1 Trã atsea tsi s-dzãtsem? S-armãnem tu amãrtii tra si multseascã harul? 2 Pute s-nu hibã! Noi tsi murim di amãrtia, cum va bãnãm ninga cu nãsã? 3 Ma nu shtits cã tuts noi tsi nã pãtidzãm tu Hristolu Isus, nã pãtidzã tu moartea a lui? 4 Noi, nã ngrupãm deadun cu nãsu prit pãtidzarea tu moarti, tsi, ashãtsi dupã cum s-nyie Isusul dit mortsã prit mãrirea a Tatãlui, ashãtsi sh-noi s-imnãm tu unã noauã banã. 5 Cã, macã noi him mpriunats cu nãsu tu unã moarti ca a lui, sigur cã va him unã soi sh-tu nyearea a lui. 6 Noi shtim cã omlu a nostru atsel vecljiul s-crutsisi cu elu, cu nãeti tra s-anuleadzã amãrtia tu trup, tsi noi s-nu him ma sclayi a amãrtiiljei. 7 Cã atsel tsi muri easti ascãpat di fuchia a amãrtiiljei.

8 Tora macã murim deadun cu Hristolu, pistipsim cã va s-bãnãm deadun cu elu, 9 shtinda cã Hristolu, metsi s-nyie dit mortsã, nu moari ma, moartea nu u-domneashti ma. 10 Cã tu atsea tsi muri, muri trã amãrtia unã oarã sh-di totãna, ma tu atsea tsi bãneadzã, bãneadzã trã Dumnidzãlu. 11 Ashãtsi sh-voi, lugursits-vã cã di unã parti hits mortsã a amãrtiiljei, ma, di alantã parti hits yii trã Dumnidzãlu tu Hristolu Isus. 12 Trã atsea, s-nu domneascã amãrtia tu truplu a vostru muritor, tra s-vã cãndãrsits a orixilor a lui. 13 Nu aspunets mãdularili a voastri a amãrtiiljei ca hãlãtsili a nindriptatiljei, ma dats-vã a Dumnidzãlui ca yiilji dit mortsã sh-mãdularili a voastri a Dumnidzãlui ca hãlãtsili a ndriptatiljei. 14 Atumtsea amãrtia nu va vã domneascã, cã nu hits sum lege, ma sum har.

15 Atumtsea tsi? S-amãrtisim cã nu him sum lege, ma sum har? Pute s-nu hibã. 16 Nu shtits cã cãndu vã spunets a vãrui ca sclayi cãndãrsits, voi hits sclayi atsilui tsi vã cãndãrsits, icã hits sclayi a amãrtiiljei tsi ti adutsi tu moarti, ashãtsi sh-a cãndãrsiriljei tsi ti adutsi tu ndriptati? 17 Ma hãristisim Dumnidzãlu cã fut sclayi a amãrtiiljei, ma ascultat cu tutã inima nvitsãtura la cai vã pridat. 18 Voi vã liberat di amãrtia sh-vã featsit sclayi a ndriptatiljei. 19 Ma zburãscu ca om trã itia a slãbintsãljei a truplui a vostru. Cã ashã dupã cum aspusitã mãdularili a voastri ca sclayi a nichischineatsiljei sh-a anapudiiljei tsi ti adutsi tu ma multi anapudii, ashã tora aspunets-lã mãdularili a voastri ca sclayi a ndriptatiljei tsi ti dutsi tu sãmtsãri. 20 Cã, cãndu earats sclayi a amãrtiiljei, earats liberi di ndriptatea.

21 Tsi buneatsã avets atumtsea di atseali trã cai tora avets arushini? Cã bitisita a lor easti moartea. 22 Ma tora tsi vã liberat di amãrtia sh-vã featsit sclayi a Dumnidzãlui, voi avets carpolu a vostru tsi ti dutsi tu sãmtsiri sh-tu soni tu bana di totãna. 23 Cã plata a amãrtiiljei easti moartea, ma doara a harului a Dumnidzãlui easti bana eternã tu Hristolu Isus, Domnul a nostru.