1 Cathi om s-hibã sumbãgat la autoritãtsili di chivernisi, cã nu ari autoritati dicãt mash di la Dumnidzãlu, sh-atseali tsi suntu di la Dumnidzãlu suntu arãdãpsiti. 2 Trã atsea atsel tsi ncuntreadzã autoritãtsili, ncuntreadzã ordinli a Dumnidzãlui, sh-atselji tsi s-ncuntreadzã va ljea pri nãshi condamna. 3 Cã domnjilji nu ai cãtse s-lji ai fricã trã fapti buni, ma trã fapti arali. Vrei s-nu ai fricã di autoritatea? Fã ghini sh-va s-ai alãvdari di la ea. 4 Ea easti huzmichearã al Dumnidzãu trã ghinea a ta, ghini ma, ma s-fatsã arãu, aspari-ti cã ea nu u-tsãni vãnat spata. Chivernisea easti huzmichear al Dumnidzãu, arãzgãnãtor tsi adutsi condamã cãtrã atsel tsi fatsi arãu. 5 Trã atsea, easti di ananghi s-vã sumbãgats, nu mash trã itia a condamnariljei, ma sh-trã itia a conshtintsãljei.

6 Cã, di aestã voi plãtits sh-taxili, cã autoritãtsili suntu huzmicheari al Dumnidzãu fãcãnda dipriunã aestã huzmitipsiri. 7 Dats-lã a tutulor atsea tsi lã hriuisits: atsilui tsi lji hriusits taxa, taxa, atsilui tsi lji hriusits vamã, vamã, atsilui tsi lji hriusits frica, frica, atsilui tsi lji hriusits tinjia, tinjia.

8 A vãrui s-nu lji avets mprumut, di cãt s-vã vrets cu un-alantu, cã atsel tsi va alantu, u-ari mplinit legea. 9 Cã dimãndãciunjili: "S-nu caltsã curuna, s-nu vatsãnji, s-nu furii, s-nu ai zilii," sh-macã ari vãrã altã ordin, s-dzãtsi cu un zbor: "S-vrei aproapilu a tãu ashãtsi di cum ti vrei tini!" 10 Vrearea nu lji fatsi arãu a aproapilui, trã atsea mplinirea a legiljei easti vrearea.

11 Sh-aestã fãtsets-u shtinda chirolu, cã tora easti oara s-vã dishtiptats dit somnu, cã tora ascãparea a noastrã easti ma aproapi dicãt atumtsea cãndu pistipsim. 12 Noaptea s-dusi sh-dzua s-apruche. S-arcãm nclo faptili a scutidlui shi s-nvishtem armili a lunjinãljei. 13 S-imnãm cu tinjii ca tu chirolu a dzuãljei, nu tu chehi sh-tu mbitãri, nu tu putãnlichi sh-tu disfãrnari, nu tu ngrãnji sh-tu nchizmã. 14 Ashãtsi nvishtets-vã tu Domnul Isus Hristos sh-nu vã bãgats tu mirachi ti truplu tra s-lji mplinits orixili.