1 Atumtsea vidzui Njelu tsi stãtea tu muntili Sion, sh-deadun cu nãsu eara unã sutã patrudzãtsi patru di njilji di oaminji tsi avea numa a lui sh-numa a Tatãlui a lui scriatã pri frãmtili a lor.✝ 2 Atumtsea avdzãi unã boatsi dit tser ca shushurarea a apilor atseli multi sh-ca vrondul a unei bumbunidzari mari. Boatsea tsi avdzãi eara ca sunetul a harpilor tsi batã harpishtslji. 3 Elji cãnta un cãntic nou nãintea a thronlui, nãintea a patru fãpturilor sh-nãintea a aushlor. Vãrã nu putea s-lu nvitsa cãnticlu, dicãt mash atselji unã sutã patrudzãtsi patru di njilji tsi suntu arãscumpãrats dit loc. 4 Aeshti suntu atselji tsi nu suntu lãvushits cu muljeri, cã suntu virghini. Aeshti suntu atselji tsi urmeadzã Njelu iutsido iu s-dutsi. Elji s-acumpãrarã dit mesea a oaminjlor ca protlu frut curbãnsit trã Dumnidzãlu sh-trã Njelu, 5 sh-tu gura a lor nu s-aflã vãrã arãdeari, cã suntu fãrã cusuri.

6 Deapoea vidzui un altu anghil azbuirãnda tu anãltsãnjili a tserlui, tsi avea un evanghelu di daima trã dimãndari ca bunã-hãbari atsilor tsi bãneadzã pri loc, va s-dzãcã la cathi farã, la cathi soi, la cathi limbã sh-la cathi populu. 7 Elu dzãtsea cu boatsi analtã: "Aspãrats-vã di Dumnidzãlu sh-dats-lji a lui mãriri, cã vini oara a giudicatãljei a lui. Ncljinats-vã atsilui tsi adrã tserlu, loclu, amarea sh-izvurili a apilor."

8 Un altu anghil, a doilu, lu urmã dzãcãnda: "Cãdzu, cãdzu Babilonlu atsel marili, atsel tsi lji ari datã s-bea a tutã lumiljei di yinlu a inatiljei sh-a putãnsiriljei."

9 Un altu anghil, a treilu, lji urma dzãcãnda cu boatsi analtã: "Macã vãrã si ncljinã a agrimiljei sh-a icoaniljei a ljei sh-ljea semnul pri frãmtea icã pri mãna a lui, 10 va s-bea sh-elu di yinlu a inatiljei al Dumnidzãu, tsi easti misticat nisubtsãrat tu cupa a inatiljei a lui. Elu va si s-mundueascã tu foc sh-tu schifurã nãintea a sãmtsãlor anghilj sh-nãintea a Njelui. 11 Fumlu a munduirilor a lor va si s-alinã tu eta a etilor, sh-nu va aibã arihati dzua sh-noaptea atselji tsi si ncljinã a agrimiljei sh-a icoaniljei a ljei sh-caitsido tsi ljea semnul a numãljei a ljei." 12 Aoatsi easti arãvdarea a popului a Dumnidzãlui, atsilor tsi li veaglji dimãndãrili al Dumnidzãu sh-pistea al Isus.

13 Atumtsea avdzãi unã boatsi dit tser tsi nji dzãtsea: "Scrii: Ca hara di mortsãlji, di atselji tsi moarã trã Domnul di tora sh-nclo."

"Ie," dzãtsi Duhlu, "tra si s-arihãtipseascã di apustusirili a lor, cã faptili a lor lji urmeadzã di nãpoi."

14 Deapoea vidzui un nior albu sh-prisupru a niorlui shidea apunat un, tsi undzea ca hiljilu a omlui, tsi avea pri caplu a lui unã curuni di furii sh-tu mãna a lui tsãnea unã seatsirã struxitã. 15 Un altu anghil ishi dit templu aurlãnda cu boatsi analtã cãtrã atsel tsi shidea pri nior: "Ljea seatsira a ta sh-seatsirã, cã vini chirolu trã sitsirari, cã s-coapsi sitsirãtura a loclui." 16 Ashã elu tsi shãdea pri nior u mina mãna cu seatsira pri loc shi loclu fu sitsirat.

17 Dit templu tsi eara tu tser ishi un altu anghil, sh-elu avea unã seatsirã struxitã. 18 Un altu anghil tsi avea puteari pri foc ishi dit altar sh-lji gri cu boatsi analtã atsilui tsi avea seatsira atsea struxitã dzãcãnda: "Ljea seatsira a ta atsea struxita sh-adunã areapinjli a ayinjiljei a loclui, cã s-coapsi aua a ljei." 19 Anghilu u minã mãna cu seatsira pri loc, sh-adunã aua a loclui sh-u arcã tu voza atsea marea a inatiljei al Dumnidzãu. 20 Atsea tsi era nãuntru tu vozã s-cãlcã nafoarã dit cãsãbã sh-dit vozã ishi sãndzi tsi agiundzea pãnã la fãrnili a caljilor shi s-timsi di doauã suti di milji.*