Iarã truplu nu easti trã putãnsiri, ma trã Domnul sh-Domnul trã truplu. 14 Dumnidzãlu lu nyie Domnul, sh-noi va nã nyeadzã prit fuchia a lui. 15 Nu shtits cã trupurili a voastri suntu mãdularili a Hristolui? S-fatsi s-li mut mãdularili a Hristolui shi s-li mpriuneadzã cu mãdularili a unei putanã? Pute s-nu hibã! 16 Nacã nu shtits cã atsel tsi s-mpriunã cu putana, easti un trup cu ea? Cã Scritura dzãtsi: "Va hibã doilji un trup singur."* 17 Iarã atsel tsi s-mpriuneadzã tu Domnul, easti un duh cu nãsu.

18 Dipãrtats-vã di putãnsirea! Cathi amãrtii, itsido tsi fatsi un om, easti nafoarã di trup, iarã atsel cai putãnseashti, amãrtiseashti cãtrã truplu a lui. 19 Nacã nu shtits cã truplu a vostru easti templul a Duhlui Sãmtu, tsi easti tu voi, cai lu avets di la Dumnidzãlu sh-voi nu hits a voshtri? 20 Cã voi vã acumpãrat cu un tinjii. Multumãrits tora Dumnidzãlu tu truplu a vostru!