1 Atumtsea, vidzui tu nandreapta atsilui tsi shidea pri thron, unã carti scriat di nãuntru sh-di nafoarã sh-vulusit cu shapti vuli. 2 Vidzui sh-un anghil puternic cai hãbãrsi cu boatsi analtã: "Cai easti axiu s-discljidã cartea shi s-li disfacã vulili a ljei?" 3 Ma vãrã, nitsi tu tser, nitsi pri loc sh-nitsi sum loc, nu putea s-u discljidea cartea shi s-videa la nãsã. 4 Ashãtsi, mini plãndzeam cu amãreatsã cã nu s-aflã vãrã axiu s-discljidea shi s-mutrea cartea. 5 Atumtsea un di aushlji nj-dzãsi: "Nu plãndzi! Ia, ljundarlu tsi easti di soia al Iuda, arãdãtzina al David, nichisi s-discljidã cartea shi shapti vulili a ljei."

6 Atumtsea vidzui tu mesea a thronlui, a patru fãpturilor sh-a aushlor cã eara un Njel ca tãljeat, cai avea shapti coarni shi shapti oclji, cai suntu atseali shapti duhurili al Dumnidzãu, pitricut pristi tut loclu. 7 Elu vini sh-lo cartea di nandreapta atsilui cai shidea apunat pri thron. 8 Dupã tsi u-lo cartea, di patruli fãpturili atseali yii sh-atselji patrusprãyinghits di aushi cãdzurã pri-dintsã nãintea a Njelui, avãnda cathiunu unã harpã sh-vasi di furii mplini cu timeamã, cai suntu rugãciunjili a popului sãmtu a Dumnidzãlui. 9 Elji cãnta un cãntic nou, dzãcãnda:

"Axiu eshti s-ljeai cartea

shi s-disfatsi vulili a ljei,

cã, tini ti tãljeashi

sh-cu sãndzili a tãu arãscumpãrash trã Dumnidzãlu

oaminji di tuti soili, limbili, populjilji sh-fãrili.

10 Tini lji ai faptã elji ca unã amirãrii

sh-preftsã trã Dumnidzãlu a nostru,

sh-elji va s-domneascã pri loc."

11 Atumtsea vidzui sh-avdzãi boatsea a multor anghilji anvãrliga di thron, a fãpturilor atsilor yiilor sh-a aushlor, sh-numirlu a lor eara njilji di njilji sh-multi njilji. 12 Elji dzãtsea cu boatsi analtã:

"Axiu easti Njelu atsel tãljeatlu,

s-ljea fuchii, aveari, frunimeatsã, puteari,

tinjii, mãriri sh-ghinicuvintari!"

13 Atumtsea avdzãi tuti fãpturili cai suntu tu tser, pristi loc, sum loc, atseali tsi suntu tu amari sh-tuti atseali tsi suntu tu nãsi, cai dzãtsea:

"Atsilui tsi sheadi pri thron sh-a Njelui,

s-lji hibã alãvdarea, tinjia, mãrirea sh-putearea

tu eta a etilor!"

14 Patruli fãpturili atseali yii dzãtsea: "Amin!" Atumtsea aushlji cãdzurã pri-dintsã sh-alãvdarã.