1 Atumtsea vidzui un altu anghil puternic dipunãnda dit tser. Elu eara anvãrtit cu un nior sh-curcubeulu eara pri caplu a lui, fatsa a lui eara ca soarili sh-cicioarili a lui ca coloani di foc. 2 Elu tsãnea tu mãna a lui unã carti njicã discljisã sh-ciciorlu a lui atsel ndreptul l-bãgã pri amari sh-atsel stãngul l-bãgã pri loc. 3 Deapoea elu aurlã cu boatsi analtã cum aurlã un ljundar. Cãndu elu aurlã, di shapti bumbunidzãrili asunarã cu vãzirea a lor. 4 Cãndu asunarã atseali shapti bumbunidzãrili earam etimu trã scriari, ma avdzãi unã boatsi dit tser cai nji dzãsi: "Vulusea-li atseali tsi tsã dzãsirã atseali shapti bumbunidzãri shi s-nu li scrii." 5 Atumtsea anghilu tsi mini lu vidzui stãnda pri amari sh-pri loc, sculã mãna a lui atsea ndreapta cãtrã tser✝ 6 shi si spigiurã trã atsel cai bãneadzã tu eta a etilor, cai adrã tserlu sh-atseali tsi bãneadzã tu nãsu, loclu sh-atseali tsi bãneadzã tu nãsu, amarea sh-atseali tsi suntu tu nãsã, sh-dzãsi: "Nu va aibã ma amãnari, 7 ma tu dzãlili a asunariljei a shaptilui anghil, cãndu va s-asunã trumpeta, atumtsea va si mplineascã mistiryiul al Dumnidzãu, ashãtsi di cum elu lã hãbãrsi a huzmichearilor a lui, a prufitsilor." 8 Boatsea tsi avdzãi dit tser grãi nãpoi cu mini sh-nji dzãsi: "Imnã, ljea cartea atsea discljisa dit mãna a anghilui cai sta pri amari sh-pri loc." 9 Mini mi dush la anghilu dzãcãnda a lui s-nji dãdea cartea atsea njica. Elu nji dzãsi: "Ljea-u sh-ascapitu sh-ea va ts-amãreascã pãnticlu, iarã tu gura a ta atsea va hibã dultsi ca nyearea."✝ 10 Mini u loai cartea atsea njica dit mãna a anghilui, u ascãpitai sh-gura a mea eara dultsi ca njeari, ma cãndu u mãcai, pãnticlu a meu nji si featsi amari. 11 Atumtsea nji dzãsi: "Tini prindi s-prufitipseshti dinou trã multsi populjilji, fãri, limbi sh-amiradzi."✝