1 Cãt ti atseali mãcãri curbãnsiti a idoljilor, noi shtim cã "tuts avem cunushteari." Cunushtearea s-pirifãnseashti, iarã vrearea adari. 2 Macã a vãrui lji si pari cã ari cunuscut tsiva, nu ari cunuscut ninga ashã cum prindi s-cunoascã. 3 Ma macã vãrã lu va Dumnidzãlu, aestu om easti cunuscut di elu.

4 Cãt ti mãcarea atsea curbãnsitã a idoljilor, shtim cã "un idol nu easti tsiva tu lumi" sh-cã "nu ari vãrã Dumnidzã tu lumi dicãt mash unlu." 5 Cã, sh-macã suntu atselji ashã-acljimats dumnidzadz, cum tu tser, cum tu loc (di cum suntu multsã dumnidzadz sh-multsã domnji), 6 nãpoi sh-nãpoi trã noi easti mash un Dumnidzã, Tatãl, di la cai suntu tuti, sh-noi bãnãm ti nãsu, sh-easti mash un Domnu, Isus Hristos, prit cai suntu adrati tuti sh-noi bãnãm prit nãsu.

7 Cu tut atsea aestã cunushteari nu easti la tutsã. Niscãntsã, traptã di adetea a idoljilor pãnã tora, cãndu mãcã atsea tsi easti curbãnsita a idolui, conshtintsa a lor hinda slabã, s-pãnĝãneashti. 8 Mãcarea nu nã aproachi ningã Dumnidzãlu, cã nitsi macã nu mãcãm nu va him ma putsãn, sh-nitsi macã va mãcãm nu va him ma multu.

9 Ma bãgats mintea tsi libertatea a voastrã s-nu s-facã nchidicari trã slaghilji. 10 Cã, macã vãrã tsi easti slab va veadã voi tsi avets cunushteari stãnda ti mãcari la templul a idoljilor, nu va cuteadzã conshtintsa a lui, hinda slab, tsi elu s-mãcã di atseali curbãnsiti a idoljilor? 11 Ashãtsi, atsel cai easti slab, fratili a tãu, trã cai muri Hristolu, va chearã trã itia cunushteariljei a ta. 12 Ashãtsi, amãrtisinda contra a fratsilor sh-pliguinda conshtintsa a lor atsea slabã, amãrtisits cãtrã Hristolu. 13 Trã atsea, macã unã mãcari s-fatsi nchidicari ti fratili a meu, nu va mãcã pute carni nãpoi tra s-nu s-ncheadicã fratili a meu.