1 Fãtsets-vã imitatorlji a melji ashã di cum sh-mini escu imitatorlu a Hristolui.

2 Tora mini vã alavdu, cã mi adutsets aminti tu tuti lucrili sh-li tsãnets tuti adetsili ashã di cum vã li nvitsai. 3 Ma voi tra si shtits cã caplu a cathiunui bãrbat easti Hristolu, caplu a muljeariljei easti bãrbatlu sh-caplu a Hristolui easti Dumnidzãlu. 4 Cathi om tsi s-roagã icã prufitipseashti avãnda caplu anvãlit, arushineadzã caplu a lui. 5 Cathi muljeari tsi s-roagã icã prufitipseashti cu caplu dizvãlit arushineadzã caplu a ljei, cã easti unã soi ca unã muljeari cai ari sursitã caplu. 6 Macã unã muljeari nu anvãleashti caplu, atumtsea si s-tundã. Ma, macã ti unã muljeari easti arushãni si s-tundã icã surseascã caplu, atumtsea si anvãleascã. 7 Bãrbatlu nu prindi s-anvãleascã caplu, metsi easti icoana sh-mãrirea a Dumnidzãlui, iarã muljearea easti mãrirea a bãrbatlui. 8 Cã nu easti bãrbatu di la muljearea, ma muljearea easti di la bãrbatlu. 9 Nu s-featsi bãrbatlu ti muljearea, ma muljearea s-featsi ti bãrbatlu. 10 Trã aestã muljearea prindi s-aibã un semnu di autoritati pri cap trã itia a anghilor.

11 Cu tut atsea, tu Domnul, nitsi muljearea nu easti fãrã di bãrbatlu, nitsi bãrbatlu nu easti fãrã di muljearea. 12 Cã dupã cum muljearea yini di la bãrbatlu, ashã sh-bãrbatlu vini di la muljearea sh-tuti lucrili suntu di la Dumnidzãlu. 13 Giudicats voi singuri: Easti ghini ti unã muljeari si s-roagã a Dumnidzãlui cu caplu gol? 14 Nu vã nveatsã sh-natura cã, macã un bãrbat alasã peri lundzi, easti arushãni trã nãsu, 15 macã unã muljeari alasã peri lundzi, atsea easti tinjii ti nãsã? Cã perlji lundzi lji si deadirã a ljei ti anvãliri. 16 Ma, macã vãrã va si s-facã ngrãnjaru, noi nu avem ahtar adeti sh-nitsi biseritsli a Dumnidzãlui.

17 Urnipsinda trã aestã, mini nu vã alavdã, cã voi vã adunats nu ti ghini, ma ti arãu. 18 Nãinti di tuti, cãndu voi vã adunats tu bisearicã, avdu cã ari dispãrtsãri namisa di voi sh-di unã parti pistipsescu. 19 Prindi s-aibã sh-mpãrtsãri namisa di voi tra si s-cunoascã atselji cai suntu aprovatsi. 20 Trã atsea, cãndu vã adunats la un loc, nu easti trã mãcari Tsina a Domnului, 21 cã tu mãcari, cathiunu ljea ma nãinti tsina a lui sh-un ari foami, iarã alantu si mbeati. 22 Nacã nu avets casã ti mãcari sh-ti beari? Icã dispretsuits bisearica a Dumnidzãlui sh-rushinats atselji tsi nu au? Tsi s-vã dzãc? S-vã alavdu ti aestã? Nu vã alavdu.

23 Cã mini loai di la Domnul atsea tsi vã nvitsai sh-a voauã: Cã Domnul Isus tu noaptea tu cai s-vindu, lo pãni, 24 sh-hãristisinda, u-frãmsi sh-dzãsi: "Aestu easti truplu a meu, tsi easti ti voi. Fãtsets aestã ti adutseari aminti mini." 25 Tutashã lo sh-cupa dupã tsinã dzãcãnda: "Aestã cupã easti pisti-ligãtura atsea noaua tu sãndzili a meu. Fãtsets aestã, di cãti ori va bets, ti adutseari aminti mini." 26 Cã di cãti ori voi mãcats aestã pãni sh-bets aestã cupã, voi dimãndats moartea a Domnului pãnã la vinita a lui.

27 Ashãtsi-cã, caitsido tsi va mãcã aestã pãni sh-va bea cupa a Domnului ni axiusit, va s-hibã cãbatar a truplui sh-a sãndzilui a Domnului. 28 Ashãtsi cathiunu prindi si s-giudicã, sh-atumtsea s-mãcã di pãnea shi s-bea di cupa. 29 Atsel tsi mãcã sh-bea fãrã achicãsiri, mãcã sh-bea giudicata trã nãsu, cã nu cunoashti truplu a Domnului. 30 Trã aestã suntu ntrã voi multsã slaghi sh-lãndzits sh-multsã durnjirã. 31 Ma, ca s-nã mutream ghini, nu va nã giudicam. 32 Cãndu nã giudicãm di Domnul, nã ndridzem tra s-nu nã condamnãm deadun cu lumea.

33 Ashãtsi, frats sh-surãri, cãndu vã adunats ti mãcari, ashtiptats un-alantu. 34 Macã vãrã ari foami, s-mãcã la casã, tra s-nu vã adunats ti giudicari. Alantãli va li ndreg cãntsido tsi va yin.