1 Tsi va s-dzãtsem ti atsea tsi aflã Abrahamul, pãrintili a nostru amintat dupã trup? 2 Cã, macã Abrahamul si ndripte prit faptili, ari cãtse si s-alavdã, ma nu nãintea a Dumnidzãlui. 3 Cã tsi dzãtsi Scritura? "Abrahamul lji pistipsi a Dumnãdzãlui sh-aestã lji si lugursi ca ndriptati."✝ 4 Atsilui, tsi lucreadzã, plata nu lji si lugurseashti ca har, ma ca datorii. 5 Iarã atsilui tsi nu lucreadzã, ma pistipseashti tu atsel cai fatsi ndreptu amãrtioslu, pistea a lui lji si lugurseashti ca ndriptati.

6 Tutashã sh-Davidul hãbãrseashti haraua a omlui a cui Dumnidzãlu lji-u lugurseashti ndriptati fãrã di fapti:

7 "Ca hara di atselji a cui si au ljirtatã amãrtiili

sh-a cui si acupirirã amãrtiili.

8 Ca hara di atsel om

tsi Dumnidzãlu pute nu va lji-u lugurseascã amãrtia!"✝

9 Atumtsea, aestã harauã easti trã anvãrliga-tãljeatslji ama sh-trã nianvãrliga-tãljeatslji? Cã noi dzãtsem: "Al Abraham pistea lji si lugursi ca ndriptati."✝ 10 Cum lji si lugursi? Cãndu eara anvãrliga-tãljeat ama cãndu eara nianvãrliga-tãljeat? Nu, cãndu eara tu anvãrliga-tãljeari, ma cãndu eara nianvãrliga-tãljeat. 11 Sh-Abrahamul lo semnul a anvãrliga-tãljeariljei ca vula a ndriptatiljei prit pistea tsi elu avu cãndu eara nianvãrliga-tãljeat. Ashãtsi elu s-hibã tatãl a tuts pistimenjilor iarã suntu tu nianvãrliga-tãljeari, tsi sh-atsilor s-lã si lugurseascã ndriptatea. 12 Elu s-featsi tatãl a anvãrliga-tãljeatslor, atsilor tsi nu mash suntu a anvãrliga-tãljeariljei, ma sh-imnã tu urmãli a pistiljei a tatãl a nostru Abraham, tsi elu avu cãndu eara tu nianvãrliga-tãljeari.

13 Cã tãxirea tsi lji si deadi al Abraham sh-a dupã-yinitorilor a lui, tra s-hibã elu mushtinitor a lumiljei, nu eara prit legea, ma prit ndriptatea cai yini prit pistea. 14 Cã macã s-facã mushtinitori atselji cai suntu a legiljei, atumtsea pistea easti digeaba sh-tãxirea s-anuleadzã. 15 Cã legea adutsi inati. Sh-atsia iu nu ari lege, nu easti nitsi ncãlcarea a legiljei. 16 Trã atsea tãxirea easti prit pistea tra s-hibã prit harul, tsi tãxirea s-hibã sigur trã tuts dupã-yinitorlji, nu mash trã atselji tsi suntu dit lege, ma sh-trã atselji tsi au pistea al Abraham, cai easti tatãl a nostru, a tutulor, 17 dupã cum easti scriatã: "Mini ti am arãdãpsitã tatãl a multor natsiuni."✝ Atsel easti tatãl a nostru nãintea al Dumnidzãu la cai elu pistipsi tsi lji fatsi yii mortsãlji sh-lji acljeamã atseali tsi nu suntu canda va s-eara. 18 Elu cu nãdii contra cathi nãdii, pistipsi si s-facã elu tatãl a multor fãri, dupã atsea tsi lji si easti dzãsã: "Ashã va hibã dupãyinitura a ta."✝ 19 Sh-cãndu nu lji si minã pistea, elu nu mutri sãnãtatea a truplui a lui, tsi tora eara ca mortu, eara aproapi unã suti di anji, sh-murirea a pãnticlui ali Sari. 20 Elu nu chiru pistea sh-nu avu shubei tu tãxirea al Dumnidzãu, ma s-nvãrtushi tu pisti dãnda mãriri al Dumnidzãu, 21 hinda didip sigur cã tsi Dumnidzãlu ari tãxitã, easti putut s-facã. 22 Trã atsea, "aestã lji si lugursi ca ndriptati."

23 Tora, nu si scrie mash trã nãsu cã "lji si lugursi," 24 ma sh-trã noi tsi va s-nã si lugurseascã ca atselji tsi pistipsescu tu atsel tsi ari nyeat Isusul, Domnul a nostru dit mortsã. 25 Elu s-prideadi a moartiljei trã amãrtiili a noastri shi si nyie trã ndriptarea a noastrã.