1 Trã atsea, tini om, nu eshti fãrã cãbati. Caitsido s-hii tini tsi giudits vãrã altu, tini idyiul ti condamnji, cã ahtãri lucri fats sh-tini. 2 Tora noi u shtim cã giudicata a Dumnidzãlui easti dupã alihea ti atselji tsi fac ahtãri lucri. 3 Mindueshti tini, vahi lai om, tsi giudits atselji cai fac ahtãri lucri, cã sh-tini li fats, cã va s-ascachi di giudicata al Dumnidzãu? 4 Icã li dispretsueshti ayishtearili a bunãtatiljei a lui, a arãvdariljei sh-a bunã-geanlui a lui, nishtinda cã bunãtatea a lui ti dutsi tu pishmãnipsiri?

5 Ma, trã itia a asprimiljei a ta sh-a inimãljei nipishmãnipsit ma adunji trã tini inatea ti dzua a inatiljei al Dumnidzãu cãndu va s-aspunã giudicata atsea ndreapta a lui, 6 tsi va arãsplãteascã cathiunu dupã faptili a lui. 7 Atsilor tsi ipiminisescu tu fapti buni sh-caftã mãriri, tinjii sh-nimuriri, elu va u-da banã eternã. 8 Iarã atsilor tsi suntu egoishtsi sh-arnipseascã alihea, shi s-cãndãrseascã a nindriptatiljei, elu va lã da inati sh-turbari. 9 Munduiri sh-strimturã va aibã pri cathi suflit di om tsi fatsi arãu, cum Iudeulu ma nãinti, apoia sh-Pãngãnlu. 10 Ma mãriri, tinjii sh-pace a cathiunui tsi fatsi buna, ma nãinti a Idueului sh-apoea a Pãngãnlui, 11 cã Dumnidzãlu nu tsãni cu hãtãri.

12 Tuts atselji tsi amãrtisirã fãrã di lege, va chearã fãrã di lege sh-tuts atselji tsi amãrtisirã cu legea, va si s-giudicã prit legea. 13 Cã nu suntu ndreptsã nãintea al Dumnidzãu atselji cai avdu legea, ma atselji cai u facã legea, atselji va si s-acljeamã ndreptsã. 14 Cãndu pãngãnjlji, nu u-au legea, elji li facã singur lucrili tsi cafti legea, iarã niavãnda lege s-fac lege singur ntrã elji. 15 Elji aspun dimãndãciunjili a legiljei scriati tu ininjli a lor, trã mãrtiria tsi da conshtintsa a lor sh-iarã namisa di nãshi, minduirili lji cãbãteadzã sh-lji discãbãteadzã, 16 tu dzua cãndu Dumnidzãlu va giudicã ascumtili a oaminjlor dupã evanghelu a meu prit Hristolu Isus.

17 Ma, macã tini ti acljenji Iudeu, eshti andupirat tu lege sh-alavdzã Dumnidzãlu, 18 cunoshti vrearea a lui, aledzi atseali tsi axizescu, hinda nvitsat prit legea, 19 eshti cãndãrsit cã eshti cãlãuzlu a orghilor, lunjinã trã atselji tsi suntu tu scutidi, 20 urnipsitor atsilor fãrã-minti, nvitsãtor a cilimenjilor, avãnda tu lege forma a shtintsãljei sh-a alihiljei. 21 Tini tsi nvets altsãlji, nu ti nvets tini ma nãinti? Tini tsi preditsi s-nu furii, tini furii? 22 Tini tsi dzãtsi cã nu prindi s-caltsã curunea, u-caltsi? Tini tsi ai aĝunos di idolji, tini furii templjli? 23 Tini tsi ti alavdzã cu legea, nu lu tinjiseshti Dumnidzãlu cãlcãnda legea? 24 Cã ashãtsi cum easti scriatã: "Trã itia a voastrã, numa al Dumnidzãu s-blastimã ntrã pãngãnjlji."✝

25 Anvãrliga-tãljearea axizeashti macã tini urmedzi legea, ma, macã tini eshti cãlcãtor a legiljei, anvãrliga-tãljearea a ta easti faptã nianvãrliga-tãljeari. 26 Trã atsea, un nianvãrliga-tãljeat macã veaglji dimãndãciunjili a legiljei, nu va s-lugurseascã nianvãrliga-tãljearea a lui ca anvãrliga-tãljeari? 27 Omlu nianvãrliga-tãljeat di naturã, tsi mplineashti legea, va ti giudicã tini tsi, cu tutã litera a legiljei sh-cu anvãrliga-tãljearea a ta, eshti cãlcãtor a legiljei. 28 Cã, nu easti Iudeu atsel cai s-veadi di nafoarã sh-anvãrliga-tãljearea nu easti atsea tsi s-aspuni tu trup. 29 Ma Iudeu easti atsel cai easti ahtar di nãuntru sh-anvãrliga-tãljearea easti atsea a inimãljei tu Duh, nu tu literã. Alãvdarea a lui nu easti di la oaminji ma di la Dumnidzãlu.