1 Ma dzãc alihea tu Hristos, nu arãd, (vahi mãrtirseashti deadun cu mini conshtintsa a mea tu Duhlu Sãmtu), 2 cã mini am mari jali sh-un dureari nicurmatã tu inima a mea. 3 Cã va vream s-earam mini idyiul blãstimat, dispãrtsãt di Hristolu, trã hãtãrea a popului a meu, a farãljei a mea dupã trup, 4 cai suntu Israelits. A lor easti nhiljearea, mãrirea, pisti-ligãturili, dimãndarea a legiljei, ncljinarea tu templu sh-tãxirili, 5 di cai suntu patriarhilji sh-di la cai vini Hristolu dupã trup, atsel cai easti pristi tuti sh-Dumnidzã ghinicuvintat di totãna. Amin.

6 Ma aestã nu va s-dzãcã cã ari cãdzut nghios zborlu al Dumnidzãu, cã nu tuts atselji cai suntu di Israel suntu tamam Israelits, 7 sh-nu cã suntu dupãyinitura al Abraham, suntu tuts cilimenji a lui, di contra: "Tu Isac va s-acljeamã dupãyinitura a ta." 8 Aestã va s-dzãcã cã, nu suntu cilimenji a truplui aeshti cilimenji al Dumnidzãu, ma cilimenji a tãxiriljei cai s-lugursescu ca dupãyinitura al Abraham. 9 Cã zborlu a tãxiriljei easti aestã: "Tu chirolu aestu va yin sh-Sara va aibã un ficior." 10 Sh-nu mash aestã, ma sh-Rebeca armasi greauã di la bãrbatlu, di Isaclu pãrintili a nostru, 11 cã ninga niamintat dzeaminjlji sh-ni faptã tsiva bunã icã tsiva arãu tra s-armãnea nãetea al Dumnidzãu dupã alidzearea: 12 nu prit faptili, ma prit atsel cai vã acljeamã, lji si dzãsi a ljei: "Ma marili va lji huzmitipseascã a ma njiclui," 13 ashã di cum easti scriatã: "Iacovlu lu vrui, iarã Esaul lu aurãi."

14 Tsi s-dzãtsem? Nacã ari nindriptati la Dumnidzãlu? Pute s-nu hibã! 15 Cã elu lj-dzãtsi al Moisiu: "Va s-am njilã trã caitsido tsi s-njiluescu sh-va s-am dor, trã caitsido tsi s-aspun dor." 16 Ashãtsi cã, nu si spindzurã di vrearea a omlui sh-nitsi di atsel tsi alagã, ma si spindzurã di Dumnidzãlu cai njilueashti. 17 Cã Scritura lji dzãtsi al Faraon: "Tamam trã aestã ti anãltsai, cu nãeti tra s-aspuneam la tini putearea a mea sh-cu nãeti tsi s-dimãndã numa a mea prit tutã loclu." 18 Trã atsea Dumnidzãlu atsel tsi va, lu njilueashti, sh-atsel tsi va, lu nchitreashti.

19 Atumtsea tini va nji dzãts: "Cãtse Dumnidzãlu ninga nã fatsi cu cãbati? Cai poati s-lji ncuntreadzã a vreariljei a lui? 20 Ma cai eshti tini, lai om, tsi lj-cundreshti al Dumnidzãu? Nacã vahi va lj-dzãcã vaslu atsilui tsi lu adrã: ‘Cãtse mi adrash ashãtsi?’ " 21 Nacã nu ari puteari pucearlu pri muzgã trã fãtseari dit idyia frimintãturã un vas ti tinjii sh-alantu vas di cathi dzuã? 22 Ma tsi easti aestã macã Dumnidzãlu, vrãnda si aspunã inatea a lui shi s-facã cunuscutã putearea a lui, tsãnu cu multã arãvdari vasili a inatiljei a lui, tsi eara itimãsiti ti aspãrdzeari, 23 sh-cu nãeti s-fac cunuscut avearea a mãririljei a lui pristi vasili a njililjei tsi li itimãsi di ma nãinti ti mãriri? 24 Ashãtsi noi nã acljimã, nu mash di la Iudeilji, ma sh-di la fãrili. 25 Ashãtsi di cum dzãtsi la Hosea:

"Atselji tsi nu eara populu a meu,

va lu acljem ‘populu a meu’,

sh-atsea cai nu eara vrutã

va u acljem ‘vrutã’. "

26 Sh-va si s-facã cã, tu loclu iu lã si dzãsi a lor:

" ‘Nu hits populu a meu’,

aclo elji va si acljeamã

‘hilji al Dumnidzãu atsel yiulu’."

27 Iarã Isaia greashti ti Israelu:

"Sh-ma s-hibã numirlu a hiljilor al Israel

ca arina a amariljei,

mash armãsãturili va si ascapã,

28 cã Domnul va facã tsi zborlu a lui pri loc

si s-facã mplinã sh-trãoarã."

29 Sh-ashã cum ari pridzãsã Isaia:

"Macã Domnul Tutãputut

s-nu nã alãsa dupãyinitura,

ca Sodom va earam faptã

sh-ca Gomora va undzeam."

30 Tsi s-dzãtsem atumtsea? Cã pãngãnjlji cai nu urmeadzã ndriptatea, u agiumsirã ndriptatea, meti ndriptatea tsi easti dit pistea, 31 iarã Israelu urmãnda legea a ndriptatiljei, nu u agiumsi. 32 Cãtse? Cã nu cãftarã s-u agiundzea prit pisti, ma di cum s-eara prit faptili. Elji s-nchidicarã di cheatra a nchidicariljei, 33 ashãtsi di cum easti scriatã: "Ia, ma bagã tu Sion unã cheatrã di nchidicari sh-un shcãmbã trã cãdeari, sh-atsel tsi pistipseashti la nãsu nu va si arushineadzã."