1 Paulu uMpositoli waKristo Jesu nokuda kwaMwali.

Kubachena balibo balobimbika munaKristo Jesu.

2 Chipiwo kwamuli nolunyalalo lunova kunaMwali Tate bedu nokuna Tezi Jesu Kristo.

3 Ngekombolelwe Mwali naTate baTezi wedu Jesu Kristo, wakati kombolela nezwikombolelo zwose zwompepo kubugalo bwokudenga munaKristo. 4 Kojoba akatishala muna iye, inyika isanhu yabumbwa, kuti tibe bachena akale tisina zwibi mbeli kukwe.

Wakatigajika muludo, 5 kuti tibe bana babe nomunaJesu Kristo pezhulu pobubuya bwakabeda, 6 mulukujo lwechipiwo chiche chinongaima, chaakatipa zwisina indipo kubadiwa. 7 Tina lusupuko muna iye, pezhulu pelopa lilye, nokulekejelwa koluchinyo lwedu, nokuda kwokufuma kwechipiwo chiche, 8 chaakatikashulila.

Nobuchenjevu bubwe bose akale nokuwhisisa, 9 wakatizibisa isiswa lyechido chiche, pezhulu pechinangwa chiche chibuya chaakalonga kupejeleja munaKristo. 10 Sobulongwa buzhele bonshaji ukumuzha, wokushanganisa zwinhu zwose zwokudenga nozwo pasi muna Kristo.

11 Muna iye, nokuda kwechinangwa chiche chantolo, iye unozhajikija zwinhu zwose pezhulu pokulaya nechido chiche, 12 isu takatanga kudimbwa munaKristo, tikashalwa akale tikaponchwa kulalamila kutunhumwija lukujo lulwe.

13 Muna iye mwakawha mawhi echokomende, iNdebo iMbuya yoluchijo lwenu, akale mwakadimbwa mwaali, mwakanamwa noMpepo uNchena umwakabimbiswa. 14 Chili chibimbiso cheshabo lyedu kuswikila tawana ifuma lolusupuko lyokutunhumwija lukujo lulwe.

15 Nechisoko yechi, nokuti ndakawha nokudimbwa kwenu munaTezi Jesu, noludo lwenu kubachena bose, 16 anditoleka kupa kuboka nozwenu, ndimukumbulukwa muminamato yangu, 17 kuti Mwali waTezi wedu Jesu Kristo, Tate bolukujo, bemupe umpepo wobuchenjevu akale nechitondejelo choluzibo lulwe. 18 Kuti mesho emyoyo yenu ezhulike, akale muzibe lubimbo lwaakamushobela, nokuti ini ifuma yolukujo, lweshabo iye kubachena, 19 akale ini bukulugulu businokwelaniswa bwesimba lilye munasu banodimbwa, nenzila yokushinga kobukulwana bubwe 20 ndilo lyaakashingisa paakamusa Kristo mubafi, akoonta kuti iye egale kululyi lulwe lwobugalo bwokudenga, 21 pezhulu pobutongi nobukulwana, nesimba nobushe, nopezhulu pamazina ose alobandwa kusi koono unshaji woga pe asi nounozha, 22 akale Mwali wakabiga zwinhu zwose pasi pamakumbo aKristo, kova onta untungamili wezwinhu zwose, etila igubungano 23 ilyo lili umbili uwe, kuzhala kukwe iye unozhaja zwose muna zwose.