1 Cãndu mini vinj la voi, frats sh-surãri, nu zburai cu zboari mãri icã ca mintimen trã dimãndari a voauã mistiryiul al Dumnidzãu. 2 Cã apofãsii s-nu shtiu altu tsiva ntrã voi, dicãt Isus Hristolu sh-aestu crutsisit. 3 Mini vinj la voi cu slãbintsã, cu fricã sh-cu trimurari mari. 4 Zborlu a meu sh-predicarea a mea nu furã zboari di cãndãrsiri prit mintimeniljea, ma cu aspunearea a Duhlui sh-a fuchiiljei, 5 tsi pistea a voastrã s-nu s-andoapir tu mintimeniljea umineascã, ma tu putearea a Dumnidzãlui.

6 Cu tut atsea noi zburãm ti mintimeniljea ntrã oaminji coptsã, ma nu ti mintimeniljea a lumiljei sh-a frãmtashilor a lumiljei aishtei, atsilor cai ma cher. 7 Din contra, noi grim mintimeniljea al Dumnidzãu, tu mistiryiul tsi fu ascumtu, cai Dumnidzãlu u-arãdãpsi nãinti di tuti etili trã mãrirea a noastrã. 8 Aestã vãrã di domnjitorlji a etiljei aishtei nu u-ari aduchitã, cã, macã va u avea aduchitã, nu va lu-avea crutsisitã Domnul a mãririljei. 9 Ma ashã cum easti scriatã:

"Atseali tsi ocljiul nu li vidzu

sh-ureaclja nu li avdzã,

sh-tsi nu intrarã tu inima a omlui,

suntu atseali tsi etimãsi Dumnidzãlu trã atselji cai lu vor."

10 A noauã nã li discupiri Dumnidzãlu prit Duhlu, cã Duhlu li sitãxeashti tuti, sh-ahãndamili al Dumnidzãu. 11 Cai di oaminjlji li shtii minduirili a omlui, dicãt duhlu a omlui tsi easti tu nãsu? Ashãtsi sh-minduirili al Dumnidzãu nu li shtii vãrã di cãt Duhlu a Dumnidzãlui. 12 Noi nu lom duhlu a lumiljei, ma Duhlu tsi easti di la Dumnidzãlu, tra s-cunushtem atseali tsi nã deadi prit har Dumnidzãlu. 13 Trã atsea noi zburãm, nu cu zboari nvitsati di la mintimeniljea a oaminjlor, ma cu zboari nvitsati di la Duhlu, sitãxinda lucrili duhuroasi a oaminjlor duhuroshi. 14 Omlu natural nu li aproachi lucrili a Duhlui a Dumnidzãlui, cã trã nãsu suntu zurleatsã sh-nu poati s-li aducheascã, cã atseali suntu sitãxiti prit Duh. 15 Omlu duhuros li sitãxeashti tuti, ma elu nu si sitãxeashti di vãrã, 16 cã,

"Cai u cunuscu mintea a Domnului,

tra s-lu nveatsã atsel?"

Ma noi avem mintea a Hristolui.