1 Nokudalo imi unsungwa, waTezi, ndinokumbila kuti mulalame bupenyu bunokwelela kushobwa kwenu, 2 nokuzwideluja kose, nobunyolo nomwoyo ndefu, mutambulana umwe nomwe noludo. 3 Mudisisa kulondota bumwempela bwoMpepo muchisungo cholunyalalo. 4 Kuna uMbili umwempela noMpepo umwempela, sezwa mwakashobwa kuchibimbo chimwempela, chimo mukushobwa kwenu, 5 Tezi umwempela, luvumilo lumwempela, umbhabhatizo umwempela, 6 kuna Mwali umwempela akale eli Tate bedu tose, iye upezhulu pabose, nomuna bose akale muna bose.

7 Koga umwe noumwe wakapiwa chipiwo chinokwelaniswa nechipo munzila yanopa nayo Kristo. 8 Nokudalo kwakawhi,

"Paakatanha pezhulu

Wakatungamilila batapwa banji,

Akapa zwipo kubanhu."

9 Pakuti "wakatanha zhezhulu" zwinoleba ni? Zwinoleba kuti wakaba abhulukila kubugalo bunomila bwenyika. 10 Iye wakabhuluka, ndiye wakatanha akale pezhulu kumatenga ose, kuti ezhajise zwinhu zwose. 11 Wakapa zwipo zwizwe kuti bamwe bebe bapositoli, bamwe bebe bapolofeti, bamwe bebe babhaunuli beNdebo iMbuya, bamwe bebebalyisi begubungano, nabamwe bo bebe balayiji, 12 kupa bachena zwishingiso kuti bezwibambile kutamishingo yokubaka uMbili waKristo, 13 kuswikila tose tashangana mubumwempela bwokudimbwa nobwo luzibo lwoMwananhululmyana waMwali, tibumba uNhu ulo pelelela unokwelaniswa nechimilo chizhele chaKristo, 14 kutila kuti tisishobwe kuwhi tibacheche akale, tikungulijwa mbeli nomushule nokunyamulwa nemipepo yose inolayija maniepwa, tichengejwa nabanhu nobusoso bwabo. 15 Koga tilebeleke ilebeswa muludo, kuti tikubuke munzila jose tikwenda munaKristo, uli iye unsholo wedu, 16 zwivamuna iye, umbili wose unoshanganiswa pamwempela, nemhingu jose jishinga zwibuyanana jinokubusa umbili akale jizwibaka muludo.

17 Nokudalo ndinomusimisa, ndinomusimikijila munaTezi nditi ilekejani kulalama saBokuzhe banotobela zwisina unshingo mundangalilo jabo. 18 Bane ndangalilo jiloswibha kasa, bakapambukana nobupenyu bwaMwali nokuti apana chibanowhisisa, pezhulu pobukukutu bwemyoyo yabo. 19 Sezwabasichina ishoni, babanolunya akale bezwipila mububi bose, belakamila kuta zwose zweshambwa.

20 Azwitoba izwo zwimwakalayijwa nezwaKristo. 21 Ngatiti imwi mwakawha nezwizwe, pamwakalayijwa nezwizwe, nokuti ichokomende limo munaJesu. 22 Lashani ungalilo wenu wantolo, mumbule unhu wantolo, walusomuta kuti mugale mubupenyu busakalulama pezhulu pobuchengeji bwozwilakamilo. 23 Myoyo yenu nendangalilo jenu ngazwitiwe bupya zwilopelelela. 24 Akale ibani nobunhu bupya bunotojana naMwali muzwitondejela mubululami nomubuchena bwechokomende.

25 Nokudalo siyani maniepwa, umwenomwe ngelebe ilebeswa kumbakijani uwe, nokuti tose timhingu jombili umwempela chete. 26 Nyemani asi musichinye, akale izhuba lisimile mukanyema, 27 akale musipe Guluzhanje chibaka. 28 Imbava ngileke bubava, koga ngiishinge zwilobimbika namaboko ayo, kutila kuti itubule kubhancha yabo banoshayiwa. 29 Mumilomo yenu musi bhude malebo mabi, koga ebe mawhi mabuya onobaka sezwinokwelela kuta panoyo unshaji, kutila kuti chibe chikombolelo kunabo bawhile. 30 Musinyeteje uMpepo uNchena waMwali nokuti ndiwo wakamubigila imhande yawo kujine kuswike izhuba lyokumunulwa. 31 Kwose kulwajilwa komyoyo, nolunya, nokunyema, nokupopota, nokupita, nezwibi zwose ngazwibhiswe kwamuli, 32 itilanani ishe, myoyo minyolo, nokulekejelana, sezwa mwakalekejelwa naMwali munaKristo.