1 "A anghilui a bisearicãljei tu Sarda scrii-lji: Aestã dzãtsi atsel tsi tsãni di shapti duhurili a Dumnidzãlui shi shapti stealili. Mini li shtiu faptili a tali, tini ai numa cã bãnedz, ma eshti mortu. 2 Dishteaptã-ti! Nvãrtushea atseali tsi au armasã, tsi suntu etinji trã muriri, cã nu li am aflatã faptili a tali mpliniti nãintea a Dumnidzãlui a meu. 3 Adu aminti, tsi loash sh-tsi avdzãsh, veaglji-li sh-mitãnjiuseati. Trã atsea, macã nu va stai dishtiptat, va yin ca fur sh-tini nu va ljeai di hãbari cã pi tsi oarã va yin.✝ 4 Ma, ai niscãnti numi tu Sarda tsi nu li pãnĝãnirã stranjili a lor sh-elji va imnã cu mini nviscuts cu stranji albi, cã suntu axii. 5 Atsel tsi nichiseashti va si s-nveascã cu stranji albi sh-mini nu va u-ashtergu numa a lui di cartea a banãljei, ma va s-mãrtirsescu numa a lui nãintea a Tatãl a meu sh-nãintea a anghilor a lui.✝ 6 Cai ari ureclji, s-avdã atsea tsi Duhlu lã dzãtsi a biseritslor."

7 "A anghilui a bisearicãljei tu Filadelfia scrii-lji: Aestã dzãtsi Sãmtul, Alihioslu, atsel tsi ari cljeaia al David, atsel tsi discljidi sh-vãrã nu ncljidi, sh-atsel tsi ncljidi sh-vãrã nu discljidi.✝ 8 Mini li shtiu faptili a tali. Ia, alãsai nãintea a ta unã ushi discljisã sh-vãrã nu poati si u-ncljidã, cã tini ai putsãnã fuchii sh-u vigljeash zborlu a meu sh-nu u-ai alipidat numa a mea.✝ 9 Ia, mini va lji dau niscãntsã di sinagoga al Satan, tsi dzãc cã suntu Iudei sh-nu suntu, ma arãd. Mini va facã tsi s-yin shi si s-apleacã la cicioarili a tali shi s-ljea di hãbari cã mini ti vrui. 10 Metsi tini vigljeash zborlu s-aravdzã, sh-mini va ti veglji tini di oara a provãljei, tsi va yin pristi tutã lumea, tra s-lã bagã tu provã locuitorlji a loclui. 11 Mini ma yinã troarã! Tsãnã-ti la atsea tsi ai, tsi nitsiunã s-nu su ljea curuna a ta. 12 Atsel tsi nichiseashti va s-lu fac unã coloanã tu templul a Dumnidzãlui a meu sh-pute atselji nu va s-dispartã di aclo. Mini va scriu pri nãsu numa a Dumnidzãlui a meu sh-numa a cãsãbãlui al Dumnidzãu a meu, noulu Ierusalem, tsi va s-dipunã dit tser di la Dumnidzãlu a meu, sh-mini va u-scriu pristi atsel numa a mea atsea noauã.✝ 13 Cai ari ureclji, s-avdã atsea tsi Duhlu lã dzãtsi a biseritslor."

14 "A anghilui a bisearicãljei tu Laoditsea scrii-lji: Aesti dzãtsi Aminu, Martirlu pistimen sh alihios, Atsel tsi apãrnji adrarea al Dumnidzãu. 15 Mini li shtiu faptili a tali, tsi tini nu eshti nitsi arcuros nitsi hertu. Canda s-earai arcuros icã hertu! 16 Ashãtsi, metsi eshti cãlduros sh-nu eshti nitsi arcuros sh-nitsi hertu, va s-vom dit gura a mea. 17 Tini dzãtsi: ‘Escu avut sh-escu avutsit sh-nu am ananghi di tsiva.’ Ma nu shtii cã eshti curbisit, mãrat, oarfãn, orbu sh-dispuljeat.✝ 18 Ti urnipsescu tsi s-acumpãri di la mini furii chischinatã tu foc tra s-ti avutseshti, shi stranji albi s-ti nveshti tra s-nu si s-veadã arushinea a guleatsãljei a ta. S-acumpãri sh-melhem tsi s-aundzã ocljilji a tãlji tra s-vedz. 19 Mini tuts atselji tsi li voi lji vãrghescu sh-lji disiplinescu. Trã atsea, aspun zel✝ sh-mitãnjiuseati! 20 Ia, mini stau la ushi sh-asunã. Macã vãrã ascultã boatsea a mea sh-discljidi usha, va intru nãuntru, va mãcã tsinã cu nãsu sh-elu cu mini. 21 Atsilui tsi nichiseashti, va lj-dau si s-apunã cu mini tu thronlu a meu, ashãtsi di cum sh-mini nichisii shi shidzui cu Tatãl a meu tu thronlu a lui. 22 Cai ari ureclji, s-avdã atsea tsi Duhlu lã dzãtsi a biseritslor."