1 Deapoea avdzãi unã boatsi analtã dit templu cai dzãtsea atsilor shapti anghilji: "Njidzets sh-virsats pri loc atseali shapti cupili a inatiljei al Dumnidzãu!" 2 S-dusi protlu, u-virsã cupa a lui pri loc. Atumtsea unã pleagã urutã sh-durutã lã acãtsã tuts oaminjlji tsi avea semnul a agrimiljei shi si ncljina la icoana a ljei.

3 A doilu anghil u-virsã cupa a lui tu amari sh-amarea s-prifeatsi ca sãndzili a unui om mortu sh-cathi fãpturã dit amari supsi.

4 A treilu anghil u-virsã cupa a lui tu arãuri sh-tu izvurili a apilor sh-eali s-prifeatsirã sãndzi. 5 Sh-avdzãi anghilu a apilor dzãcãnda:

"Tini eshti ndreptu, Doamne, tsi eshti sh-tsi earai,

atsel Sãmtul tsi giudicash aesti lucri.

6 Cã elji virsarã sãndzili a sãmtsãlor sh-a prufitsilor,

sh-tini lã dãdeshi a lor s-bea sãndzi, cã u axizescu."

7 Deapoea avdzãi unã boatsi dit altar dzãcãnda:

"Ie, Doamne, Dumnidzale Tutãputute,

alihioasi sh-ndreapti suntu giudicãtsili a tali."

8 A patrul anghil u virsã cupa a lui pristi soarili sh-a soarilui lji si deadi s-dugurea oaminjlji pri foc. 9 Sh-oaminjlji s-dugurirã di pira atsea marea sh-blãstimarã numa al Dumnidzãu, atsilui tsi ari puteari pri aesti pledzi sh-elji nu s-mitãnjiusirã trã dari a lui mãriri.

10 A tsintsul anghil u virsã cupa a lui pristi thronlu a agrimiljei sh-amirãriljea a ljei s-featsi scutidi, sh-oaminjlji mushca limbili a lor di durearea. 11 Elji blãstimarã Dumnidzãlu a tserlui trã itia a durerilor sh-a pledzilor a lor, ma nu s-mitãnjiusirã trã faptili a lor.

12 A shasilu anghil u virsã cupa a lui tu arãulu atsel marili Eufrat sh-apili a lui si astrãchirã tra si etimãseascã calea a amiradzlor tsi yin di arãsãrita a soarilui. 13 Deapoea vidzui s-ishea dit gura a lamnjiljei, dit gura a agrimiljei sh-dit gura a prufitlui arãdios trei duhuri nicurati ca broashti. 14 Atseali suntu duhuri di demonji tsi fac seamni, tsi easã cãtrã amiradzlji a lumiljei ntreagã, tra s-lji adunã trã alumtari tu dzua atsea marea a Dumnidzãlui a Tutãpututul.

15 "Ia, ma yin ca fur! Ca hara di atsel tsi sta dishtiptat

sh tsãni nviscut stranjili a lui,

tra s-nu imnã dispuljeat

shi si s-veadã arushinea a lui."

16 Sh-duhurili lji adunarã amiradzlji tu loclu tsi pi uvreieshti s-acljeamã "Armaghedon".

17 A shaptilu anghilu virsã cupa a lui tu vimtu sh-unã boatsi analtã ishi dit templu, dit thron sh-dzãsi: "S-bitisi." 18 Atumtsea s-featsirã sfulguri, aurlãri sh-bumbunidzãri shi s-featsi un cutrembur mari. Ahtar cutrembur nu fu faptã vãrã oarã di cãndu s-featsi omlu pristi loc. Ahãt cutrembur mari eara. 19 Cãsãbãlu atsel marli s-dispãrtsã tu trei pãrtsi sh-cãsãbadzli a natsiunilor cãdzurã. Dumnidzãlu adusi aminti Babilonlu atsel marili, tra s-lji u-da a lui cupa a yinlui a mariljei inati a lui. 20 Tuti insulili chirurã, sh-muntsãlji nu s-aflarã ma. 21 Dit tser apãrnji s-cãdea pri oaminjlji unã grãndinã mari sh-greauã di tsindzãtsi di chiladz. Oaminjlji blãstima Dumnidzãlu trã pleaga a grãndinãljei, cã pleaga a lui eara multu di multu mari.