1 Nokudalo kwejejelani Mwali sabana banodikana, 2 akale kwendani muludo, sezwo Kristo wakatida akatifila sompilo nombhayilo unonhuwilila kunaMwali.

3 Koga pakati penu akutokwelela kuba nobusangu kana kupi kusoshambijika kana kutangala, nokuti yezwi azwijilokwelela kubanhu bachena baMwali. 4 Kusibe nezwisheshemiso, kana kulebeleka zwobulema, kana isawu ihukutu, jisilokwelela koga ngakube kuboka Mwali. 5 Ibani nechokomende kuti apana usangu kana unhu usiloshambijika, kana unotangala ndiko kuti unokuja zwibezhwa, angaba undyifuma mubushe bwaKristo nobwaMwali.

6 Kusibe nouchamuchengela namawhi asinobaka nokuti munayezwi zwinhu bukali bwaMwali bunozha pezhulu pabasinowhilila. 7 Nokudalo musilyijane nabo, 8 mwaluba inhilima umwe nshaji, koga ngweno mwaba mwenje munaShe, kwendani sabana bomwenje, 9 nokuti michelo yomwenje inowanikwa muna zwose zwibuya, zwilolulama akale zwechokomende. 10 Kwejani kulayijwa zwinoshantisa Tezi. 11 Musiwanikwe mumishingo yenhilima isina michelo, koga zwifumuleni zwibe pachena. 12 Nokuti zwinopisa ishoni kulebeleka zwinhu zwabanota musiswa, 13 koga chili chose chafumulwa nomwenje chinoboneka, 14 nokudalo chili chose chinoboneka mwenje, sezwo kunowhi,

"Muka iwi ulele,

akale imuka mubafi,

akale Kristo unopenya paulu."

15 Lingisisani kasakasa ukwendelo wenu kuti ulichini, kusi samalema koga sabalochenjela. 16 Shingisani zwibuya nshaji unji nokuti timomumazhuba mabi. 17 Nokudalo musibe malema, koga whisisani kuti chido chaTezi ini.

18 Akale musikolwe newaini, nokuti ndimo munova kulundula, koga izhajwani noMpepo. 19 Lebelekisanani nekumo nejimbo akale nejimbo jompepo, mukwimba nokushanta kunaTezi mumyoyo yenu, 20 kuna zwose pani kuboka nshaji wose kunaMwali Tate muzina lyaTezi wedu Jesu Kristo.

21 Ibani pasi poumwe noumwe solulemeso kuna Kristo.

22 Bakaji zwidelejeni pasi pabalume benu, sokuna naTezi. 23 Nokuti undume ndiye unsholo wonkaji sezwo Kristo eli unsholo wegubungano, umbili uwe, akale eli uNchiji wawo. 24 Sezwo igubungano lili pasi paKristo, nezwo bakaji bo ngababe pasi pabalume babo muna zwose.

25 Balume, idani bakaji benu sezwo Kristo akada igubungano akazwipila nokuda kwalo. 26 Kuti elichenese iye, elishapuluja nokulishambisa nevula akale newhi, 27 kuti angapila igubungano kwaali emene mukungaima, pasina ibala kana kukokonyala kana zwimwe zwinhu zwakadalo kuti libe ijena lisina ibata. 28 Kojoba zwakadalo balume ngabede bakaji babo, sokuda kwabanota mibili yabo. Iye unoda unkaji uwe unozwidabo. 29 (Nokuti akuna unhu wakababenga umbili uwe, koga unoundondota nokuubhata zwibuyanana saKristo sezwaanota igubungano, 30 nokuti timhingu jombili uwe). 31 "Nechisoko yechi unhulume unosiya tate namai babe, etuko shanganiswa nonkaji uwe, akale babili yaba bachaba umbili umwempela." 32 Yeli isiswa igulwana akale ndileba zwaKristo negubungano. 33 Nokudalo, umwe nomwe wenu ngede unkaji uwe somwaanozwida, akale unkaji ngebone kuti unolemekeja undume uwe.