1 Un semnu mari s-vidzu tu tser. Eara unã muljeari nviscut cu soarili, sh-luna eara sum cicioarili a ljei sh-pri caplu a ljei unã curunã cu doisprãdzatsi di steali. 2 Ea eara greauã sh-aurla di durearili a amintariljei shi s-munduia s-aminta.✝ 3 Atumtsea tu tser s-vidzu un altu semnu. Ia, eara unã lamnji mari rosh-fleac, cai avea shapti capiti sh-dzatsi coarni sh-pri capitli a ljei avea shapti curuni.✝ 4 Coada a ljei trapsi unã a treia parti di stealili a tserlui sh-li arcã pri loc. Lamnja stãtu nãintea a muljeariljei cai eara trã amintari tra s-lji mãca cilimeanlu anda va aminta.✝ 5 Muljearea amintã un ficior, un mascru, tsi prindea s-picurãreascã tuti fãrili cu unã veargã di her, iarã cilimeanlu a ljei s-arãchi ningã Dumnidzãlu sh-ningã thronlu a lui.✝ 6 Deapoea muljearea fudzi tu irnjii, aclo eara un loc etimãsit di Dumnidzãlu, iu s-hrãnea ea di unã njilji doauã suti shaidzãtsi di dzãli.✝

7 Atumtsea s-featsi alumtã tu tser. Mihailu sh-anghilji a lui alumtarã contra a lamnjiljei. Alumtã sh-lamnja sh-anghilji a lui.✝ 8 Ghini ma, lamnja nu anichisi shi loclu tu tser chiru trã nãshi. 9 Ashãtsi, s-arcã pri loc lamnja atsea marea, sharpili atsel vecljiul, acljimat Drac shi Satan, tsi arãdi tut lumea sh-cu nãsu s-arcarã pri loc sh-anghilji a lui.

10 Atumtsea avdzãi unã boatsi mari tu tser dzãcãnda:

"Tora agiumsi ascãparea sh-fuchia,

amirãriljea a Dumnidzãlui a nostru,

autoritatea a Hristolui a lui,

cã s-arcã n-clo acuzatorlu a fratsilor a noshtri,

atsel cai lji acuza nãintea a Dumnidzãlui a nostru

dzua sh-noaptea.✝

11 Ma elji nichisirã pri nãsu prit sãndzili a Njelui

sh-prit zborlu a mãririljei a lor.

Sh-nu u-vrurã bana a lor pãnã tu moarti.

12 Trã atsea hãrsits-vã, tseruri,

sh-voi tsi bãnats tu nãshi!

Cavai di loclu sh-di amarea,

cã dipunã draclu la voi,

avãnda mari inati,

metsi shti, cã ari putsãn chiro."

13 Cãndu lamnja vidzu cã s-arcã pri loc, priaĝuni muljearea tsi amintã cilimeanlu atsel mascru. 14 Ghini-ma a muljeariljei lji si deadirã doauã peani di a marlui vultur, tsi s-azboairã tu irnjii, tu loclu a ljei sh-aclo si s-hrãneascã di un chiro, di multu chiro sh-di giumitati di chiro, diparti di fatsa a sharpilui.✝ 15 Atumtsea sharpilu scoasi dit gura a lui dupã muljearea apã, ca arãulu, tsi ea s-lu loa arãulu. 16 Sh-loclu u-agiutã muljearea, discljisi gura a lui sh-ascãpitã arãulu, tsi lamnja avea scoasã dit gura a ljei. 17 Atumtsea lamnja s-nãrãi cu muljearea shi s-dusi s-alumta cu alantsã dit fara a ljei, cu atselji tsi tsãn dimãndãrili a Dumnidzãlui sh-au mãrtiria al Isus.✝ 18 Sh-lamnja stãtu pri arina a amariljei.