1 Nu shtits voi frats sh-surãri, (cã ma lã zburãscu atsilor tsi cunoscu legea), cã legea domneashti pri omlu di cãt chiro bãneadzã? 2 Cã muljearea atsea mãrtata easti ligat prit lege di bãrbatlu a ljei pãnã cãndu elu bãneadzã, ma macã bãrbatlu moari, easti dizligatã di legea a bãrbatlui. 3 Ashãtsi, macã bãrbatlu a ljei bãneadzã sh-ea s-fatsi muljearea a unui altu bãrbat, va si acljeamã curunã-cãlcatã. Ma macã bãrbatlu a ljei moari, ea easti dizligatã di legea sh-poati si s-leagã cu un altu sh-nu si acljeamã curunã-cãlcatã. 4 Ashã, frats sh-surãri a melji, vã featsit s-murits di legea prit truplu a Hristolui, tra s-hits a unui altu, atsilui tsi s-nyie dit mortsã, cu nãeti tsi s-dãm carpo trã Dumnidzãlu. 5 Cã, cãndu earam tu trup, pasiunili amãrtioasi tsi s-inimusea prit legea, lucra tu mãdularili a noastri trã dari carpolu a moartiljei. 6 Ashãtsi tora, noi nã dizligãm di legea, murinda dit atsel cai nã tsinea ligats, sh-ashã noi s-huzmitipsim tu bana atsea noauã a Duhlui sh-nu dupã veacljea literã scriatã.

7 Tsi s-dzãtsem tora? Legea easti amãrtii? Pute s-nu hibã! Di contra, amãrtia nu u cunuscui dicãt, mash prit legea. Dealihea, zilia nu va u cunushteam macã legea s-nu nji dzãtsea: "S-nu ai zilii!"✝ 8 Ma amãrtia, avãnda itii di la aestu ordin nyie tu mini tuti ziliili, cã fãrã di lege amãrtia easti moartã. 9 Vãrãoarã mini bãnam fãrã di lege, ma iarã vini ordinlu, amãrtia s-nyie di nou 10 sh-mini murii sh-ordinlu tsi s-deadi ti banã, dealihea adusi moarti trã mini. 11 Cã amãrtia, aflãnda itii prit ordinlu, mi arãsi sh-prit nãsu mi vãtãmã. 12 Ashãtsi cã, legea dealihea easti sãmtã sh-ordinlu easti sãmtu, ndreptu sh-bunu.

13 Atumtsea, atsea tsi easti bunã trã mini s-featsi moarti? Pute s-nu hibã! Ma amãrtia, tra si aspunã amãrtii adusi trã mini moartea prit buna, cu nãeti tsi amãrtia si s-fãtsea multã amãrtioasã prit ordinlu. 14 Ashãtsi noi shtim cã legea easti duhuroasã. Iarã mini escu di carni, vindut a amãrtiiljei ca sclav. 15 Cã mini nu u aduchescu atsea tsi fac. Atsea tsi voi, nu u fac, iarã atsea tsi u aurãscu, u fac. 16 Ma, macã fac atsea tsi nu voi, aspun deadun cu legea cã ea easti bunã. 17 Ma tora nu escu ma mini tsi adar atsea, ma amãrtia tsi bãneadzã tu mini. 18 Cã shtiu cã tu mini, va s-dzãcã tu truplu a meu, nu bãneadzã tsiva bunã, cã cu tutã cã voljea easti tu mini, nu pot s-adar bunlu. 19 Cã, bunlu tsi voi, nu lu fac, iarã arãulu tsi nu lu voi, atsel lu fac. 20 Tora, macã fac atsea tsi nu u voi, nu escu ma mini atsel tsi u-fac, ma amãrtia cai bãneadzã tu mini.

21 Ashãtsi, voi s-fac unã buneatsã, ma mini aflã aestã lege: tu mini easti arãulu. 22 Cã mini mi puituescu cu harauã cu legea al Dumnidzãu tu omlu di nãuntru, 23 ma ved unã altã lege tu mãdularili a meali, tsi alumtã contra a legiljei a mintiljei a mea sh-mi fatsi un hãpsãnit tu legea a amãrtiiljei, tsi easti tu mãdularili a meali. 24 Cãtã om corbu escu mini! Cai va mi ascapã di truplu a moartiljei aishtei? 25 S-hibã hãristisitã Dumnidzãlu prit Isus Hristolu, Domnul a nostru! Ashãtsi, mini idyiul, di unã parti cu minti lji huzmitipsescu a legiljei al Dumnidzãu, ma di alantã parti cu trup lji huzmitipsescu a legiljei a amãrtiiljei.