1 Pezhulu pechisoko yechi, imi Paulu, unsungwa waKristo Jesu ndakamilila imwi Bokuzhe, 2 ndinobimba kuti mose mwakawha nezwo nshingo wechipiwo chaMwali wandakapilwa imwi, 3 sezwandakatondejelwa kuti isiswa ndilizibe, sezwandakakwala mubufupi. 4 Pamuchabala yezwi mobonesesa luzibo lwangu musiswa lyaKristo, 5 lisakabazibiswa kubanhu, bezwimwe zwizekululu zwantolo, lyatondejelwa ngweno kubapositoli babe bachena nokubapolofeti noMpepo, 6 yeyi ndiyo inzila Bokuzhe ibanobanayo balyifumikwaina, nokuti baba umbili umwempela, bano kobana chibimbiso munaKristo Jesu mundebo imbuya.

7 Imi ndomene ndakashalwa kuba unshingi wendebo imbuya nokuda kwechipo chechipiwo chaMwali chandakapiwa pezhulu pokushinga kwamasimba awe. 8 Kojoba ndili untukutuku pakati pabachena bose, yechi chipiwo ndakapiwa kuti ndibhaunula kunaBokuzhe, bufumi bukulugulu bwaKristo, 9 kuti banhu bose bezibe bulongwa bulosisika, bwakasiswa kwamakole munaMwali umbumbi wezwinhu zwose, 10 kutila kuti, nomugubungano bachinda nabatongi bokumatenga bezibiswe kusiyana kobuchenjevu bwose bwaMwali. 11 Yezwi zwakendila mundangalilo iye yechinangwa chisinopela yakazhajikijwa munaKristo Jesu Tezi wedu, 12 muna Kristo atina kutya akale tobimba naye, kungwina kunaMwali, pezhulu pokudimbwa kwedu muna iye. 13 Nokudalo ndinokumbila kuti musilashe mwoyo nokusheteswa kwandinotiwa pezhulu penu, nokuti masheto angu lukujo lwenu.

14 Pezhulu pechisoko yechi ndinofhigama mbeli kwaTate, 15 kuva kunaiye imhuli yose kudenga nopenyika inopiwa izina, 16 kuti, zwindila mubufumi bolukujo lulwe ungati angasimisa unhu womukati mwenu nesimba lyompepo uwe, 17 akale kuti Kristo egale mumyoyo yenu nokudimbwa, kuti mujike miji akale mubakwe muludo, 18 Nezwo kuti imwi, pamwepela nabachena bose, kuti mube nesimba lyokuwhisisisa bwasha, bulefu, nokulebha, nontika, 19 kuti muzibe ludo lwaKristo lunopinda luzibo lwose, kuti muzhajwe nobupumbulu bose bwaMwali.

20 Ngweno kuna iye unesimba lyokuta zwinhu zwikulwana kasa zwinopinda zwose zwatinokumbila nezwatinoyeya namasimba awe, anoshinga mwatili, 21 kuna iye ngakube lukujo mugubungano nomunaKristo Jesu muzwizekululu zwose, kwemisi isinopela. Ameni.