1 Deapoea vini un di shapti anghilji, tsi avea di shapti cupãli, zburã cu mini sh-nji dzãsi: "Haidi, va tsã spun giudicata a putanãljei atsiljei mari, tsi sheadi ningã apãli atseali multi. 2 Cu ea putãnsirã amiradzlji a loclui sh-cu yinlu a putãnsiriljei a ljei si mbitarã bãnãtorlji a loclui." 3 Sh-elu mi dusi tu irnjii arãchit di Duhlu. Aclo vidzui unã muljeari tsi shidea apunat pristi unã agrimi aroshi-fleacã, mplini cu numi di blãsteami sh-avea shapti capiti sh-dzatsi coarni. 4 Muljearea eara nviscut cu purpuri sh-cu aroshi-fleacã, stulisit cu furii, cu chetri scumpi sh-cu mãrgãritãri. Tu mãnã avea unã cupã di furii mplinã cu lãvushituri sh-cu pãngãniturili a putãnsiriljei a ljei. 5 Pri frãmtea a ljei eara scriatã unã numã, un mistiryiu: "Babilonlu atsel marili, muma a putãnilor shi a lãvushiturilor a loclui." 6 Deapoea vidzui muljearea mbitatã di sãndzili a sãmtsãlor sh-di sãndzili a martirilor al Isus.

Cãndu u vidzui ea, mi ciudisii multã. 7 Atumtsea anghilu nji dzãsi: "Trã tse ti ciudiseshti? Mini va tsã spun mistiryiul a muljeariljei sh-a agrimiljei tsi u tsãni ea, atsiljei cai ari shapti capiti sh-dzatsi coarni. 8 Agrimea, tsi u-vidzushi, eara, ma nu easti ma, va si s-alinã dit Ahãndamea, shi va s-ducã tu chireari. Bãnãtorlji a loclui, a cãror numi nu suntu scriati tu cartea a banãljei di la timiljearea a lumiljei, va s-ciudiseascã anda va s-veadã agrimea, tsi eara sh-nu easti ma, cu tutã cã va yin. 9 Atselji tsi au frunimeatsã, u achicãseascã. Shapti capitli suntu shapti muntsã, iu sheadi muljearea pri nãshi, shi suntu shapti amiradzi. 10 Tsintsi di nãshi au cãdzutã, un easti sh-alantu nu ari vinitã ninga, ma cãndu s-yinã di putsãnã chiro va sta. 11 Agrimea, tsi eara sh-nu easti ma tora, easti sh-ea tu a optul amirã, easti di atselji shapti, ma sh-ea s-dutsi cãtrã chireari.

12 Dzatsi coarnili tsi vidzushi suntu dzatsi amiradzi, tsi nu au loatã ninga amirãriljea, ma va s-ljea puteari ca amiradzi trã unã oarã deadun cu agrimea. 13 Aeshti au unã singur nãeti sh-fuchia sh-putearea a lor lji-u da a agrimiljei. 14 Aeshti va s-alumtã cu Njelu, ma Njelu va lji azvingu, cã elu easti Domnul a domnjilor sh-Amirã a amiradzlor sh-atselji tsi suntu cu nãsu suntu acljimats aleptsã sh-pistimenji."

15 Deapoea anghilu nji dzãsi a njia: "Apili tsi vidzushi, iu sheadi apunatã putana, suntu populjilji, multsãnji, fãri sh-limbi. 16 Dzatsi coarnili tsi vidzushi sh-agrimea, aeshti va u-aurascã putana, sh-va u alasã shcretã sh-dispuljeat. Va s-mãcã carnea a ljei sh-va u ardã n-foc. 17 Cã Dumnidzãlu bãgã tu ininjli a lor s-facã nãetea a lui shi apofãsi s-lji da amirãriljea a lor a agrimiljei, pãnã cãndu si mplineascã zboarili a Dumnidzãlui. 18 Sh-muljearea tsi vidzushi, easti cãsãbãlu atsel marli, atsel tsi ari domnilji pristi amiradzlji a loclui."