Milagres de Jesus

Jesu Unochilisa Mapofu Mabili

27 Akale Jesu wakati ekwenda endila mbeli epinda yopo, mapofu mabili bakontobela, beshomeja beti, "Mwananhulumyana waDavidi, tiwhile ishe!"

28 Angwina mungumba, mapofu bakenda kunaiye, Jesu akati kwabali, "Munodimbwa kuti ndingatubula kuta yezwi na"

Bakati kwaali, "Eya, Tezi."

29 Kova eguma mesho abo, eti, "Ngezwitike kwamuli sokudimbwa kwenu." 30 Mesho abo akazhulika bakabona. Jesu wakabalaya zwinesimba, eti, "Akutokwelela kuti pebe nonhu uchazwiziba yezwi."

31 Koga pabakabhuda yopo, bakamwalaja impuwo yiye munyika yeyo yose.

Jesu Unochilisa Mapofu Mabili

29 Jesu nabalayijwa babe pabakati bebhuda muJeliko, ibunga lyabanhu igulwana lyakontobela. 30 Mapofu mabili aluba eligele kumbali kwenzila, bakati bawha kuti Jesu ukumupinda, bakashomeja beti, "Tezi, Mwananhulumyana waDavidi, tiwhile ishe!"

31 Ibunga lyabanhu lyakabakalalila, kuti bewhilijile koga ibo bakanyanya kushomeja beti, "Tezi Mwananhulumyana waDavidi, tiwhilebo ishe!"

32 Jesu wakama akabashoba, eti, "Munoda kuti ndimutileni?"

33 Ibo bakati kwaali, "Tezi, ita kuti mesho edu ebone!"

34 Jesu wakabawhila ishe, akaguma mesho abo, ibo bakava babona pakalepo, bakontobela.

Jesu unochija unhulume ibhofu peBhetisaida

22 Bakaswika kuBhetisaida. Bamwe banhu bakabuza unhulume wakabeli ibhofu kwaali, bakonkwekweteja kuti ongume. 23 Wakabhata unhulume ibhofu noluboko, akenda naye kuzhe kwonzi; wakomfhila kumesho namate akombiga maboko pezhulu, akombhuza eti, "Ubweni chinhu na?"

24 Wakalinga zhezhulu akati "Ndibweni banhu, koga bananga semiti ikumukwendenda."

25 Akale wakabuya akabiga maboko pamesho awe; wakalingisisa akabona zwibuyanana. 26 Wakonsungula kuti ende kungumba yiye akati, "Usibuje unhu munsha."

Jesu unochija Machinzebe Chimumu

31 Wakabuya akabhuda mubugalo bweguta lyeTaya akapinda nomuSidoni ekaswika kugungwa lyeGalili, epinda pakati penyika yeDikapolisi. 32 Bakabuza kwaali unhu waluba elinenzebe jisinowha akale elichimumu; bakombweta kuti ebige luboko lulwe pezhulu pape. 33 Wakontola akobhisa kubanhu, akonsengela kulosisika, wakabiga tunyala tutwe munzebe, akafhila mate, akombhata lulimi lulwe. 34 Wakalinga zhezhulu kudenga, akamimila, akati kwaali, "Efata," zwileba kuti, "Zhulika!"

35 Inzebe jije jakava jazhulika, lulimi luka lelupa akava atubula kulebeleka. 36 Wakababuja kuti besibuje bamwe banhu koga, paakabajibisa, iye ndipo pabakanyaya kubuja banhu. 37 Zwakabashamisa kasa bakati, "Zwose zwaanota zwibuya; unota machinzebe ewhe nezwimumu zwilebeleke."

Jesu unochija Bhatimiyasi ibhofu

46 Bakaswika kuJeliko; paakubhuda kuJeliko elinabalayijwa babe nedupwa lyabanhu, ibhofu Bhatimiyasi, mwananhulumyana waTimiyusi, wakabeligele kumbali kwongwagwa ekumbila. 47 Paakawha kuti ndiJesu wokuNazaleta, wakatanga kushomeja eti, "Jesu Mwananhulumyana waDavidi, ndiwhileni ishe!"

48 Banji bakombuja kuti enyalale, koga iye ndipo pakakongoloka nesimba, "Mwananhulumyana waDavidi ndiwhileni ishe!"

49 Jesu wakama akati, "Unshobeni."

Bakalishoba ibhofu, bakati, "Shanta; nyamuka umukushoba."

50 Wakalashila kumbali ishashiko lilye, akanyamuka nesimba, enda kunaJesu.

51 Jesu wakati kwaali, "Unoda kuti ndikutileni na?"

Ibhofu lyakati, "She ndimuda kuti ndibone."

52 Jesu wakati kwaali, "Inda azo; kudimbwa kukwo kwakuchija."

Pakalepo wakabona, akontobela mungwagwa.

Jesu unochilisa unhu usinobona

35 Paakati abapelyo neJeliko, kwakaba kulinonhu ibhofu wakabeligele kumbali kwenzila ekumbila, 36 paakawha idupwa lyabanhu lipinda, wakabhuza kuti ini yezwo.

37 Bakombuja kuti, "Jesu wokuNazaleti ukumupinda."

38 Wakashomeja eti, "Jesu Mwananhulumyana waDavidi, ndiwhile ishe!"

39 Banhu bakabelimbeli bakonkalalila kuti ewhilijile koga iye wakanyanya kushomeja kasa eti, "Mwananhulumyana waDavidi ndiwhile ishe!" 40 Jesu wakama akabalaya kuti bombuze kwaali, paakaswika pelyo, wakombhuza eti, 41 "Unoda kuti ndikutileni?"

Wakashandula eti, "Tezi ndite kuti ndibone."

42 Jesu wakati kwaali, "Bhwazula, kudimbwa kukwo kwakuchilisa."

43 Pakalepo, mesho awe akazhulika, akontobela Jesu, ekuja Mwali, nabanhu bose pabakabona yezwi, bakatunhumwija Mwali.

Jesu Unolapa unhulume wakazwalwa elibhofu

1 Jesu paakapinda munzila wakabona unhulume waluba ibhofu, kuvila pakuzwalwa kukwe. 2 Balayijwa babe bakombhuza kuti, "Ndayiji ndiani wakachinya, unhulume yoyu kana kuti bazwali babe, zwakatisa kuti ezwalwe elibhofu?"

3 Jesu wakashandula eti, "Akutoba kuti yoyu unhu wakachinya, kana kuti bazwali babe, asi kuti mishingo yaMwali itondejelwe mwaali. 4 Tinokwelela kuta mishingo yayoyo wakandituma, kuchili masikati nokuti kungoba busiku akutoba noochatubula kushinga. 5 Cheninge ndili munyika, ndili mwenje wenyika."

6 Aleba yezwi, wakafhila mate pasi, akakanya ivu namate akaguba idope pamesho ebhofu, 7 eti kwaali, "Inda unoshamba, mugandwa lyeSilomu" (zwinoleba kuti watumwa). Wakenda akanoshamba akabuya ebona.

2 Pakalepo undwaji wamapelembuji wakezha kwaali, akafhigama mbeli kukwe, akati, "Tezi, kana muda mungandichenesa."

3 Akale wakatambunuja luboko lulwe akoonguma eti, "Ndoda, chena." Akale nokukambija bulwaji bwamapelembuji bwakashambijika. 4 Akale Jesu wakati kwaali, "Usibuje banhu banji asi inda kuntebuji, upile chipo chawakalayilwa naMozesi kuti chibe chitondejo kubanhu."

2 Akale pakalepo, bakabuza igosha kwaali, lililele pabushasha bwalyo, akale Jesu abona kudimbwa kwabo, wakati kugosha, "Shanta mwananhulumyana wangu, luchinyo lulo lwalekejelwa."

3 Akale ilingani, bamwe babakwali bakalebeleka mumyoyo yabo beti, "Yoyu unhu ukumutuka Mwali."

4 Koga Jesu eziba indangalilo jabo, wakati, "Ini muyeya yezwi mumyoyo yenu" 5 Ini zwilelu, kuti, "Luchinyo lulo lwalekejelwa kana kuti, ‘Milika ukwende?’ 6 Koga kutila kuti muzibe kuti Mwananhulumyana woNhu unesimba penyika yopano lyokulekejela luchinyo," kova eti kugosha, "nyamuka utole bushasha bubo, unde kungumba kuko."

7 Wakanyamuka akenda kusha kukwe.

10 Yomo mwakabeli nonhu ulokokonyala luboko. Bakombhuza beti, "Kunovumijwa na kuchilisa nezhuba lyeSabata?" Betila kuti bompe undandu.

11 Wakati kwabali, "Ndiani pakati penu unoti eli nemhwizi imwempela inoti kana yawila mudizwa nezhuba lyeSabata, esinonda kunoibhisa na? 12 Unhu ulokosha kupinda imhwizi! Nokudalo zwinovumilwa kuta zwibuyanana nezhuba lyeSabata." 13 Kova eti kunoyo unhu, "Tambunuja luboko lulwo."

Wakalutambunuja, lukava lwachiliswa, lukaba solumwe.

30 Amezwale baSimoni bakaba belilele belwala bepisa umbili. Pakalepo Jesu wakabujwa nezwabo. 31 Wakenda kwabali akababhata luboko, akabamusa bulwaji bukava bwapela. Bakamilika bakabashingila.

Jesu unolapa unhulume

40 Unhu unamapelembuji wakenda kwaali, akafhigama pambeli pape, akabweta kwaali eti, "Kana uda, ungandishampuluja."

41 Jesu wakonwhileshe, akatambunuja luboko lulwe, akonguma, akati kwaali, "Ndinoda, cheneswa." 42 Pakalepo mapelembuji akava apela, akashambijika.

3 Bakezha kwaali, banhulume bana, bekanyamula igosha. 4 Pabakakonwa kuswika paali pezhulu pedupwa lyabanhu bakafukunyula idenga paaluba eli; pabakafukunyula idenga bakangwinisa, bushasha pakabelilele igosha. 5 Jesu paakabona kudimbwa kwabo, wakati kugosha "mwananhulumyana luchinyo lulo lwalekejelwa."

6 Feno bamwe bakwali baluba bakagala pakalepo beyeya mumyoyo yabo, 7 "Ani ndiyani yoyu unhulume unotuka Mwali? Ndiyani angalekejela luchinyo kuzhe kwaMwali ega!"

8 Koga pakalepo Jesu wakaziba mumpepo uwe kuti kuna banoyeya alo pakati pabo, wakati kwabali, "Ini muyeya yezwi mumyoyo yenu? 9 Ngezwipi zwilelu kuleba kugosha kuti zwibi zwizwo zwalekejelwa kana kuti milika utole unseme uwo ukwende? 10 Koga kuti muzibe kuti mwananhulumyana woNhu unesimba penyika lyokulekejela luchinyo penyika. 11 Ndinoti kwauli tola unseme uwo, unde kungumba kuko."

12 Wakamilika, nokukambija akatola unseme uwe akenda pazhe mbeli kwabo bose; bakashama bakakuja Mwali beti, "atijanhu tabona zwakadai!"

Unhulume unaluboko lulokokonyala

1 Jesu wakangwina akale muSinagogi, kwakabeli nonhulume wakabakakokonyala luboko. 2 BaFalisi bakondingisisa, bedakubona kuti uchonchilisa nezhuba lyeSabata, beda kuumpa undandu. 3 Jesu wakati kunhulume woluboko lulokokonyala, "Izha yopano." 4 Wakati kwabali, "Zwilokwelela ngezwipi kuta zwibuya nezhuba lyeSabata kana kuta zwibi? Kuchija kana kubulaya?"

Apana wakadabila. 5 Wakabalinga bose akanyema akaba neshungu ebona bukukutu bwemyoyo yabo, wakati kunhulume ,"Tambunuja luboko lulo." Wakatambunuja luboko lukakololoka.

Jesu unochija unhulume

12 Wakati eli munelimwe iguta, kwakaswika umwe unhulume wakabelizhele mapelembuji, paakabona Jesu, wakazwiwigila pasi akatibhama onkumbila eti, "She, kana muda motubula kundichenesa."

13 Wakatambunuja luboko lulwe, akonguma eti, "Eya ndinoda, shambijika." Mapelembuji akonsiya pakalepo.

18 Bamwe banhulume bakaswika bekanyamula pabushasha, unhulume wakabeli igosha, bakabekweja kuungwinisa mungumba kuti bontule pambeli paJesu, 19 koga nokuzhala kwabanhu, bakashayiwa kuti balungwinisa chini, ndipo pabakonyamula bonsenga pezhulu pedenga lyengumba, bakazhula ibanga kova bongwinisa ekalajikwa pabushasha akabhulujwa pakati pabanhu mbeli kwaJesu. 20 Paakabona kudimbwa kwabo wakati, "Awe nhulume, luchinyo lulwo lwalekejelwa."

21 Bakwali bomulawo nabaFalisi bakatanga kuzwibhuza beti, "Ani ndiyani yoyu unolebeleka ali efizha? Ndiyani angalekejela luchinyo kuzhe kwaMwali!"

22 Jesu paakaziba mibhuzo yabo wakabashandula eti, "Ini muyeya yezwi mumyoyo yenu? 23 Zwilelu ngezwipi, kuti, walekejelwa luchinyo lulwo, kana kuti, Milika ukwende? 24 Kuti muzibe kuti Mwananhulumyana woNhu unesimba lyokulekejela luchinyo penyika, wakati kunhulume unabukosha, ndinoti kwauli, Nyamuka tola bushasha bubo unde kungumba kuko."

25 Pakale yopo wakanyamuka pambeli pabo bose, akanyamula bushasha paakabelilele akenda kusha kukwe ekuja Mwali.

Unhulume unaluboko lulokokonyala.

6 Limwe izhuba lyeSabata, paakangwina musinagogi elayija, kwakabeli nonhulume wakabeli noluboko lwokululyi lulokokonyala. 7 Bakwali nabaFalisi bakaba bekalingilila kuti unochilisa na nezhuba lyeSabata kutila kuti bompe undandu. 8 Koga iye wakaziba kuyeya kwabo, akati kunoyo nhulume unaluboko lulokokonyala, "Milika izha ume yopano." Wakanyamuka, akama. 9 Jesu wakati kwabali, "Ndomubhuza, zwimo mumulawo wezhuba lyeSabata na, kuta zwibuya kana kukubaja, kuchija bupenyu kana kubupalaja?" 10 Wakalinga kunaibo bose, akati kwaali, " Tambunuja luboko lulwo." Wakata alo, luboko lulwe lukava lwakololoka.

Jesu unochilisa unshingi, wonkulwana wabalwi babaLoma

1 Paakapeja zwose kuleba zwaakabeda kuti banhu bewhe, wakangwina muKapenaume. 2 Untungamili wezana lyabalwi behondo, wakabeli nonshingi unodikana kwaali wakabelwalila kufa. 3 Paakawha nezwaJesu, wakatuma bakulwana bamaJuda kuti benoonkumbila kuti ezhe kwochilisa unshingi uwe. 4 Pabakaswika kunaJesu, bakanombweta kasa beti, "Ulokwelela kasa kubhanchwa namwi, 5 nokuti unoda inyika yedu akale ndiye wakatibakila isinagogi."

6 Jesu wakenda nabo. Pakati abapelyo nengumba, untungamili wabalwi wakatumila bakwaina babe kwaali kuti benoti, "She musizwinyaje nokuti anditokwelela kuti mungwine mungumba yangu; 7 nokudalo ndizwo ndayeya kuti ndizhe imi kunamwi.Koga ilebani iwhi chete unshingi wangu echijwe. 8 Nokuti imibo ndinhu upo pasi pomulawu, ndina balwi baipo pasi pangu; kuna umwe ndinoti, ‘Inda’ unonda, ndingoti kunomwe, ‘Izha’ unozha, ndikati kunzike wangu, ‘Ita yechi’ unota."

9 Jesu paakawha mawhi yaya wakachenama, akachebuka, akati kubanhu bakabontobela, "Ndinomubuja andijanu ndawana kudimbwa kukulugulu kwakadai kana muIzilayeli."

10 Bakati yabo bakabatumwa pabakabwilila kungumba bakawana unshingi wakabelwala, achila.

11 Kwaluba nonhukaji wakaba eli nompepo umbi wakaba wondwajika kwamakole igumi lina mashanu ana matatu unshana uwe wakabakakovomala esinotubula kuma ekakololoka. 12 Paakati Jesu ombona, wakonshoba, eti kwaali, "Awe nhukaji wasupulwa mubulwaji bubo." 13 Wakabiga maboko awe panaiye, akava akololoka unshana uwe pakalepo, akakuja Mwali.

Jesu unochilisa unhulume unolwala

1 Nelimwe izhuba lyeSabata wakenda kungumba youmwe unkulwana wabaFalisi kuti enolya naye, bakaba bakondingisisa. 2 Unhu waluba ekazwimba umbili wakabeli mbeli kukwe. 3 Jesu wakalebeleka kubalayiji bomulawo nabaFalisi eti, "Zwipo pamulawo kana nee, kuchilisa nezhuba lyeSabata?"

4 Asi ibo bakawhilijila. Jesu wakontola akonchilisa, kova ondeka kuti ende.

Jesu unochilisa Banhulume Bali igumi

11 Palwendo lulwe lwokuJelusalema, wakapinda pakati peSamaliya neGalili. 12 Echinongwina muna umwe unzi, wakatandamijwa nabanhu bali igumi bakabelwala mapelembuji ibo bakamila kule naye, 13 bakashomeja beti, "Jesu, Tezi! Tiwhileni ishe!"

14 Paakababona wakati kwabali, "Indani munozwitondejela kubatebuji."

Bechinokwenda, bakashampulujwa. 15 Umwe wabo paakabona kuti wachiliswa, wakabwilila etunhumwija Mwali newhi lipo pezhulu, 16 akazwiwigila pasi pamakumbo awe omboka. Yoyu unhu wakabeli unSamaliya. 17 Nokudalo Jesu wakati, "Akujachiliswa bali igumi na? Bamwe bashanu nabana baipi? 18 Apana wabuya kwotunhumwija Mwali kuzhe kwoyu umvakule?" 19 Wakati kuna iye, "Imilika unde azwo, kudimbwa kukwo kwakuchilisa."

Kuchilisa peGandwa

1 Mushule mwezwi, kwakaba namabhiko abaJuda, akale Jesu wakenda kuJelusalema. 2 Ngweno muJelusalema peshubo lyeMhwizi, kwaluba negandwa lyaluwhi muchiHebhelu Bhetisaida, lyaluba lyakazyungulukwa notutumba tushanu. 3 Mututumba kwakabelilele banhu banji bakabelwala, mapofu, makosha, nabakakokonyala, 4 *bekamilila kukovongwa kwevula nokuti ingilozi yaShe yakabekwenda noumwe unshaji, mugandwa ikovonga ivula, yoyo walutanga kungwina mushule mwokukovongwa kwevula wakabechiliswa kuva mubulwaji cheninge bupi bwaalulwala. 5 Umwe unhulume wakabelipo, wakabalwala kwamakole makumi matatu anatushanu tunatutatu. 6 Jesu paakaumbona, wakaziba kuti waluba akalala kwonshaji undefu, wakombhuza eti, "Unoda kuchila na?"

7 Unhulume unolwala wakashandula eti, "Shungwasha imi andina unhu angandibiga mugandwa pakunokovongwa ivula, asi yopo kana ndinda umwe unongwina mbeli kwangu."

8 Jesu wakati kwaali, "Nyamuka, utole bushasha ukwende." 9 Pakalepo unhulume wakachila, akatola bushasha bubwe akakwenda. Yeli lyaluba izhuba lyesabata.

46 Wakenda akale kuKana muGalili, yoko kwakabashandula ivula ikabe waini. Akale kuKapenawomi kwakabeli nontungamili walulwalilwa nomwananhulumyana. 47 Paakawha kuti Jesu wava kuJudiya waswika muGalili, wakenda akoonkumbila kuti ende enochija mwananhulumyana uwe, nokuti wakaba alobofa. 48 Jesu nezwo wakati kwaali, "Kuzhe kokuti mubone zwitondejelo nozwishamiso amutodimbwa."

49 Untungamili wakati kwaali, "Shungwasha, delela, mwana wangu esanhu afa."

50 Jesu wakati kwaali, "Inda mwananhulumyana uwo unochila."

Unhulume yoyu wakadimbwa iwhi Jesu lyakalebeleka kwaali, akanyamuka akenda kumba kukwe. 51 Paakaba enda, bashingi babe bakontandamija bakombuja kuti mwananhulumyana uwe wachila.

52 Nezwo wakababhuza unshaji paakatanga kupabula, bakati kwaali, "Zhilo neawa yotanga yamasikati makulwana, kupisa mbili nokululuma kwakapela." 53 Tate bakaziba kuti ndiwo unshaji Jesu paakati kwabali, "Mwananhulumyana uwo uchachila," akale iye nokukwe wakadimbwa, nemhuli iye yose.

54 Ngweno chaluba chishamiso chabili yechi, Jesu chaakata abuya eva kuJudiya enda kuGalili.

20 Akale ilingani, umwe unhukaji wakabajiijwa nokubhuda ilopa kwamakole igumi namabili, wakasendela mushule mumwe, akabhata lupeto lwechimbalo chiche, 21 wakati mumwoyo uwe, "Ndingobhata chimbalo chiche chete, ndochila."

22 Jesu wakachingunuka, paakombona, wakati: "Shanta, mwananhukajana, kudimbwa kuko kwakuchilisa." Pakalepo unhukaji yoyo wakachila.

25 Kwakabeli nonhukaji wakabeli nobulwaji bwokubhuda ilopa kwamakole igumi linamabili, 26 wakabahetela nokulapwa nabalapi banji, ashingisa yose ifuma yiye koga azwijakombancha chinhu, asi bulwaji bwakakubuka. 27 Wakati awha nozwaJesu, akezha nokushule kukwe mubuta lyabanhu akabhata zwimbalo zwizwe. 28 Wakati, "Ndingobhata chete zwimbalo zwizwe, ndochila."

29 Pakalepo ilopa lyakama; iye akawha mumbili uwe kuti wachijwa.

43 Unhukaji wakabekunga ilopa elwala kwamakole igumi lina mabili, wakabakona kubalapi, 44 wakezha nokushule kukwe, akaguma lupetelo lwechimbalo chiche, pakalepo ilopa lyakava lyama kukunga. 45 Jesu wakati, "Ndiyani wandiguma?"

Pabakalamba bose, Pita wakati, "Tezi, seni banhu bamususumana, ndibo bamumumanikija."

46 Koga Jesu wakati, "Kuna unhu wandiguma, nokuti ndaliwha isimba libhuda mwandili." 47 Paakabona kuti wazibikana, unhukaji yoyu wakenda kunaiye eteketa akazwiwigila pamakumbo aJesu, elungulula pakati pabanhu bose kuti wakongumilani akale nokuchila kukwe pakalepo. 48 Wakati kwaali, "Mwananhukajana kudimbwa kukwo kwakuchilisa, inda nolunyalalo."

Mwananhukajana Wontongi Wonhukaji Wakabhata Ishashiko YaJesu

18 Echinolebeleka kwabali, kwakaswika untongi akafhigama mbeli kukwe, akati, "Mwananhukajana wangu washaika ngweno ali, koga ande, ungobiga luboko lulo panaiye, unolalama."

19 Jesu wakanyamuka akontobela nabalayijwa babe.

23 Jesu paakaswika kungumba yontongi, akale akabona baliji bemitetele bopedilwe nabanhu banjinji pelina iditi, 24 wakati, "bhudani, nokuti unsichana yoyu aajafa, koga ulele." Ibo bakonseka. 25 Ibunga lyabhisilwa pazhe, Iye wakangwina mumba akabhata luboko lwonsichana, unsichana akamuka.

22 Umwe wabatungamili besinagogi, izina lilye ndiJayilosi, paakabona Jesu wakawila kumakumbo awe, 23 Wakombweta eteteja eti, "Mwananhukajana wangu umulwalila kufa. Izhani mumbige maboko enu pezhulu pape, kutila kuti echile ebe nobupenyu."

24 Wakenda naye, ibunga lyabanhu lyakontobela liunsundikija.

38 Paakaswika pengumba yonkululwana wesinagogi wakabona idupwa lyabanhu lita izhoba, nokukwiila kasa. 39 Paakangwina mukati wakati kwabali, "Igwilakwila ngilyeni? Mwananhukajana yoyu ulele aajafa."

40 Bakonseka. Wakababhisila pazhe, akatola tate naamai bomwana naabo bakabekwenda naye bakangwina mumba mwakabelilele mwana. 41 Wakabhata luboko lwomwananhukajana akati kwaali, "Talita Kumi" Zwingoshandulwa zwinoleba kuti " Nsichana ndinoti kwauli imuka."

42 Pakalepo mwanansichana wakamuka akakwenda, (wakabeli namakole igumi namabili) bakashama zwikulugulu.

31 "Ani biya banhu bechizekululu changweno ndobakwejanisa neni, bananga sani? 32 Bananga sabana batukutuku bagele pamusika beshomejana beti; ‘Takamulijila bundimbwa, koga amujakazana, takamukwimbila jedilwe koga amujakalila.’ 33 Joni umbhabhatizi wakezha esinolya chinkwa kana kunwa iwaini, koga mwakati unanedimoni. 34 Mwananhulumyana wonhu waswika, elya nokunwa, koga munoti, ‘Lingani yoyu unhulume! Unolyisa kasa akale unkolwi, unkwaina wabatelesi nabachinyi!’ 35 Koga buchenjevu bwakaboneka buli bwakalulama nabana babo bose."

Jesu elikungumba yaSimoni unFalisi

36 Umwe wabaFalisi wakakoka Jesu kuti bende benolya bose, nokudalo wakenda mungumba yomFalisi akagala kutebuli. 37 Kwakangwina unhukaji waluba elalama bupenyu bwomuluchinyo muguta yeli, paakaziba kuti Jesu unolayila mungumba yomFalisi, wakenda ekasenga ifukwana yamafuta obunde,

41 Kwakaswika unhulume waluwhi Jayilosi, eli untungamili weSinagogi, wakazwiwigila pamakumbo aJesu, akombweta kuti ende kungumba yiye, 42 nokuti mwananhukajana uwe umwempela chete, wakabeli namakole igumi linamabili okuzwalwa, wakaba alobofa.

Paakabekwenda, banhu bakabomanikija.

49 Echinolebeleka alo, kwakaswika untumwa eva kungumba yombhati wemishingo musinagogi eti, "Mwananhukajana wapalala, musinyaje."

50 Koga Jesu pakazwiwha yezwi wakonshandula eti, "Usitye, iba nokudimbwa chete unochila."

51 Paakaswika pengumba yeyo, aajakavumija banhu banji kuti bengwine naye kuzhe kwaPita, naJoni, naJemusi, natate namai bomwananhukajana. 52 Bose baluba belila, lilidilwe, asi iye wakati, "Musilile aajafa ulele."

53 Bose bakonseka, nokuti bakabeziba kuti wafa. 54 Wakombhata luboko unsichana, akoonshoba eti, "Awe mwana, imuka!" 55 Umpepo uwe wakabwilila mwaali, akamuka, akamilika pakalepo. Wakabuja banhu kuti bompe kulya. 56 Zwakabachenamisa bazwali babe, asi iye wakababuja kuti besibuje kana aani nezwakabatikana.

Kufa KwaLazalo

1 Ngweno umwe unhulume wakabelwala, wakaba ewhiLazalo wokuBhetani, iguta mwakabegala Mariya naMatha bakabeli unkulu nonuna. 2 Yoyu Mariya ndiye wakaguba Tezi mafuta, akabukusha makumbo namasusu awe. Unkazwaji uwe Lazalo wakaba elwala. 3 Nezwo yaba unkulu nonuna, bakatumila iwhi kunaJesu beti, "Tezi, Lazalo waunoda ukumulwala."

4 Asi Jesu paakazwiwha wakati, "Yaya malwaji aatoba olufu, asi ndiwolukujo lwaMwali, kuti Mwananhulumyana waMwali ekujwe nazwo."

5 Jesu wakabeda Matha, Mariya nonkazwaji wabo Lazalo. 6 Nezwo paakawha nezwokulwala kwaLazalo, wakagala amwe mazhuba mabili mubugalo mwaakaba eli. 7 Mushule mwezwi wakati kubalayijwa babe, "Andeni kuJudiya kabili."

8 Balayijwa babe bakati, "Ndayiji, baJuda bakabeda kukupubula namabwe munshaji ushomanana wapinda, asi ngweno ukumuda kunda kwakale kabili?"

9 Jesu wakabashandula eti, "Akuna maawa igumi namabili muzhuba na? Kana unhu angokwenda masikati aatogubhulwa nokuti unobona nomwenje wenyika yeino." 10 Asi kana unhu akakwenda, busiku, unogubhulwa nokuti aana mwenje. 11 Wakati alebeleka, akapamija eti, "Unkwaina wedu Lazalo walala, koga ndichenda kunoomusa."

12 Balayijwa babe bakati kwaali, "Tezi kana kuli kuti walala, uchachila."

13 Ngweno Jesu wakaba alebeleka nezwolufu lwaLazalo, asi ibo bakayeya kuti kulala kokunyetutukwa. 14 Kova Jesu ebabuja pachena eti, "Lazalo wafa,

Jesu unonyalaja ibhepo

23 Akale paakangwina mubwato, balayijwa babe bakontobela. 24 Hezwo, kwakanyamuka ibhepo igulwana mugungwa, nezwo bwato bwakabekupilwa namakampo, asi wakaba elilele. 25 Akale balayijwa bakenda bakoumusa beti, "She tichijeni, talobonwila ndondwe!"

26 Akale wakati kwabali, "Ini mutya, imwi banhu bokudimbwa kushoma?" Kova enyamuka, ekalalila ibhepo negungwa, kukaba nokunyalala kukulwana. 27 Akale banhu bakashamiswa nezwi bakati, "unhu wakata chini yoyu, unowhililwa nebhepo negungwa"

15 Kwaba madeko, balayijwa babe bakenda kunaiye, bakati, "Lingani yokuno kwatili kuzhe, unshaji wenda, lekejani banhu bende kumisha benotenga kulya kwabo."

16 Jesu wakati, "Abatokwelela kunda, imwi bapeni zwokulya!" 17 Bakati kunaiye, "Tina zwinkwa zwishanu nehobe imbili chete."

18 Iye akati, "zwibuzeni yokuno kwandili." 19 Wakabuja ibunga lyabanhu kuti ligale pasi pabuhwa, akatola zwinkwa zwishanu nehobe mbili, akalinga kudenga, akazwikombolela, akazwimedula zwinkwa akazwipa kubalayijwa babe, balayijwa bakapa ibunga lyabanhu. 20 Bose bakalya bakaguta, bakanunga zwifwapi zwakabasala bakazhaja zwizuma igumi nezwibili. 21 Bose bakalya bakabeswika banhu zwiulu zwishanu zwabanhulume, kusinobalwa banhukaji nabana.

25 Kwaba kumijelo wakaswika kwabali, ekwenda namakumbo pezhulu pegungwa,

Jesu Unopa Kulya Kuzwiulu Zwina Zwabanhu

32 Jesu wakashoba balayijwa babe kwaali, akati kunaibo, "Ndinowhila ishe ibunga, nokuti babeli nami kwamazhuba matatu, akale abachina zwokulya, namibo anditoda kubabwiliza nenzhala, nokuti chimwe chilo bangazilika munzila."

33 Akale balayijwa babe bakati kwaali, "Yomuno mugwegulu tozwiwana kupi zwinkwa zwingaguncha ibunga igulwana lyakadai?"

34 Jesu wakati kwabali, "Munazwinkwa zwingana"

Bakati, "Zwishanu nezwibili notukobe tushomanana."

35 Wakalaya ibunga kuti ligale pasi, 36 akatola zwinkwa zwishanu nezwibili nehobe, akaboka, akazwipemula akapa balayijwa babe, balayijwa bakapa mabunga abanhu. 37 Bose bakalya bakaguta, akale bakabunganisa zwipemu zwakasala, zwikazhaja zwitundu zwishanu nezwibili. 38 Yabo bakalya, bakababeli banhulume zwiulu zwina, kusinolabwa banhukaji nabana.

Kulipa uNtelo womuTempeli

24 Pabakaswika kuKapenaume, batelesi bomutelo wetempeli bakezha kunaPita, bakati, "Undayiji wenu unobhisa mutelo na"

25 Wakati, "Eya."

Paakezha kusha, Jesu ndiye wakatanga kulebeleka naye, eti "Umuyeyani, Simoni? Mashe enyika anolipisa aani untelo? Bana babo kana bamwe?"

26 Akale paakati kuna iye, "Kunabamwe,"

Jesu wakati kuna iye, "Nokudalo banabanhulumyana balosungunuka. 27 Nokudalo, kuti tisibanyemeje, inda kugungwa, upose kalozo, utole ihobe ichatanga kubhatwa, ungoyishamula undomo wayo unowana ikobeli lilokosha, ulitole ubape libe indipo yangu nawi."

Jesu Unofhizha Unkuyu

18 Zhingwanangwana, ebwilila kuguta igulwana, wakawha zhala. 19 Akale paakabona unkuyu wakabeli pelyo nenzila, wakenda kwauli koga aajakawana chinhu, kuzhe kwamazhani chete. Wakati kwauli, "Usizwale unchelo akale!" Unkuyu wakahwihwinyala pakalepo.

20 Bazwibona yezwi balayijwa bakachenama kasa, bakati, "Unkuyu wahwihwimala chini pakalepo?"

21 Akale Jesu wakabashandula eti, "Chokomende, ndinoti kwamuli, kana mulinokudimbwa musinokahajika, moota zwinopinda zwandata pankuyu, munooti kudunhu yeli, ‘Nyukuka, uposelwe mugungwa, akale zwinootikana. 22 Neebo chose chamuchakumbila mukunamata mudimbwa, mochipiwa.

37 Kwakezha ibhepo igulwana makampo akapamula bwato, bwato bukazhala ivula. 38 Wakabeli mushule mobwato elilele ponchegelo; bakomusa, bakati kwaali, "Ndayiji amuneshungu na kuti talebopalajwa" 39 Wakamuka akalikalalila ibhepo, akati kugungwa, "Nyalala!" Ibhepo lyakama, kukaba nokuwhilijila kukulwana 40 Wakati kwabali, "Ini muli nolutyo ali? Neni musinodimbwa"

41 Bakatya zwikulugulu bakati kunomwe nomwe, "Ndiyani yoyu unowhililwa nebhepo negungwa"

35 Unshaji pawakapela, balayijwa babe bakezha kwaali bakati, "Timo mushango lisina banhu akale unshaji wapela, 36 Babujeni bende kumakuta nokumisha, benozwitengela zwokulya."

37 Koga wakashandula akati kwabali, "Imwi bapeni zwokulya."

Bakati kwaali, "Tinde kunotenga zwinkwa zwemali inoshoba mazana mabili amasheleni, tibape belye kani?"

38 Wakati kwabali, "Zwingana zwinkwa zwamuna nazwo? Indani munolinga."

Pabakaziba bakati kwaali, "Zwishanu nehobe imbili."

39 Wakabuja kuti begajike banhu bose pasi mumakapo pobuhwa bunyolo. 40 Bakagala pasi mumakapo abanhu izana, bamwe makumi mashanu. 41 Feno wakatola zwinkwa zwishanu nehobe imbili akalinga kudenga akaboka, akamedula zwinkwa akapa balayijwa babe kuti bebape, nehobe imbili akajikobela bose. 42 Bakalya bose bakaguta. 43 Baka bunganisa zwimedu zwezwinkwa muzwitundu igumi lina zwibili zwakazhajwa nehobe. 44 Bakalya zwinkwa baluba banhulume baluba zwiulu zwishanu.

48 Wakababona bekakomelwa bekwendesa bwato nokuti ibhepo lyakabeshangamijana nabo. Nonshaji unanga wechina wobusiku, wakabuya kwabali ekwenda pezhulu pegungwa, wakata sofana ukumubapindilila, 49 asi pabakombona ekwenda pezhulu pegungwa bakati ishaku bakalija imhele, 50 nokuti bose bakombona bakava mwoyo. Koga iye wakalebeleka nabo nokukambija akati kwabali, "Simani myoyo, musitye ndimi." 51 Wakenda akatanha mubwato mubakabeli, ibhepo lyakanyalala; Bakakashamiswa kasa,

Jesu unopa banhu bali zwiulu zwina zwokulya

1 Mumazhuba yayo, kwakaba noluvute lwakabungana koga besina zwokulya, Jesu wakashoba balayijwa babe akati kwabali, 2 "Ndinobawhila ishe banhu, nokuti ndagala mazhuba matatu ndilinabo koga besina zwokulya, 3 ndingoti bende kumisha yabo nezhala bamwe banozilika munzila nokuti bamwe banova kule."

4 Balayijwa babe bakonshandula beti, "Unhu angachiwana kupi chinkwa chingabaguncha banhu mugwa yeli?"

5 Iye wakabhuza akale akati, "Munazwinkwa zwingana?" Bakati "zwishanu zwina zwibili,"

6 Wakabuja banhu kuti begale pasi; wakatola zwinkwa zwishanu zwina zwibili, akaboka, akazwimedula akapa balayijwa kuti bepe banhu; bakabakobela banhu. 7 Akale bakabeli nehobe inshoma; wakajikombolela, akababuja kuti bepe banhu. 8 Bakalya bakaguta; bakanunga tufwapi twakabesala bakazhaja zwitundu zwishanu zwina zwibili. 9 Bakalya bakabeswika kuzwiulu zwina.

Jesu unofizha unkuyu

12 Nezhuba linotobela, pakubhuda kwabo kuBhetani wakaba nenzhala. 13 Wakabona unkuyu unamazhani echikule, akenda kwauli eti pamwe angawana zwokulya kwauli. Paakaswika wakawana pesina chinhu, koga mazhani oga chete nokuti aujakabeli unshaji wokuti ihuyu jibe ipo. 14 Wakalebeleka eti kwauli, "Kusibe noucholya zwizwalo zwizwo kuswikila nalini." Balayijwa babe bakazwiwha.

20 Zhingwanangwana bakati bepinda, bakabona unkuyu wakakoma nemiji yose. 21 Pita wakalangalila akati, "She lingani unti umwafizha wakoma."

22 Jesu wakashandula akati kwabali, "Akati ibani nokudimbwa kunaMwali." 23 Chokomende ndinoti kunamwi, umwe nomwe unoti kudunhu yeli, "nyamulwa uposelwe mugungwa," esinokahajika mumwoyo uwe koga edimbwa kuti zwaanoleba zwinotikana, zwinoba alo. 24 Nokudalo ndinomubuja nditi zwinhu zwose zwamunokumbila pakunamata dimbwani kuti mozwitambula, zwinoba alo. 25 Pose pamunomilika munamata, lekejelani bwose bamunandandu nabo, kutila kuti Tate benu bokudenga bemulekejele luchinyo lwenu.

Jesu unoshoba balayijwa botanga

1 Jesu wakati elimile kumbali kwegungwa lyeGenesaleti, igapo lyabanhu lyakezha kwaali beda kuwha iwhi lyaMwali, 2 Wakabona bwato bubili bulimumbali mwegungwa; bavubi bakaba babhuluka, bekusha mazamba abo, 3 Jesu wakangwina munabumwe bwato, bwakabeli bwaSimoni, wakonkumbila kuti esundile zwishoma bwato muvula, akagala pasi akatanga kulayija igapo eligele mubwato.

4 Paakapeja kulebeleka, wakati kunaSimoni, "Bigani bwato kulomila mupose mazamba mubhate ihobe."

5 Simoni wakashandula akati, "She tashinga busiku bose asi apana chatabhata, asi nokuti ndimwi mwaleba towaposa mazamba." 6 Bakaposa mazamba abo muvula bakabhata ihobe inji kasa, mane mazamba akatanga kujeluka, 7 bakashoba bakwaina babo bakabeli munobumwe bwato, bebakobola noluboko, kuti bezhe boobabhancha. Bakezha, bakazhaja bwato bwabo bubili mane bukajondyondyomela. 8 Paakabona yezwi, Simoni Pita wakazwiwigila munhambo jaJesu eti, "Bhudani pandili She, nokuti imi ndunchinyi."

9 Iye, naibo bose baluba naye, bakachenama, pezhulu pokubhata ihobe inji jakadai, 10 naJemusi naJoni bana baZebhedi bakabeli bakwaina baSimoni bakachenama. Jesu wakati kunaSimoni, "Usitye, kuvila nasi unoba umvubi wabanhu."

11 Pabakasenga bwato bwabo penyika kumbali kwegungwa, bakasiya zwose, bakontobela.

Jesu unonyalaja ibhepo muGungwa

22 Limwe izhuba wakatanha mubwato nabalayijwa babe, akati kwabali, "Ngativubukeni tinde museli mwegandwegulu." Bakangwina bakatanga lwendo, 23 bakati bechinotanga lwendo lwabo, iye wakabhatwa nehope akalala. Kwakaswika ibhepo igulwana linegampo, ivula ikatanga kungwina mubwato, bose bakaba mugubaji. 24 Bakenda kwaali bakomusa beti, "Tezi, Tezi, tabolopalala!"

Iye wakamuka, akakalalila ibhepo nevula yakabeli nobukali, zwose zwikava zwama kukaba nokunyalala. 25 Wakati kwabali, "Kuponi kudimbwa kwenu biya?"

Asi ibo bakakankabala bakatya, bakabhuzana beti, "Angaba ani yoyu unolaya ibhepo linabukali nevula, hezwo zwinonwhilila?"

Jesu unonyalaja ibhepo muGungwa

22 Limwe izhuba wakatanha mubwato nabalayijwa babe, akati kwabali, "Ngativubukeni tinde museli mwegandwegulu." Bakangwina bakatanga lwendo, 23 bakati bechinotanga lwendo lwabo, iye wakabhatwa nehope akalala. Kwakaswika ibhepo igulwana linegampo, ivula ikatanga kungwina mubwato, bose bakaba mugubaji. 24 Bakenda kwaali bakomusa beti, "Tezi, Tezi, tabolopalala!"

Iye wakamuka, akakalalila ibhepo nevula yakabeli nobukali, zwose zwikava zwama kukaba nokunyalala. 25 Wakati kwabali, "Kuponi kudimbwa kwenu biya?"

Asi ibo bakakankabala bakatya, bakabhuzana beti, "Angaba ani yoyu unolaya ibhepo linabukali nevula, hezwo zwinonwhilila?"

Jesu unolapa unhu unamadimoni

26 Bakaswika kunyika yeGenesaleti ilolingana neGalili

12 Kwakati kwaba madekwana, balayijwa babe igumi nababili bakezha kwaali bakati, "Lekeja banhu bende kumizi nokumisha ipo pelyo kuti bewane kulya nokuti yokuno timo mubugalo musina banhu."

13 Koga iye wakati kwabali, "Imwi bapeni zwokulya." Ibo bakati, "Tina zwinkwa zwishanu nehobe imbili chete. Kuzhe kwokuti tinobatengela kulya banhu bose yaba." 14 Banhulume bakabeswika zwiulu zwishanu.

Wakati kubalayijwa babe, "Babujeni begale pasi muzwikapo zwabanhu makumi mashanu."

15 Bakata alo bakagajika banhu bose pasi. 16 Wakatola zwinkwa zwishanu nehobe imbili, akalinga kudenga, akaboka Mwali, akamedula, akapa balayijwa babe kuti bekobele banhu. 17 Bakalya bakaguta bose. Bakakolela zwipemu zwakasala zwakazhaja zwitundu igumi lina zwibili.

Mabhiko Okulobolana kuKana

1 Nezhuba lyatatu kwakaba namabhiko kuKana muGalili, akale amai baJesu bakabelipo. 2 Jesu nabalayijwa babe, bakaba bakokwa kumabhiko okulobolana. 3 Iwaini payakapela, amai baJesu bakati kwaali, "abachina iwaini."

4 Jesu wakati kwabali, "Imwi mai, zwinani nami yezwi? Unshaji wangu aujanu waswika." 5 Amai babe bakati kubashingi, "Itani zwose zwaachamubuja." 6 Pakalepo, kwakaba kuli imbiya jamabwe ishanu nemwempela, jikabigwa yopo, jili jabaJuda songalilo wabo pakuchenesa, imwe neimwe inyamula malita angaba izana. 7 Jesu wakati kubashingi, "Izhajani imbiya nevula." Bakajizhaja imbiya kuti fwampi. 8 Wakati kwabali, "Ngweno tekani imwe musenge kuntungamili wamabhiko." Nezwo bakasenga. 9 Untungamili wamabhiko paakalabila ivula, yakababa iwaini. Aajakaziba kuti yava kupi (kojoba bashingi bakabateka ivula bakabezwiziba). Untungamili wamabhiko wakashoba undoboli, 10 akati kwaali, "Unhu wose unosotanga apa iwaini imbuya, kooti kana banhu banwa basungunuka, ndipo pakunobuzwa iwaini imbi, asi imwi mwalondota iwaini imbuya kujine kube ngweno."

11 Yechi chitondejelo chotanga chakatiwa naJesu kuKana muGalili. Wakatondejela lukujo lulwe, balayijwa babe bakadimbwa mwaali.

6 Yezwi wakazwileba onkweja, nokuti iye nokukwe wakabeziba kuti walutani.

7 Filipu wakonshandula eti, "Indipo yemyeji mishanu ina umwempela, aingatenge chinkwa chinokwana kuti umwe noumwe wabo ewane kababi."

8 Umwe wabalaijwa babe Endulu, mwanakwaina waSimoni Pita wakati kwaali, 9 "Pana umbisana yopano unazwinkwa zwebhali zwishanu nehobe imbili, koga yezwi zwingatani pabanhu bose yaba." 10 Jesu wakati kwabali, "Gajikani banhu pasi." Pakalepo pabugalo yobo pakabelina buhwa bunji, sezwo banhulume bakagala pasi, bakabeli bangaswika zwiulu zwishanu. 11 Kova Jesu etola zwinkwa, eboka, paakapeja, wakakobela yabo balubabeligele. Akabakobela nehobe naijo, bakalya madilo. 12 Akale pabakati baguta, wakabuja balayijwa babe eti, "Bunganisani zwimedu zwasala kusibe nezwichalashika." 13 Bakabunganisa, bakazhaja zwizuma igumi nezwibili zwezwimedu zwakava muzwinkwa zwishanu zwebhali, zwakasiyiwa naabo bakalya.

19 Bakati bayuwa, bakwenda makilomita angaba mashanu kana mashanu nelimwe, bakabona Jesu ekwenda pezhulu pegungwa akale esendela pelyo nobwato. Bakatya, 20 koga wakati kwabali, "Ndimi, musitye." 21 Pakalepo bakountambula mubwato, akale pakalepo bwato bwakaswika kunyika kwabakabenda.

Jesu Unozwitondejela Kubalayijwa Bashanu Nababili

1 Mushule moopo Jesu wakazwitondejela akale kubalayijwa kumbali kwegungwa lyeTayibheliyasi, wakazwitondejela nenzila yeyi. 2 Simoni Pita, Tomasi wakabeshobwa kuwhi imbile, Nataniyele unova kuKana muGalili, banabanhulumyana baZebhedi, akale nabamwe babalayijwa babili baluba pamwempela. 3 Simoni Pita wakati kwabali, "Ndikumunda kunovuba ihobe."

Bakati kwaali, "Tonda nawi." Bakabhuda bakenda bakangwina mubwato bukulwana, koga busiku yobo apana zwabakabhata. 4 Pakalepo kwaloboja, Jesu wakama pebhambo, koga balayijwa abajakaziba kuti ndiJesu. 5 Jesu wakati kwabali, ‘‘Bakwaina bangu munanehobe na?"

Bakonshandula beti, "Mane."

6 Akati kwabali, "Posani ivubo kululyi lwobwato, mobhata." Nokudalo bakaliposa, ngweno bakakonwa kulikuluntila mubwato, nokuwanda kwehobe.

7 Undayijwa waludiwa naJesu wakati kuna Pita, "NdiTezi." Simoni Pita paakawha kuti ndiTezi, wakambala zwimbalo zwizwe, nokuti wakabazwimbula, akalwipukila mugungwa. 8 Koga bamwe balayijwa bakezha nobwato, bekulunta ivubo lyakabeli zhele nehobe, nokuti bakaba besikule nenyika, koga kwaluswika izana lyamamita. 9 Pabakaswika penyika, bakabona moto wamasimbe, peli nehobe pakale nechinkwa. 10 Jesu wakati kwabali, "Ibuzani jimwe hobe jimwabhata ngweno."

11 Nokudalo Simoni Pita wakatanha mubwato akakuluntila ivubo lyakabelizhele ihobe ihulwana penyika, jakabeli izana lina makumi mashanu ane nhatu, kojoba jakabeli inji ivubo alijakajeluka.

Jesu Unochilisa Unshingi Wontungamili Wabezana WeRoma

5 Engwina muKapenaume, kwakezha kwaali untungamili wabalwi izana, akombweta 6 akale eti, "Tezi, unshingi wangu ulele nobukosha kungumba mukunyajikana kukulwana kasa."

7 Wakati kuna iye, "Ndichezha koonchilisa."

8 Asi untungamili wabezana wakashandula eti, "She andilokwelela kuti mungwine mungumba yangu, koga ilebani iwhi chete unshingi wangu unochila. 9 Nezwo ndinhu upo pasi pobutongi, ndina balwi behondo bapo pasi pangu, akale kunomwe wabo ndinoti, ‘Inda!’ kova enda, kunomwe ndoti, ‘izha!’ unozha, akale kundanda wangu ndinoti, ‘ita yezwi!’ kova ezwita."

10 Jesu paakonwha, wakachenama akati kuna yabo bakabontobela, "Chokomende muIzilayeli andijanu ndawana kudimbwa kwakadai. 11 Ndinomubuja banji banoova kubuvezhuba nokubumililo banoogala petebuli naAbhulahamu, Isaki naJakobe mubushe bokudenga, 12 banhu bobushe banoolashwa munhilima yokuzhe, yoko banhu banoolila akale meno anogedageda." 13 Akale Jesu wakati kuNtungamili wabezana, "Inda, utilwe sokudimbwa kuko."

Akale unshingi wakachijwa nonshaji wakaleyo.

Jesu Unochilisa banhulume babili banamadimoni

28 Akale Jesu paakaswika kunelimwe ibhazu, kunyika yabaGadalena, wakashangana nabanhu babili banamadimoni, beva kumakumbu, bakabetyisa zwokuti apana wakabepinda nooko. 29 Pakalepo bakashomeja beti, "unaneni zokuta nasu iwi Mwananhulumyana waMwali? wezha kotishunguluja unshaji usanu waswika na"

30 Feno idanga inji lyengulube lyakabechela, peli nakashizho kuva yopo pabakabeli. 31 Akale madimoni akombweta eti, "Kana mungotibhisa, mutisenge mudanga lyengulube."

32 Akale wakati kwaali, "Indani." akabhuda, akanongwina mungulube, akale idanga lyose lyakalabukila pebhilipili mane mugungwa, likanofila muvula.

33 Bacheji bakatizha benda kuguta, bakapupula zwose zwakabatikana akale nezwakatikana kubanhu banamadimoni. 34 Akale ilingani, iguta lyose lyakabhuda linda kunoshangana naJesu, pabakoombona bakonkumbila kuti ebhude munyika yabo.

Jesu unochilisa unhu usakabelebeleka

32 Bechinobhuda kuti bende, pakalepo, kwakabuzwa kwaali usakabelebeleka wakaba elinamadimoni. 33 Palyakabhiswa idimoni, usakabelebeleka wakalebeleka, mabunga akashama, eti, "Apana zwakadai zwanu zwabonwa muIzilayeli."

Jesu naBheluzabheli.

22 Bakabuza kwaali unhu waluba nedimoni, eli ibhofu akale esinotubula kulebeleka, wakonchilisa, mane unhu wakabesinolebeleka akalebeleka nokubona.

Luvumilo lonhukaji UNkenani

21 Jesu wakabhuda kwakale akenda kudunhu lyokuTile neSidoni. 22 Akale ilingani, unhukaji uNkenani waluva munyika yeyo wakezha ekwiila eti, "Ndiwhile ishe, Tezi, Mwananhulumyana waDavidi, mwananhukajana wangu ulobhatwa nesimba nedimoni."

23 Koga aajakonshandula kana iwhi limwempela. Akale balayijwa babe bakezha bakombweta beti, "Untatamile nokuti umutitobela ekwiila."

24 Wakashandula eti, "Ndakatumwa chete kumhwizi jakalashika jengumba yaIzilayeli."