1 Trã atsea, ma vã urnipsescu, frats sh-surãri, prit njila a Dumnidzãlui, tra s-pãrãstãsits trupurili a voastri ca curbani yii, sãmtsã, arsitã di Dumnidzãlu tsi easti huzmitipsirea a voastrã mintimenã. 2 Sh-nu vã uidisits cu aestã lumi, ma alãxits-vã prit rinoirea a mintiljei, tra s-cunushtets cai easti voljea atsea buna, arsitã sh-perfectã al Dumnidzãu.

3 Cã prit harul tsi nji si deadi, lji dzãc a cathiunui cai easti ntrã voi tsi s-nu aibã minduiri ma analtã dicãt prindi trã nãsu, ma s-mindueascã cã cum s-hibã misurat, ashã di cum Dumnidzãlu lji deadi a cathiunui misura a pistiljei. 4 Cã, dupã cum tu un trup avem multi mãdulari, ma nu au tuti idyiul lucru, 5 ashãtsi sh-noi multsãlji him un trup tu Hristolu sh-cathiunu him mãdulari tu un-alantu. 6 Noi avem doari soi di soi, dupã harul tsi nã si deadi. Atsel tsi ari prufitsia, s-prufitipseascã dupã misurã a pistiljei tsi ari. 7 Atsel tsi ari diaconia, s-huzmitipseascã, atsel tsi ari nvitsãtura s-nveatsã, 8 atsel tsi da curaiu, s-hibã trã dari curaiu, atsel tsi duruseashti, s-duruseascã cu inimã discljisã, atsel tsi cumãndãseashti, s-cumãndãseascã cu zel, atsel tsi fatsi lucri di njilã si l-facã cu harauã.

9 Vrearea s-hibã fãrã ipucrizii. Aurãts arãulu sh-alãchits-vã dinãpoi a ghiniljei. 10 S-hits vruts cu un-alantu cu vreari frãtseascã, tinjisits-lu alantu ma multu di cãt ti tinjiseshti tini. 11 S-nu hits timbelji tu zel, s-hits nfocats tu duh sh-huzmitipsits a Domnului. 12 Hãrsits-vã tu nãdii, arãvdats tu munduiri, s-hits ipiminisits tu rugãciunji. 13 Agiutats tu ananghili a oaminjlor a Dumnidzãlui, urmats ghini-ashtiptarea.

14 Ghinicuvintats atselji tsi vã priaĝunescu, ghinicuvintats sh-nu blãstimats! 15 Hãrsits-vã cu atselji tsi hãrsescu, sh-plãndzets cu atselji tsi plãngu. 16 Minduits idyiul lucru trã un-alantu, s-nu vã creascã mintea ma sotsãsits-vã cu aplicatslji. Nu vã lugursits ca mintimenji. 17 Nu lji turnats a vãrui arãulu cu arãu, aspunets cãshtiga trã tsi easti ghini nãintea a oaminjlor tuts. 18 Macã easti putut, trã tsi easti spindzurat di voi, bãnats tu pace cu caitsido. 19 Nu vã arãzbunats vruts, ma dats loc a inatiljei a Dumnidzãlui, cã easti scriatã: "A mea easti arãzbunarea, mini va arãsplãtescu," dzãtsi Domnul. 20 Trã atsea ma ghini:

"Macã ari foami dushmanlu a tãu,

dã-lji s-mãcã,

macã ari seati,

dã-lji s-bea,

cã fãcãnda aestã,

va adunji cãrbunji di foc pri caplu a lui."

21 Nu ti azvindzi di arãulu, ma nichisea pristi arãulu cu buna.