1 "A anghilui a bisearicãljei tu Efes scrii-lji: Aesti dzãtsi atsel tsi tsãni di shapti stealili tu nandreapta a lui sh-atsel tsi imnã tu mesea di shapti shindãnji di furii. 2 Mini li shtiu faptili a tali, copuslu a tãu sh-arãvdarea a ta. Shtiu cã tini nu pots s-lji aravdzã arãlji sh-lji bãgash tu provã atselji cai dzãc cã suntu apostulji, ma nu suntu sh-tini lji aflash arãdioshi. 3 Tini arãvdash sh-ai arãvdat munduirili trã hãtãrea a numãljei a mea sh-nu ti curmash.

4 Ma am un tsiva contra tini, cã u-alãsash vrearea a ta di prota. 5 Trã atsea, adu-aminti cã, di iu cãdzushi nghios, mitãnjiuseati sh-fã faptili di ma nãinti. Macã nu ti mitãnjiuseshti, va yin trãoarã la tini sh-va-u mutã shindanea a ta di loc. 6 Ma tini ai aestã bunã, cã aurãshti faptili a Nicolaitsilor, tsi li aurãscu sh-mini. 7 Cai ari ureclji, s-avdã atsea tsi Duhlu lã dzãtsi a biseritslor. Atsilui tsi nichiseashti va lji dau s-mãcã di pomlu a banãljei, tsi easti tu paradislu a Dumnidzãlui."

8 "A anghilui a bisearicãljei tu Smirna scrii-lji: Aestã dzãtsi atsel di prota sh-atsel di soni, tsi fu mortu shi s-turnã tu banã. 9 Mini shtiu munduirea a ta sh-urfanjea a ta, ma tini eshti avut. Shtiu sh-blãsteamili atsilor tsi dzãc cã suntu Iudei, ma nu suntu, di contra elji suntu unã sinagogã a Satanlui. 10 Nu ti aspari dip di atsea tsi va ti mundueshti. Ia, draclu va arucã niscãntsã di voi tu hapsi tra s-vã bagã tu provã sh-voi va avets munduiri di dzatsi dzãli. S-hii pistimen pãnã la moarti sh-va tsã dau curuna a banãljei. 11 Cai ari ureclji, s-avdã atsea tsi Duhlu lã dzãtsi a biseritslor. Cai nichiseashti nu va si s-pligueascã dip di a doaua moarti."

12 "A anghilui a bisearicãljei tu Pergam scrii-lji: Aestã dzãtsi atsel tsi ari spata struxitã cu doauã tãljituri. 13 Mini shtiu iu bãnedz, aclo iu easti thronlu al Satan. Ma tini tsãnji ghini numa a mea sh-nu u-ai alipidat pistea la mini sh-tu dzãlili cãndu Antipa, martirlu a meu pistimen, s-vãtãmã la voi, aclo iu bãneadzã Satanlu. 14 Ma am niscãnti lucri contra tini: Ai atsia niscãntsã tsi tsãn nvitsãtura al Balaam, cai u-nvitsã Balacul s-bagã ncheadic nãintea a hiljilor al Israel tra s-mãcã curbãnsita a idoljilor shi sã s-da tu curvãrii. 15 Ashã tini ai sh-niscãntsã tsi tsãn nvitsãturili a Nicolaitsilor. 16 Mitãnjiusea-ti cã aljumtrea va yin curundu la tini sh-va mi-alumtã cu elji cu spata a gurãljei a mea. 17 Cai ari ureclji, s-avdã atsea tsi Duhlu lã dzãtsi a biseritslor. Atsilui tsi nichiseashti va lji dau s-mãcã di mana atsea ascumta sh-va lji dau unã chitricã albã sh-pristi nãsã easti scriatã unã numã noauã, tsi nu u shti vãrã dicãt mash atsel tsi u ljea."

18 "A anghilui a bisearicãljei tu Tiatira scrii-lji: Aestã dzãtsi Hiljilu a Dumnidzãlui, atsel cai ari ocljilji ca fleaca a foclui sh-cicioarili a lui lunjineadzã ca bãcãrea curatã. 19 Mini li shtiu faptili a tali, vrearea, pistea, huzmitipsirea sh-arãvdarea a ta. Faptili a tali atseali di ma nãpoi suntu ma multi di atseali di ma nãinti. 20 Ma am niscãnti lucri contra tini, cã u alashi muljearea Iezebela, tsi s-acljeamã prufiteasã, sh-nveatsi shi s-arãdã huzmichearlji a melji s-putãnseascã shi s-mãca di curbãnsirea a idoljilor. 21 Mini lj-am dat chiro s-mitãnjiuseascã di putãnsirea a ljei, ma ea nu vru s-mitãnjiuseascã. 22 Mini va u aruc atsea tu un pat di munduiri sh-atselji tsi ncalcã curuna cu nãsã va lji arucã tu mari munduiri, macã elji nu s-mitãnjiuseascã trã faptili a ljei. 23 Mini va li agudescu cilimenjlji a ljei cu moarti. Sh-tuti biseritsli va s-aducheascã cã mini escu atsel tsi caftã mintili sh-ininjli, sh-mini va arãsplãtescu cathiunu di voi dupã faptili a lor. 24 Ma a voauã sh-alantsãlor cai suntu tu Tiatira, tsi nu tsãnets nvitsãturili a ljei shi nu avets cunuscut ‘ahãndamea al Satan,’ cum u acljeamã elji, mini dzãc: ‘Nu va bagã pristi voi altã greutati, 25 ma tsãnets-vã la atsea tsi avets pãnã cãndu s-yin.’ 26 Atsilui tsi nichiseashti sh-li veaglji pãnã tu soni faptili a meali, mini va lji-dau puteari pristi natsiunili. 27 Elu va domneascã atselji cu un scheptru di her sh-va li dãrãm ca vasi di lãschi, 28 ashãtsi di cum loai autoritati di la Tatãl a meu, sh-va lji dau a lui steaua a dimineatsãljei. 29 Cai ari ureclji, s-avdã atsea tsi Duhlu lã dzãtsi a biseritslor."