1 Imwi wakamumusa kuva mukufa mwezwikanganiso zwenu noluchinyo, 2 lwamwakaba mwakwenda nalwo mutobela inzila yenyika yeyi, mutobela unchinda wesimba lyemipepo, iliyo ikumushinga ngweno mukati mwabana basinowhilila. 3 Pakati paba isu tose takabagala muludo lwemibili yedu, titobela zwilakamilo zwombili nendangalilo, nokudalo nolubumbo takatiwa bana bobukali sabanhu bose.

4 Koga Mwali, ulofuma neshe pezhulu poludo lulwe lukulwana lwaakatida nalwo, 5 kojoba patakabechakafa muluchinyo lwedu, takatiwa bapenyu pamwempela naKristo nokuti nechipiwo mwakachijwa, 6 akale Mwali wakatimusa naKristo, akale akata kuti tigale naye mubugalo bokudenga munaKristo Jesu, 7 kuti munshaji unozha etondejele ifuma isinobandika yechipiwo chiche mushe, kunasu muna Kristo Jesu. 8 Nokudalo nechipiwo chiche mwaka chijwa pezhulu pokudimbwa, yezwi azwitova kunamwi, koga chipo chaMwali, 9 zwisi pezhulu pemishingo, kuti kusibe nonhu uchashiya. 10 Nokuti tinshingo uwe, takabumbilwa munaKristo Jesu kuti tite mishingo mibuya yakalonganywa naMwali ntolo kuti tiite.

11 Ngweno kumbulukwani kuti noumwe unshaji mwakaba mulibokuzhe nokuzwalwa, mwaluwhi basakamhalajwa naabo banozwiti bakamhalajwa, zwinotiwa mumbili namaboko, 12 kumbulukwani kuti nooyo unshaji mwakabakapambulwa kuna Kristo, mwakaba mwasiyiwa kuzhe kwabanhu beIzilayeli, akale bavakule kuzwivumilano zwechibimbiso, musina lubimbo akale musina Mwali munyika. 13 Koga feno, munaKristo Jesu imwi mwaluba muli kule ntolo, ngweno mwakasendejwa pelyo nelopa lyaKristo. 14 Pakuti iye emene lunyalalo lwedu, nokuti wakatita bamwempela, akale akakolomola bulambo bolubengo, 15 iye wakajima mumbili uwe mulawo nezwilayijo, kuti ezwibumbe unhu umwepela mubanhu babili muna iye, kuti ete lunyalalo, 16 akale mumbili umwempela, wakata kuti induji imbili jikamujane kunaMwali nonchinjikwa wakapalaja lubengo. 17 Akale wakezha akabhaunula lunyalalo kunamwi mwakabeli kule, akale lunyalalo kunaabo bakabeli pelyo, 18 nokuti muna iye, isu tose tinoswika kunaTate noMpepo umwempela.

19 Nokudalo imwi amuchibavakule kana bakwendi pe, koga mwaba boluji lwabachena, muli bengumba yaMwali, 20 mwakabakwa pezhulu pamatangisilo abapositoli naba polofeti, Kristo Jesu emene eli iye ibhango chikabukabu chengumba, 21 chibakwa chose chinoshangana pamwepela, chiba itempeli ijena lyaTezi, 22 imwibo mulobakilwa panhu pamwempela nabamwe muna iye kuti mube ingumba yaMwali muMpepo.