1 Vã alasã amaneti sora a noastrã Feba, cai easti diaconã la bisearica tsi easti tu Chencrea, 2 tra s-u aprucheats tu Domnul cu tinjii trã oaminjlji a Dumnidzãlui shi s-hits ningã nãsã tu itsido tsi ea ari ananghi di voi, cã sh-ea fu ningã multsã oaminji sh-ningã mini.

3 Dats sãnãtati la Prishila sh-la Acuila, colucrutorlji a melji tu Hristolu Isus, 4 cai trã bana a mea bãgarã tu piricljiu caplu a lor sh-lji hãristisescu nu mash mini, ma sh-tuti biseritsli a pãngãnjilor. 5 Dats sãnãtati sh-a bisearicãljei la casa a lor. Dats sãnãtati al Epenetu, vrutlu a meu, cai easti protlu carpo ali Asii tu Hristolu. 6 Dats sãnãtati ali Marii, cai s-cãpãi multu trã voi. 7 Dats sãnãtati al Andronicu sh-ali Iunia, compatriotsi a melji sh-hãpsãnits deadun cu mini, cai suntu cu anami ntrã apostulji sh-cai furã tu Hristolu nãintea a mea. 8 Dats sãnãtati al Ampliatu, a vrutlui a meu tu Domnul. 9 Dats sãnãtati al Urbanu, colucrutorlu a nostru tu Hristolu, sh-al Stacu, vrutlu a meu. 10 Dats sãnãtati al Apelu, aprovat tu Hristos. Dats-lã sãnãtati di la atselji di casa al Aristobul. 11 Dats sãnãtati al Herodionu, compatriotlu a meu. Dats sãnãtati atsilor dit casa al Nartsisu, cai suntu tu Domnul. 12 Dats sãnãtati ali Trifena sh-ali Trifosa, cai s-cãpuescu tu Domnul. Dats sãnãtati a vrutiljei Persida cai s-cãpãi multu tu Domnul. 13 Dats sãnãtati al Rufu, aleptu tu Domnul, sh-a mumãljei a lui cai easti sh-a mea. 14 Dats sãnãtati al Asincritu, al Flegonu, al Herma, al Patrobu, al Hermasu sh-a fratsilor sh-a surãrilor cai suntu deadun cu nãshi. 15 Dats sãnãtati al Filologu, ali Iulia, al Nereu sh-a sorãljei a lui, ali Olimpii sh-a tuts oaminjlor a Domnului cai suntu deadun cu elji. 16 Dats sãnãtati a unui-alantu cu unã bãshari sãmtã. Vã pitreac sãnãtati tuti biseritsli al Hristos.

17 Vã fac rigeai, frats sh-surãri, s-vã afirits di atselji tsi fac dispãrtsãri sh-nchidicari contra a nvitsãturãljei cai voi nvitsat. Stats diparti di atselji. 18 Cã ahtãri oaminji nu lj-huzmitipsescu a Domnului a nostru Isus Hristos, ma a pãnticlui a lor sh-prit mushati zboari sh-alãvdãri arãd ininjili atsilor tsi suntu ageamii. 19 Cãndãrsirea a voastrã agiumsi la tutsã, trã atsea mini mi hãrsescu trã voi sh-voi s-hits froninji trã buna sh-chischinji trã arãulu. 20 Dumnidzãlu a paciljei va lu dãrãmã curundu Satanlu sum cicioarili a voastri. Harul a Domnului a nostru Isus s-hibã cu voi!

21 Vã da sãnãtati Timoteu, colucrutorlu a meu, Lutsiu, Iasonu sh-Sosipatru, compatriotsãlji a melji. 22 Vã dau sãnãtati tu Domnul mini, Tertsiu, cai scriai cartea. 23 Vã da sãnãtati Gaiu, ghini-ashtiptãtorlu a meu sh-a tutã bisearicãljei. Vã da sãnãtati Erastu, hãznãtarlu a cãsãbãlui, sh-fratili Cuartu. 24 [Harul a Domnului a nostru Isus Hristos s-hibã cu voi tuts! Amin!]*

25 Tora atsilui tsi poati s-vã nvãrtusheascã dupã evanghelu a meu sh-dupã predicarea al Isus Hristos prit discupirirea a mistiryiului tsi eara tsãnut ascumtu di multu chiro, 26 ma tsi tora s-fãnirusi shi s-featsi cunuscut trã tuti fãrili prit Scriturili a prufitsilor dupã ordinlu al Dumnidzãu di daima trã adutseari cãndãrsirea a pistiljei, 27 a singurlui Dumnidzã mintimen, s-lji hibã mãrirea tu eta a etilor prit Isus Hristos! Amin!