1 Ndriptats prit pisti, avem pace cu Dumnidzãlu prit Domnul a nostru Isus Hristos, 2 prit cai avem intrat cu pisti tu aestu har tu cai stãm sh-noi nã alãvdãm tu nãdia a mãririljei al Dumnidzãu. 3 Nu mash aestã, ma nã alãvdãm tu munduiri, shtinda cã munduirea adutsi arãvdari, 4 arãvdarea haractir, sh-haractirlu nãdii. 5 Nãdia nu nã arushineadzã, cã vrearea al Dumnidzãu easti virsat tu ininjli a noastri prit Duhlu Sãmtu tsi nã si deadi a noauã.

6 Cãndu noi ninga earam nipututsi, Hristolu muri tu chirolu tsi prindea trã nidumnidzãsitslji. 7 Zori easti tra s-moarã vãrã ti un ndreptu, vahi vãrã va cutidza s-murea trã un om bun, 8 ma Dumnidzãlu lu aspusi vrearea a lui trã noi la atsea tsi, cãndu noi ninga earam amãrtioshi, Hristolu muri trã noi.

9 Ahãntu ma multu, hinda ndriptats tora prit sãndzili a lui, va nã ascãpãm di inatea a Dumnidzãlui prit nãsu. 10 Iarã earam dushmanji, nã puituim cu Dumnidzãlu prit moartea a Hiljilui a lui, tora ninga ma multu tsi him puituits, va nã ascãpãm prit bana a lui. 11 Nu mash ahãntu, ma sh-nã alãvdãm tu Dumnidzãlu prit Domnul a nostru Isus Hristos, prit cai noi tora avem aprucheat puituirea.

12 Trã atsea, ashã dupã cum prit un singur om amãrtia intrã tu lumi, ashãtsi moartea prit amãrtia vini la tuts oaminjlji, cã tuts amãrtisirã, 13 cã, pãnã tu vinita a legiljei, amãrtia eara tu lumi, ma amãrtia nu s-lugursea cã legea nu eara. 14 Cu tut atsea, moartea domni di la Adam pãnã la Moisiu sh-prit atselji tsi nu avea amãrtisit cum avea amãrtisit Adam, tsi easti icoana atsilui tsi prindi s-yinea. 15 Ghini ma, doara a harului nu easti ca amãrtia, cã macã prit amãrtia a unui om singur murirã multsã oaminji, ahãntu ma multu harul al Dumnidzãu sh-doara prit harul a unui om, Isus Hristos, artirsi trã mults oaminji. 16 Aestã doarã nu easti ca atsea tsi undzi prit atsel tsi amãrtisi. Cã, di unã parti, giudicata tsi vini di unã cãbati adusi condamna, iarã, di alantã parti, doara a harului tsi vini dupã multi amãrtii adusi ndriptati. 17 Cã, macã prit amãrtisirea a unui, moartea domni prit atsel, ahãntu ma multu atselji tsi ljea multeatsa a harului sh-a durusiriljei a ndriptatiljei, va domneascã tu banã mash prit un om, Isus Hristos. 18 Trã atsea, ashãtsi dupã cum mash prit unã amãrtii, bitisita fu condamna pristi tutsã oaminjlji, ashãtsi sh-prit mash unã faptã ndreaptã, bitisita easti ndriptarea tsi da banã trã tuts oaminjlji. 19 Ashãtsi, dupã cum prit niascultarea a unui singur om, multsãlji s-featsirã amãrtioshi, ashãtsi sh-prit ascultarea a unui singur om multsãlji va s-facã ndreptsã. 20 Tora legea vini tsi s-multseascã ncãlcarea a legiljei, ma atsia iu s-multsã amãrtia, harul artirsi. 21 Ashãtsi, dupã cum domni amãrtia prit moartea, ashãtsi sh-harul va domneascã prit ndriptatea, tsi adutsi bana di totãna prit Isus Hristos, Domnul a nostru.