1 Tora aprucheats-lu atsel tsi easti slabu tu pisti sh-ni vãrghit minduirili a lui. 2 Vãrã pistipseashti cã prindi s-mãcã di tuti, iarã atsel tsi easti slabu mãcã mash zãrzãvãtsi. 3 Atsel tsi mãcã itsido, s-nu dispretsueascã atsel tsi nu mãcã sh-atsel tsi nu mãcã di tuti, s-nu giudicã atsel tsi mãcã di tuti, cã Dumnidzãlu lu apruche atsel. 4 Cai eshti tini tsi giudits huzmichearlu a altului? Elu sta pri cicioari icã cadi, aestã easti lucrul a nicuchirlui a lui, ma elu va sta ndreptu, cã Dumnidzãlu easti putut s-lu facã si sta pri cicioari. 5 Unlu tinjiseashti unã dzuã ma multã di unã altã, alantu li tinjiseashti tuti dzãlili unã soi. Cathiun s-hibã didip sigur tu mintea a lui. 6 Atsel tsi tinjiseashti dzua, trã Domnul u tinjiseashti sh-atsel tsi mãcã, trã Domnul mãcã cã elu hãristiseashti Dumnidzãlu. Atsel tsi nu mãcã, trã Domnul nu mãcã sh-hãristiseashti Dumnidzãlu. 7 Cã vãrã di noi nu bãneadzã trã nãsu sh-vãrã nu moari trã nãsu. 8 Macã bãnãm, trã Domnul bãnãm, sh-macã murim, trã Domnul murim. Ashãtsi, macã bãnãm sh-macã murim, a Domnului him. 9 Trã aestã muri Hristolu, s-nyie shi s-turnã tu banã, tra s-domneascã sh-pristi mortsãlji sh-pristi yiilji.

10 Ma tini cãtse giudits fratili a tãu? Tini alantu, cãtse dispretsueshti fratili a tãu? Cã tuts va stãm nãintea a thronlui a giudicatãljei al Dumnidzãu. 11 Cã easti scriatã:

"‘Mi giurã trã bana a mea,’ dzãtsi Domnul,

‘cã nãintea a mea va si apleacã cathi dzinucljiu, sh-cathi limbã va s-alavdã Dumnidzãlu.’"

12 Trã atsea, cathiun di noi va lji da lugurii a Dumnidzãlui trã nãsu.

13 Trã atsea, s-nu nã giudicãm cu un-alantu, ma ma ghini minduits aestã, s-nu bãgats ncheadic shi s-cadã tu amãrtii fratili a tãu. 14 Mini shtiu sh-escu cãndãrsit tu Domnul Isus, cã tsiva nu easti nicurat. Ma trã atsel tsi lugurseashti cã easti vãrã tsiva nicurat, atumtsea trã atsel easti nicurat. 15 Cã, macã trã itia a mãcariljei fratili icã sora a ta suntu nvirinats, tini nu ma imnji ma dupã vrearea. Nu u-cheari cu mãcarea a ta fratili icã sora trã cai Hristolu muri. 16 Trã atsea s-nu si ngiurã buneatsa a voastrã. 17 Cã amirãriljea al Dumnidzãu nu easti mãcari sh-beari, ma ndriptati, pace sh-harauã tu Duhlu Sãmtu. 18 Atsel tsi lji huzmitipseashti a Hristolui tu aestã, easti arsitã di la Dumnidzãlu sh-aprovat di la oaminjlji.

19 Atumtsea s-urmãm atseali tsi suntu trã pace sh-trã nvãrtushirea a unui-alantu. 20 Nu aspardzi lucrul a Dumnidzãlui trã mãcari! Dealihea tutã mãcarea easti curatã, ma easti arãu trã omlu tsi mãcã tsiva tsi-lji si-fatsi ncheadic a altului. 21 Ghini easti s-nu mãtsi carni shi s-nu beai yin shi s-nu fatsi tsiva altã la cai fratili shi sora a ta si s-ncheadicã shi s-cadã. 22 Pistea tsi ai, s-u ai trã tini nãintea a Dumnidzãlui. Cahara di atsel tsi nu si giudicã singur prit atseali tsi aleadzi. 23 Ma atsel tsi ãndoiashti, ma s-mãcã, easti condamnat, cã mãcarea a lui nu easti dit pistea, sh-itsido tsi nu easti dit pistea easti amãrtii.