1 Deapoea vidzui un tser nou sh-un loc nou. Tserlu di prota sh-loclu di prota s-dusirã sh-amarea nu easti ma. 2 Deapoea vidzui Cãsãbãlu atsel Sãmtu, Ierusalemlu atsel noulu dipunãnda dit tser, di la Dumnidzãlu sh-eara azãrãsitã ca nveastã stulisit trã dzinirli a ljei. 3 Atumtsea avdzãi unã boatsi analtã dit thron cai dzãtsea: "Ia, tenda a Dumnidzãlui easti cu oaminjlji! Sh-elu va s-bãneadzã cu nãshi sh-elji va hibã populu a lui. Idyiul Dumnidzãlu va s-hibã deadun cu elji. 4 Dumnidzãlu va ashteargã cathi lacrimã dit ocljilji a lor, sh-moartea nu va hibã ma, nitsi jali, nitsi vãitari, nitsi dureari nu va aibã ma, cã atseali di prota tricurã."

5 Atsel tsi shidea pri thron dzãsi: "Ia, mini ma li fac tuti noauã." Deapoea nj-dzãsi: "Scrii, cã aesti zboari suntu pistipsiti sh-alihioasi." 6 Sh-nji dzãsi: "S-featsi! Mini escu Alfa sh-Omega, Apãrnjita sh-Bitisita! Mini va-lji dau ca doarã atsilui tsi ari seati dit izvurlu a apãljei a banãljei. 7 Cai amintã, va li mushtineadzã tuti aesti. Mini va lji hiu a lui Dumnidzãu sh-elu va ni hibã a njia hiljiu. 8 Iarã fricoshilji sh-nipistimenjlji, aĝnoshilji sh-vãtãmãtorlji, putãnjsitorlji sh-mãghipsitorilji, iduljitorlji sh-tuts arãditorilji va aibã partea a lor tu laclu tsi s-ardi cu foc sh-cu schifurã, cai easti moartea a doaua."

9 Deapoea vini un di shapti anghilji, cai avea shapti cupãli mplini cu shapti pledzili dit soni shi zburã cu mini dzãcãnda: "Haidi, va tsã spun nveasta, muljearea a Njelui." 10 Atumtsea mi dusi cu Duhlu pri un munti mari sh-analtu, shi nj-aspusi Cãsãbãlu atsel Sãmtu, Ierusalemlu, tsi dipuna dit tser di la Dumnidzãlu, 11 avãnda mãrirea a Dumnidzãlui. Strãlutsirea a lui undzea ca unã cheatrã multã scumpã, ca cheatrã di iaspi, ca cristalu curat. 12 Cãsãbãlu avea un mur mari sh-analtu cai avea doauãsprãdzatsi di portsã sh-pri portsã doisprãdzatsi di anghilji sh-pri nãshi numi scriati, tsi eara numili atsilor doisprãdzatsi di soi a hiljilor al Israel. 13 Cãtrã rãsãrit avea trei portsã, cãtrã nord avea trei portsã, cãtrã sud avea trei portsã, cãtrã ascãpitatã avea trei portsã. 14 Murlu a cãsãbãlui avea doisprãdzatsi di thimelji sh-pri thimelji numili atsilor doisprãdzatsi apostulji a Njelui.

15 Anghilu cai zbura cu mini avea un cãlami di furii ti misurari cãsãbãlu, portsãli a lui sh-murlu a lui. 16 Cãsãbãlu avea forma a unui pãtrat sh-lundzimea a lui eara cãtã lãrdzimea. Elu misurã cãsãbãlu cu cãlamlu sh-eara doisprãdzatsi di njilji di stadi.* Lundzimea, lãrdzimea sh-anãltsimea a lui eara unã soi. 17 Misurã sh-murlu a lui sh-eara unã sutã patrudzãtsi sh-patru di cots, cu misurarea umineascã, tsi easti sh-misura a anghilui. 18 Adãrãmintul a murlui a lui eara di iaspi, sh-cãsãbãlu eara di furii curatã, unã soi ca chelchi curatã. 19 Timeljiu la murlu a cãsãbãlui eara stulisiti cu multi soi di chetri scumpi. Protlu timeljiu eara di iaspi, a doilu di safir, a treilu di calcedonu, a patrulu eara di smeraldu, 20 a tsintsilu di sardonix, a shasilu di sard, a shaptilu di crisolit, a optulu di beril, a noaulu di topaz, a dzatsilu di hrizopraz, a unsprãdzatsilu di iachintu, a doisprãdzatsilu di ametistu. 21 Doauãsprãdzatsili di portsã eara doauãsprãdzatsi di mãrgãritãri, cathi poartã eara di un mãrgãritar singur, sh-pada a cãsãbãlui eara di furii curatã, ca chelchi transparentã. 22 Sh-nu vidzui nitsiun templu tu cãsãbã, cã Domnul Dumnidzã atsel Tutãpututlu easti templu a lui di cum easti sh-Njelu. 23 Cãsãbãlu nu ari ananghi di soari, nitsi di lunã tsi s-lunjineadzã tu nãsu, cã mãrirea a Dumnidzãlui lunjineadzi trã nãsu sh-lamba a lui easti Njelu. 24 Natsiunili va s-imnã tu lunjina a lui sh-amiradzlji a loclui va aducã mãrirea a lor la nãsu. 25 Portsãli a lui nu va si s-ncljidã pute dzua, cã aclo nu va aibã vãrãoarã noapti. 26 Aclo tu cãsãbã va si s-aducã mãrirea sh-tinjia a fãrilor. 27 Tu cãsãbã nu va intrã tsiva pãnĝãnit sh-vãrã tsi s-pãnĝãneashti sh-arãdi, ma mash atselji tsi suntu scriats tu cartea a bãnãljei a Njelui.