1 Frats sh-surãri, vrearea a inimãljei a mea sh-rugãciunea trã Dumnidzãlu easti tsi Israelitslji s-ascapã. 2 Cã mini pot s-mãrtirsescu trã elji cã au zel trã Dumnidzãlu, ma nu dupã unã cunushteari ndreaptã. 3 Cã nicunuscãnda ndriptatea al Dumnidzãu sh-cãftãnda s-bagã ndriptatea a lor, nu si sumbãgarã a ndriptatiljei al Dumnidzãu. 4 Cã bitisita a legiljei easti Hristolu, tra s-hibã ndriptatea di cathiunu cai pistipseashti.

5 Moisiu ari scriat aestã ti ndriptatea cai easti dit Legea: "Omlu cai li fatsi atseali lucri va bãneadzã prit eali." 6 Iarã ndriptatea cai yini prit pistea dzãtsi ashãtsi: S-nu dzãts tu inima a ta: "Cai va s-alinã tu tser?" (Tsi va s-dzãcã trã dipunari Hristolu), 7 icã: "Cai va dipunã tu ahãndami?"* (Va s-dzãcã, trã sculari Hristolu nsus dit mortsã). 8 Ma tsi s-dzãtsi? "Aproapi di tini easti zborlu, tu gura a ta sh-tu inima a ta" (va s-dzãcã, zborlu a pistiljei cai noi predicãm). 9 Cã, macã mãrtirseshti cu gura a ta, cã Isusul easti Domnu sh-ma s-pistipseshti cu inima a ta cã Dumnidzãlu lu nyie atsel dit mortsã, va ti ascachi. 10 Cã, cu inima omlu pistipseashti shi s-fatsi ndreptu, iarã cu gura mãrtirseashti sh-va s-ascapã. 11 Cã Scritura dzãtsi: "Caitsido tsi pistipseashti tu nãsu (Hristolu), nu va si arushineadzã." 12 Cã nu ari alidzeari namisa di Iudeilji sh-di Pãngãnjlji, cã idyiul Domnu easti Domnul a tutulor, tsi ghinicuvãnteadzã cu artirsiri tuts atselji cai lu acljeamã, 13 cã: "Caitsido tsi va acljeamã numa a Domnului, va ascapã."

14 Atumtsea, cum va s-acljeamã atsel cai nu l-pistipsirã? Sh-cum s-pistipseascã atsel tsi nu u avdzãrã? Sh-cum s-avdã macã nu easti vãrã s-lã preadicã a lor? 15 Sh-cum s-preadicã, macã nu suntu pitricuts? Ashãtsi di cum easti scriat: "Cãti mushati suntu cicioarili atsilor cai dimãndu hãbarea atsea buna!" 16 Ma nu tuts ascultarã hãbarea atsea buna, cã Isaia dzãtsi: "Doamne, cai lji pistipsi a hãbariljei a noastrã?" 17 Ashãtsi pistea yini prit avdzãrea sh-avdzãrea yini prit zborlu al Hristos.

18 Ma mini vã ntreb: Nacã nu avdzãrã!? Fãrã di altã cã avdzãrã. "Tu tutã loclu ishi boatsea a lor, sh-tu mãrdzinjili a lumiljei s-avdzãrã zboarili a lor." 19 Ma mini vã ntreb: "Nacã Israelu nu aduchi tsiva?" Protlu Moisiu dzãsi: "Mini va s-vã fac s-avets zilii trã un natsiuni cai nu easti natsiuni, trã un natsiuni cai nu poati s-aducheascã sh-va vã facã s-vã inãtusits." 20 Sh-Isaia cu curaiu dzãtsi: "Mi aflai di atselji tsi nu mi cãftarã. Mi feciu vidzut atsilor cai nu ntreab ti mini." 21 Ma cãtrã Israel dzãtsi: "Tutã dzua li am teasã mãnjili a meali cãtrã un popul tsi easti nicãndãrsit sh-rebil."