1 Deapoea dupã aesti avdzãi ca unã boatsi analtã di unã multsãmi mari tu tser dzãcãnda:

"Aleluia!

Ascãparea sh-mãrirea sh-putearea

suntu a Dumnidzãlui a nostru!

2 Cã alihioasi sh-ndreapti suntu giudicãtsili a lui!

Elu u giudicã putana atsea marea,

cai asparsi loclu cu putãnsirea a ljei,

shi s-ari arãzgãnatã trã sãndzili a huzmichearilor a lui,

virsat di mãna a ljei."

3 Sh-di a doaua oarã dzãsirã: "Aleluia! Sh-fumlu a cãsãbãlui s-alinã tu eta a etilor." 4 Atumtsea di patrusprãyinghits aushlji sh-patru fãpturili cãdzurã pri dintsã shi si ncljinarã a Dumnidzãlui cai eara apunat pri thron, dzãcãnda: "Amin, Aleluia!"

5 Atumtsea dit thron ishi unã boatsi, dzãcãnda:

"Alãvdats Dumnidzãlu a nostru,

tuts voi huzmichearlji a lui,

sh-voi tsi avets fricã,

njitsi sh-mãri."

6 Deapoea avdzãi unã boatsi ca di unã multsãmi mari, ca vãzirea a apilor sh-ca boatsi di mãri bumbunidzãri tsi dzãtsea:

"Aleluia!

Cã amirãri Domnul,

Dumnidzãlu a nostru atsel Tutãpututul!

7 S-nã hãrsim, si sãrbãtorim

shi s-lji u-dãm mãrirea a lui,

cã vini numta a Njelui

sh-nveasta a lui si ndreapsi!

8 Lji si deadi a ljei si nveascã

cu pãndzã di ljin lunjinatã sh-chischin."

(Cã pãndza di ljin spuni trã faptili atseali ndreapti a popului a Dumnidzãlui).

9 Deapoea anghilu nji dzãsi: "Scrii: Ca hara di atselji tsi suntu acljimats pi uspetsi la numta a Njelui." Sh-adãvgã: "Aesti suntu zboarili alihioasi a Dumnidzãlui." 10 Atumtsea mini cãdzui pri dintsã nãintea a cicioarilor a lui tra s-mi ncljinu, iarã elu nji dzãsi: "Vedz s-nu u fats, mini escu huzmichear deadun cu tini sh-cu fratslji a tãlji, tsi au mãrtiria al Isus. La Dumnidzãlu s-ti ncljinji! Cã mãrtiria a Isusului easti duhlu a prufitsiiljei."

11 Deapoea vidzui tserlu discljis, sh-ia, un cal albu, sh-cãvãlarlu tsi eara pri nãsu tsi s-acljima Pistimen sh-Alihios. Elu giudicã sh-alumtã cu ndriptati. 12 Ocljilji a lui eara ca fleaca a foclui sh-pri caplu a lui avea multi curunji. Aclo avea scriatã unã numã, cai nu u shtia vãrã altu dicãt mash elu. 13 Eara nviscut cu stranji aumti tu sãndzi sh-numa a lui eara "Zborlu a Dumnidzãlui". 14 Armata a tserlui lu urma ncãlicat pri calji alghi, nviscuts cu pãndzã di ljin albã sh-chischin. 15 Dit gura a lui ishea unã spatã struxitã cu cai s-agudea natsiunili. Elu va lji picurãreascã cu bãstun di her sh-va calcã voza a yinlui a turbariljei al Dumnidzãu Tutãpututul. 16 Pri stranji sh-pri coapsa a lui avea scriatã unã numã:

Amirãlu a Amiradzlor sh-Domnul a Domnjilor.

17 Deapoea vidzui un anghil tsi stãtea tu soari sh-aurlã cu boatsi analtã, dzãcãnda a tuts puljilor, tsi azbuira tu mesea a tserlui:

"Haidets, adunats-vã tu tsina atsea marea a Dumnidzãlui,

18 tra s-mãcats carni di amiradzi,

di comandantsi, di oaminji vãrtoshi,

carni di calji sh-di cãvãlari

sh-di carnea a tuts oaminjlor,

atsilor liberi sh-atsilor sclayi,

a njitsilor sh-a mãrlor."

19 Atumtsea vidzui agrimea sh-amiradzlji a loclui cu armatili a lor adunati tra s-fãtsea alumtã cu atsel tsi cãlãrea pri cal sh-cu armata a lui. 20 Ma agrimea s-acãtsã sh-deadun cu nãsã sh-prufitlu arãdios, atsel tsi nãintea a ljei featsi seamnili, cu cai s-arãsirã atselji tsi loarã vula a agrimiljei sh-atselji tsi si ncljinarã la icoana a ljei. Di doilji s-arcarã yii tu laclu a foclui tsi s-ardi cu schifurã. 21 Alantsãlji s-vãtãmarã di spata tsi ishea dit gura atsilui cai eara pri cal, sh-tuts puljilji s-fãnãtirã cu carna a lor.