1 Noi tsi him vãrtoshi prindi s-purtãm slãbintsa atsilor cai suntu slaghi shi s-nu cãftãm chefea a noastrã. 2 Cathiun di noi s-lji arseascã a aproapilui trã ghinea sh-nãintarea a lui. 3 Cã sh-Hristolu nu cãftã arsirea a lui, ma ashã cum easti scriatã: "Ngiurãrili atsilor tsi ti ngiurarã tini, cãdzurã pristi mini." 4 Tuti cãti suntu scriati di ma nãinti, si scriarã trã nvitsãtura a noastrã, cu nãeti tsi, prit arãvdarea sh-prit inimusirea a Scriturilor, s-avem nãdii. 5 Tora Dumnidzãlu a arãvdariljei sh-a inimusiriljei s-vã da a voauã tra s-minduits idyiul lucru cu un-alantu dupã Hristolu Isus, 6 cu nãeti tsi cu unã minti sh-cu unã boatsi s-alãvdats Dumnidzãlu sh-Tatãl a Domnului a nostru Isus Hristos.

7 Trã atsea aprucheats un-alantu ashã dupã cum sh-Hristolu vã apruche trã mãrirea a Dumnidzãlui. 8 Cã mini dzãc cã Hristolu s-featsi huzmichear a anvãrliga-tãljeatslor trã luguria a alihiljei al Dumnidzãu, trã alihipsiri tãxirili fapti a pãrintsãlor 9 sh-pãngãnjlji s-multu-mãrescu Dumnidzãlu trã njila a lui, ashã cum easti scriatã:

"Trã aestã, ntrã Pãngãnjlji va tsã da alãvdari,

sh-a numãljei a ta va lji psãltisescu."

10 Sh-nãpoi elu dzãtsi:

"Hãrsits-vã voi Pãngãnji cu populu a lui!"

11 Sh-nãpoi:

"Alãvdats Domnul voi tuts Pãngãnji,

shi s-lu alavdã atsel, tuts populjilji!"

12 Sh-nãpoi Isaia dzãtsi:

"Va yinã arãdãtsina al Iesseu,

meti atsel tsi va si scoalã trã domniri fãrili,

la nãsu va nãdãeascã fãrili."

13 Dumnidzãlu a nãdiiljei s-vã umplã cu multã harauã sh-pace pistipsinda tu nãsu, tsi voi s-vã artirsits tu nãdii prit putearea a Duhlui Sãmtu.

14 Fratsi sh-surãrili a meali, tora sh-mini escu cãndãrsit trã voi, cã sh-voi idyilji hits mplinji di ghineatsã, mplinji di cathi shtintsã sh-hits axi s-urnipsits un-alantu. 15 Vã scriai cu ma multu curaiu trã niscãnti lucri, tra s-vã-u aduc aminti trã itia a harului tsi nji si deadi di la Dumnidzãlu, 16 tra s-hiu mini huzmichearlu a Hristolui Isus trã pãngãnji, huzmitipsinda ca preftu Evanghelu al Dumnidzãu tsi pãngãnjlji si s-facã curbani arsitã shi sãmtsãtã di la Duhlu Sãmtu.

17 Trã atsea, mini mi alavdu tu Hristolu Isus trã atseali lucri tsi au s-facã cu Dumnidzãlu. 18 Cã nu va s-cutidzãm pute si zburam ti vãrã lucru tsi Hristolu nu featsi prit mini tra s-aducã ascultarea a pãngãnjilor cu zboari sh-cu fapti, 19 prit fuchia a seamnilor sh-a thavmatilor, prit putearea a Duhlui a Dumnidzãlui, ashãtsi cã mini, dit Ierusalem sh-anvãrliga pãnã tu Iliricum, am mplinit dimãndarea a Evanghelui a Hristolui. 20 Ashãtsi cã vrearea a mea fu trã hãbãrsirea a Evanghelui, ma nu aclo iu easti cunuscutã Hristolu, tra s-nu adar pri timeljiul a altui, 21 ma ashã cum easti scriatã:

"Atsilor tsi nu lã si dimãndã trã nãsu, va s-veadã

sh-atselji cai nu au avdzãtã, va aducheascã."

22 Trã atsea, mi nchidicam di multi ori tra s-yineam la voi. 23 Tora niavãnda ma loc ti evanghelisiri tu aesti locuri sh-avãnda dor di multi anji s-yin la voi, 24 cãntsido s-mi duc Spanjia, nãdãescu tsi tricãnda, s-vã vedu, sh-voi s-mi agiutats cu itsi nji hãrzãeashti trã aclo, dupã tsi s-am hãrsitã ma nãinti di putsãn chiro cu voi. 25 Ma tora ma mi duc tu Ierusalem s-lã huzmitipsescu a oaminjlor al Dumnidzãu aclo. 26 Cã Machidunia sh-Ahaia deadirã cu harauã agiutãri trã oarfãnjlji la populu a Domnului tu Ierusalem. 27 Aestã a lor u-arsi, ma easti sh-ca borgi cãtrã elji, cã macã pãngãnjlji loarã parti tu Ghinicuvintãrili sufliteascã a Iudeilor, prindi s-lã huzmitipseascã a lor sh-tu lucrili trupeshti. 28 Trã atsea, dupã tsi va am bitisitã aestã sh-cãndu va am vulusitã a lor aestu agiutor, va mi duc tu Spanjia, tricãnda pri la voi. 29 Sh-mini shtiu cã yininda la voi, va yin cu mplinãtatea a ghinicuvãntariljei a Hristolui.

30 Tora vã fac rigeai, frats sh-surãri, prit Domnul a nostru Isus Hristos sh-prit vrearea a Duhlui s-alumtats deadun cu mini tu rugãciunji cãtrã Dumnidzãlu trã mini. 31 Rugats-vã tra s-ascap di atselji nipistimenji cai suntu tu Iudea sh-huzmitipsirea a mea trã Ierusalemlu s-hibã aprucheat cu harauã trã oaminjlji a Domnului, 32 tra s-yinã la voi cu harauã prit vrearea al Dumnidzãu shi s-mi nvãrtushescu di nou deadun cu voi. 33 Tora Dumnidzãlu a paciljei s-hibã cu voi tuts! Amin!