Milagres de Jesus

Yesu aatepwa kimbulibuli abi’li'

27 Yesu paabile kabu’ka pandu palu', mbulibuli abi’li' baatikummi’ngi’ya kabau’bu’ya malobe gabe kababaya, "Wa Mwana wa Daudi, utubi’ki kiya!" 28 Yesu paayingi nnyumba, balu' mbulibuli abi’li' baatikunnyendelya, nembe ngaalaluya, "Mwendau’bi’lya panga niwesa kumpangya likowe lyo?" Nabembe ngabannyangwa, "Eloo, Bwana." 29 Bu’kapo Yesu ngagakunywa minyo gabe kabaya, "Kwinu mwenga, ipange kati mwamuu’bi’lya." 30 Minyo gabe ngagabanjuka. Yesu ngaakwi’li’ka kabaya, "Mupi’kani, likowe li', kanemummakiye mundu ywoywoti." 31 Lakini bembe ngabayenda no tumbwa yaulya abali ya Yesu munni’ma wu’lu' woti.

Yesu aatepwa kimbulibuli abi’li'

29 Yesu na banamasi' bake pabaabile kababu’ka kukilambo sa Yeliko, lipi’nga liku’lu' lya bandu lyaatikunki’ngama. 30 Bai, kwaai na kimbulibuli abi’li' baatami mbwega ya ndi’la, na pabayu’wine panga Yesu aabile kapi’ta ngabau’bu’ya lilobe, kababaya, "Bwana, Mwana wa Daudi, utubi’ki kiya!" 31 Li’lu' lipi’nga lya bandu ngalyaakalipya na kwabakia batame liki. Lakini bembe ngabayongeya u’bu’ya lilobe, kababaya, "Bwana, Mwana wa Daudi, utubi’ki kiya!" 32 Yesu ngayi’ma, kwakema na kwabakia, "Mupala nimpangi ki’li'?" 33 Ngabannyangwa, "Bwana, tulu’ba tepulwa minyo gitu." 34 Yesu ngaabi’kya kiya, na kwakunywa minyo gabe, saa yi’yi’lu’yi’lu' ngabalola, nabembe ngabanki’ngama.

Yesu ampanga alole mbulibuli wa ku Betisaida

22 Yesu na banamasi' bake ngabaika Betisaida. Ku’lu' ngabannetya mundu yumo mbulibuli na kunnu’ba Yesu ankunywe li’nga ayu’yu’ki’lwe. 23 Yesu ngaankamwa luboko aywo mbulibuli na kumpeleka panja ya kilambo. Ngaamwunia mmata muminyo, ngaammi’kya moko, ngannaluya, "Buli, wendawesa kukibona kili’be?" 24 Yu’lu' mbulibuli ngalola, ngabaya, "Naabona bandu, lakini babonekana kati mikongo yaityanga." 25 Bu’kapo, Yesu ngaammi’kya kai' moko muminyo. Minyo gake ngagabanjwa, ngatumbwa lola na kukibona kila kili’be wisowiso. 26 Yesu aammakiye ayende kasake na kumwamulisa, "Kaneubuye mukilambo."

Yesu antepwa mwene kimama na kiibamakutu

31 Bu’kapo Yesu ngabu’ka kuwilaya ya Tilo, aapi’ti Sidoni, ngaika kulitanda liku’lu' lya Galilaya munni’ma wa Dekapoli. 32 Akwo bandu ngabannetya Yesu mundu yumo kiibamakutu, kai' mwene kimama, ngabannu’ba Yesu abi’ke maboko panani ya aywo mundu li’nga akombwe yu’wa no longela. 33 Yesu ngammu’ya yu’lu' kiibamakutu pakipi’nga sa bandu yenda nakwe pakisake, ngannyi’ya ngonji yake mumakutu gake, ngauna mmata na kunkunywa lulimi kwa galu' mmata. 34 Bu’kapo ngalingulya kunani, ngauta mbu’mwo no eleya na kummakia, "Efata" lombolya, "Yu’gu’ka." 35 Papalu’palu' makutu na lulimi lwake ngaiyu’gu’ka. Ngatumbwa yu’wa no longela wisowiso. 36 Yesu ngaaking’indya kanebammakiye mundu, lakini kwa kila mwaaking’indyage panga kanebabaye, bembe ngabayongeya yaulya abali yo. 37 Ngabasangala muno, ngababaya, "Makowe goti gaapangite manogau muno, ata aapangiye aibamakutu bayu’we na bene kimama balongele wisowiso."

Yesu antepwa Batolomayo mbulibuli

46 Bu’kapo ngabaika Yeliko. Yesu paabile kabu’ka pakilambo so na banamasi' bake pamope na kipi’nga kiku’lu' sa bandu, mbulibuli yumo lina lyake Batimayo, mwana wa Timayo, aabile atami mbwega ya ndi’la kalu’ba yangatiyilwa. 47 Paayu’wine panga Yesu wa ku Nasaleti aabile kapi’ta, ngatumbwa u’bu’ya lilobe kabaya, "Yesu, Mwana wa Daudi, unibi’ki kiya!" 48 Bandu baingi ngabankalipya kwa kummakia atame liki, lakini ywembe ngau’bu’ya lilobe kai' kwa makakala kabaya, "Yesu, Mwana wa Daudi, unibi’ki kiya!"

49 Yesu ngayi’ma no baya, "Munkeme aise pano." Bai ngabankema yu’lu' mbulibuli, ngabammakia, "Ube na mwoyo nku’lu'! Ukatuke, endakukema." 50 Ngataikwa nganju yake no yi’ma kiyu’ngu’ya, na kunnyendelya Yesu.

51 Yesu ngannaluya, "Upala nikupangi ki’li'?" Yu’lu' mbulibuli ngayangwa, "Mwalimu, mbala lola."

52 Yesu ngammakia, "Uyende, imani yako ikutepwile." Popopo aakombwi lola, ngaanki’ngama Yesu kundi’la.

Yesu antepwa mbulibuli ku Yeliko

35 Yesu pai papipi na ku Yeliko, kwai na mundu yumo mbulibuli atami mundi’la kalu’balu’ba. 36 Paayu’wine lipi’nga lya bandu kalipi’ta ngalaluya, "Kubile na ki’li'?" 37 Ngabammakia, "Yesu wa ku Nasaleti endapi’ta." 38 Naywembe ngatu’ndu’bi’ya lilobe kabaya, "Yesu, Mwana wa Daudi, unibi’ki kiya!" 39 Balu' babaalongolile, ngabankwi’li’ka na kummakia atame liki. Lakini ywembe ngayendelya tu’ndu’bi’ya lilobe, "Mwana wa Daudi, unibi’ki kiya!" 40 Yesu ngayi’ma na kwabakia panga bannete nnu’ngi' yake. Palu' yu’lu' mbulibuli paikite papipi, Yesu ngannaluya, 41 "Upala nikupangi ki’li'?" Naywembe ngannyangwa, "Bwana, nilu’ba nikombwe lola." 42 Yesu ngammakia, "Ulole! Imani yako ikutepwile." 43 Na popopo aywo mbulibuli aakombwi lola, nganki’ngama Yesu kankwi’ya Nnu’ngu'. Na bandu boti pabagabweni go, bannumbike Nnu’ngu'.

Yesu antepwa mundu ywabelekwi mbulibuli

1 Yesu paabile kapi’ta, aamweni mundu yumo, mbulibuli bu’ka belekwa. 2 Bai, banamasi' ngabannaluya, "Mwalimu! Ywaku' ywapangite sambi, ayu' au abelei bake, mpaka abelekwe mbulibuli?" 3 Yesu ngaayangwa, "Likowe li' lipitikeli kwa kitumbu sa sambi yake ywembe, wala sambi ya abelei bake, ila aabelekwi mbulibuli li’nga makakala ga Nnu’ngu' gabonekane kagapanga kasi nkati yake. 4 Kubile balo muntwekati, tupalikwa yendelya panga lyengo lya yu’lu' ywanitumike, kwa mwanjaa kilo sendaisa so kotoka panga mundu lyengo. 5 Panibaa mudunia, nenga nga nabweya wa padunia." 6 Bu’ka po baya go ngaunia mmata pai', na kuutepengaya ukando kwa mmata gake, ngaampakaya yu’lu' mbulibuli mminyo, 7 ngammakia, "Uyende ukauluwe mulitanda lya Siloamu." (Siloamu lombolya, "Ywatumilwe"). Bu’kapo aywo mbulibuli ngayenda uluwa no buyangana kalola.

2 Mundu yumo mwene matana ngaisa kilikita nnu’ngi' yake kammakia, "Bwana, mana upendile, unipeleteye." 3 Yesu nga golwa luboko lwake na kunkunywa mundu yu’lu', kummakia, "Mbala, upeleteke." Yu’lu' mundu ngaimukya matana gake gapeletike. 4 Bu’kapo, Yesu ngammakia, "Likowe li' ulibi’ke pamwoyo wako, kaneummakiye mundu. Lakini uyende kwa mpi’ndo wa dini ukannaye mwobile nambi’yambi'. Bu’kapo, upiye salaka kati mwaamulise Musa, li’nga ipange ukong’ondeli kwa bandu boti panga upeleteyilwe."

2 Na ku’lu', banneti mundu mwene utamwe wo tomboloka agonjike pakindanda. Yesu paabweni balu' bandu mwabaamwu’bi’lile, ngammakia yu’lu' ywatombolwike, "Mwana wangu', uku’le mwoyo, masambi gako gasamilwe." 3 Kwa kitumbu sa likowe lyo, bi’ngi' ba balimu ba salya, ngabawasa mumyoyo yabe, "Mundu yu' ankupulu Nnu’ngu'!"

4 Lakini Yesu abile agatangite gabagania, ngaalaluya, "Mwanjaa namani mugania makowe malau mumyoyo yinu? 5 Buli, kikowe saku' sakibile kiyu’yu’u kukibaya, ‘Masambi gako gasamilwe’ au baya, ‘Uyi’me, uyende’? 6 Bai, mbala mutange panga Mwana wa Mundu abile na amuli yo samya sambi pano padunia." Kwa nyo ngammakia yu’lu' mundu ywatombolwike, "Uyi’me, witwi’ke kindanda sako, uyende kasako."

7 Yu’lu' mundu ngayi’ma no yenda kasake.

10 Mu’lu' nnyumba kwabile na mundu mwene luboko lutomboloka. Bandu ngabannaluya Yesu, "Buli mwiloli kuntepwa mundu lisu’ba lya Sabato?" Bannalwiye nyo li’nga bapate kitumbu sa kunsitakya.

11 Yesu ngaabakia, "Tubaye yumo ywinu ai na ngondolo wake ywatumbuki mulyi’mbwa lisu’ba lya Sabato, buli, ankamwali na kumpiya? 12 Lakini mundu nga ywampu’ku’bi’la kulikoni ngondolo! Bai, mwiloli panga ganannoga lisu’ba lya Sabato." 13 Bu’kapo ngammakia yu’lu' mundu, "Golwa luboko lwako." Ngalugolwa, na lwembe ngalupanga lukoti kati lu’lu' lwi’ngi'.

30 Bai, mau' yumo, nkiwe Simoni aai pakindanda kaminya oma ngali'. Yesu paikite bai, ngabammakia abali yo. 31 Yesu ngannyendelya aywo mau' na kunkamwa luboko, ngantu’ndu’bi’ya. Yi’lu' oma ngayu’yu’ki’lwa, ngatumbwa kwatumikia.

Yesu antepwa mundu mwene matana

40 Mundu yumo mwene matana annyendeli Yesu, ngakilikita, ngannu’ba, "Mana upendile, wendakombwa kunitepwa li’nga nipeleteke!" 41 Yesu ngammi’kya kiya, ngagolwa luboko lwake, ngankunywa na kummakia, "Mbala upeleteke." 42 Popopo mundu ywo ngayu’yu’ki’lwa galu' matana, naywembe ngapeleteka.

3 bandu nsese bannetike mundu yumo ywatombolwike abile mpu’tu’lwa mulikai. 4 Kwa kitumbu sa uyolou wa bandu, bakombwili kumpeleka papipi na Yesu. Bai, ngabaotwa mwagala wawaabile panani ya Yesu. Pabaapatike lipala, ngabamweleya aywo mundu. 5 Yesu paabweni imani yabe ngangamau, ngammakia yu’lu' mundu ywatombolwike, "Mwana wangu', usamilwe masambi gako."

6 Bi’ngi' ba balimu ba salya ya Musa babaatami palu' ngabagania mumyoyo yabe, 7 "Akombwabuli longela nyo? Ankupulu Nnu’ngu'! Ntu’pu' mundu ywakombwa samya sambi ila Nnu’ngu' kisake." 8 Popopo Yesu ngakwipwa maganio gabe, ngaabakia, "Mboni mugania nyo mumyoyo yinu? 9 Nga lyaku' lyalibile kwaani muno, kummakia mundu yu' ywatombolwike, ‘Usamilwe masambi gako,’ au kummakia, ‘Uyi’me! Utole likai lyako utyange’? 10 Bai, mbala mutange panga Mwana wa Mundu abile na utawala wa kwasamya bandu sambi padunia." Apo ngammakia aywo mundu ywatombolwike, 11 "Nikubakia uyi’me, utole likai lyako uyende kasako!" 12 Popopo, bandu boti baabile kabannola aywo mundu mwayi’ma, tola likai lyake no bu’ka. Boti ngabasangala na kunkwi’ya Nnu’ngu' kababaya, "Tunalibonali likowe kati li’no."

Yesu antepwa mwene luboko lutomboloka

1 Yesu aayingi kai' munyumba ya kunnu’ba Nnu’ngu' na amo kwaabile na mundu yumo mwene luboko lutomboloka. 2 Mafalisayo baabile kabanni’nda bammone kantepwa mundu ywo lisu’ba lya Sabato ya Ayahudi, li’nga kunsitakya. 3 Yesu ngammakia yu’lu' mundu mwene luboko lutomboloka, "Wise pano pakatikati." 4 Bu’kapo ngaalaluya, "Salya yendayi’ki’ti’a panga manogau au maakau lisu’ba lya Sabato? Tepwa au bulaga?" Lakini bembe baayangwili kikowe. 5 Yesu ngaabu’nju’lya minyo kwa nyongo kausunika kwa kitumbu sa unonopau wa myoyo yabe, ngammakia yu’lu' mundu, "Golwa luboko lwako." Ngalugolwa na lwembe ngalupanga lukoti.

Yesu antepwa mwene matana

12 Yesu paabile pakilambo simo sa nni’ma wo, ngakwembana na mundu mwene matana yi’ga yoti. Mundu ywo ngagonja ukukama na kunnu’ba Yesu, "Bwana mana upendile, wendakombwa kunipeletea."

13 Yesu, ngagoloya luboko, ngankunywa no baya, "Mbala, upeleteke!" Popopo matana gake ngagammu’ka.

18 Ngabaisa bandu bampu’twile mumasela mundu ywatombolwike yi’ga. Bapalage kunnyingiya nnyumba li’nga bammi’ke nnu’ngi' ya Yesu. 19 Bu’kana no yoloka kwa bandu, baakombwili kunnyingiya nnyumba, ngabaamwa bau’bu’ke pamwagala, no bu’ya iyonjo yabayipile na kumwuluya mumasela nnu’ngi' ya Yesu, 20 Yesu paabweni bai na imani ngu’lu', ngammakia aywo mundu, "Mbwiga, masambi gako usamilwe."

21 Balimu ba salya na Mafalisayo ngabailaluya, "Ayu' nyai ywalongela mayi’gi’yo ga kupulu? Ntu’pu' mundu ywakombwa samya sambi, ila Nnu’ngu' kisake!" 22 Yesu wakwipwi gabagania ngaalaluya, "Mugania ki’li' mumyoyo yinu? 23 Lyaku' lyalibile liyu’yu’u muno baya, ‘Usamilwe sambi,’ au baya, ‘Yi’ma uyende’? 24 Bai, mbala mutange panga Mwana wa Mundu abile na amuli yo samya bandu sambi padunia." Apo ngammakia yu’lu' mundu ywatombolwike, "Nikubakia, uyi’me utole masela gako uyende kasako." 25 Bu’kapo, yu’lu' mundu ywatombolwike ngayi’ma nnu’ngi' yabe boti, ngatola saagonjelile no yenda kasake, ku’no kankwi’ya Nnu’ngu'.

Mundu mwene luboko lutomboloka

6 Lisu’ba li’ngi' lya Sabato ya Ayahudi, Yesu aayingi munyumba ya kunnu’ba Nnu’ngu' no yi’gana. Mu’lu', mwaabile na mundu ywalemile luboko lwamalyo. 7 Balimu ba salya na Mafalisayo bapalage kitumbu sakunsitakya Yesu, kwa nyo baatikumpekeseni bannole mana alu’a kuntepwa mundu lisu’ba lya Sabato ya Ayahudi. 8 Lakini Yesu aatangite mwabaganiage, ngammakia yu’lu' mwene luboko lutomboloka, "Kakatuka, uyi’me pakatikati yabe." Ngayenda no yi’ma. 9 Yesu ngaabakia, "Ninnaluya mwenga, lisu’ba lya Sabato ya Ayahudi nantali panga makowe manogau au ganannyata, tepwa au bulaga?" 10 Paaloi boti bababile palu' ngammakia yu’lu' mundu, "Goloya luboko lwako." Naywembe paapangite nyo, luboko lwake lwapangite lukoti kai'.

Yesu antepwa ntumisi wa mpi’ndo wa yesi lya Roma

1 Payomwi longela gaabini kwabakia bandu, Yesu aayi’i ku Kapernaumu. 2 Akwo kwaai na mpi’ndo yumo wa yesi ywembe mpangakasi wake ywampendile, endeminya na kiwo sendekumwegelelya. 3 Yu’lu' mpi’ndo wa yesi paayu’wine makowe ga Yesu, ngatuma agoi nsi’si' ba Kiyahudi, bakannu’be Yesu li’nga santepwe mpangakasi wake. 4 Pabaikite kwa Yesu, baatikumpembelelya kababaya, "Ili’ngani mundu yu' umpangi likowe li'. 5 Kwa kitumbu ywembe aaupendi muno nni’ma witu na ngaywatusengi yi’lu' nyumba ya kunnu’ba Nnu’ngu'." 6 Bai, kabayenda, baalongwaniye na Yesu. Pabaabile kabaegelya panyumba ya yu’lu' mpi’ndo wa yesi, ngatuma mambwigalye bakammakiye Yesu, "Bwana, kanewisuluye muno, kwa mwanjaa nenga ili’nganili wenga yingya munyumba yangu'. 7 Kwa nyo, nga kitumbu sanikotwike isa kwaubile, naibweni nili’nganili. Ila ulongele bai likowe, na mpangakasi wangu' alu’a lama. 8 Nanenga nibi pai' ya utawala nyonyonyo, na nibile na banayesi pai' yangu'. Nimmakia yumo, ‘Yenda,’ ywembe endayenda, nimmakia ywi’ngi' ‘Isa!’ nembe endaisa, na mpangakasi wangu' ‘Panga kikowe si'!’ nembe endapanga."

9 Yesu payu’wine go, aatisangala, aakigalambuki si’lu' kipi’nga sa bandu sakimmi’ngi’yage, ngabaya, "Nammonali mundu mwene imani ngu’lu' kati yi' mu Isilaili yoti!" 10 Balu' bandu babaatumilwe kwa Yesu pabaabukiye kasake yu’lu' mpi’ndo, bankoli yu’lu' mpangakasi ayu’yu’kilwe.

11 Na po, kwabile na nnwawa yumo ntamwe kwa myaka ku’mi na minane aayingililwe na moka. Kwa mwanjaa nyo, ng’ongo wake waatilemala muno ata akombwageli yi’ma wi’ma. 12 Yesu pamweni aatikunkema ngammakia, "Mau', utamwe winu mutepulilwe." 13 Aammi’ki maboko gake pantwe na popopo, yi’ga yake yapatike makakala go yi’ma kai' na ankwi’yite Nnu’ngu'.

Yesu antepwa mundu yumo

1 Lisu’ba limo lya Sabato ya Ayahudi, Yesu aayi’i lya kunyumba yimo ya alongosi ba Mafalisayo, bandu baabile popo kabannolekeya. 2 Nnu’ngi' yake Yesu, kwaabile na mundu yumo ywaminyage kitamwe so imba payi’ga. 3 Yesu aalalwiye balimu ba salya na Mafalisayo, "Buli, yendayi’ki’ti’lwa kuntepwa mundu lisu’ba lya Sabato?" 4 Lakini bembe bayangwili. Yesu ankamwi ywo ntamwe, kuntepwa na kunneka aibu’ki.

Yesu apeletea bene matana ku’mi

11 Yesu paabile mumwanja kayenda ku Yelusalemu, api’ti mumipaka ya ku Samalia na ku Galilaya. 12 Paabile kaika pakilambo simo, akwembine na bandu ku’mi bene matana, bayi’mi kuutalu. 13 Ngabatu’ndu’bi’ya malobe kababaya, "Yesu, wa Mpi’ndo, utubi’ki kiya!" 14 Paabweni ngaabakia, "Muyende mukailaye kwa api’ndo ba dini." Bai, pabaabile kabayenda, ngabapeleteka. 15 Yumo mukipi’nga sabe paibweni apeletike, aatiki’li’bu’ka kannumba na kunkwi’ya Nnu’ngu' kwa lilobe liku’lu'. 16 Aagonjike pai' wakukama nnu’ngi' ya magu’lu' ga Yesu ku’no kansukulu. Aywo aai Nsamalia. 17 Apo Yesu ngalaluya, "Nengite naapeletiye bandu ku’mi? Balu' kenda bai kwaku'? 18 Abonekineli ywi’ngi' ywaki’li’bwike kunsukulu Nnu’ngu' ila aywo nng’eni Nsamalia bai?" 19 Yesu ngammakia aywo mundu, "Uyi’me, uyende kasako, imani yako ikupeletiye."

Yesu antepwa mundu papipi na litanda lya masi'

1 Bu’ka pa go kwai na si’li’ku’si’li’ku' ya Ayahudi, nembe Yesu ngayenda ku Yelusalemu. 2 Akwo Yelusalemu papipi na nniango waukemelwa Nniango wa Ngondolo, kwabile na litanda lya masi' lyalyaakemilwe kwa Kiebrania Bethzatha. Litanda lyo lyati’li’ti’yilwe na yega tano. 3 Apo paai na bandu masikini baingi, atu’lu’ka minyo, itewe na babatombolwike, bali’ndage masi' gayu’geyu’ge. 4 Kwa mwanjaa malaika wa Bwana aaulwike kwo kokotya nkati ya li’lu' litanda, na kugatingibwana masi'. Ntamwe ywalongolya yingya nkati ya litanda masi' pagatingibwanilwa, utamwe wowoti waminyage, waatibu’ka. 5 Bai, apo paabile na mundu yumo ywai ntamwe kwa myaka salasini na minane. 6 Yesu paamweni aywo mundu agonjike, naywembe aatangite panga aabile ntamwe kwa myaka yambone ngammakia, "Upala ube wankoto?" 7 Yu’lu' ntamwe ngayangwa, "Bwana, nenga ntu’pu' mundu wa kuniyingiya mulitanda, masi' pagatingibwanilwa. Kila pagatingibwanilwa, nipaya yingya nkati ya masi', mundu ywi’ngi' anilongolya yingya." 8 Yesu ngammakia, "Uyi’me witwi’ke likai lyako, uyende kwa magu’lu' gako." 9 Imukya, yu’lu' mundu atepulilwe ngatola likai lyake no tumbwa yenda. Likowe lyo lyapangike lisu’ba lya Sabato ya Ayahudi.

46 Yesu aaikite kai' kukilambo sa kana, kunkoa wa Galilaya, pandu paagalambwiye masi' panga divai. Kwaabile na mpi’ndo yumo wa silikali ywaabile na mwana ntamwe akwo ku Kapernaumu. 47 Bai, aywo mundu paayu’wine panga Yesu aaisi popo pa Galilaya bu’ka ku Yudea, aatikunnyendelya na kunnu’ba aise antepwe mwana wake ywaabile ntamwe katetelya. 48 Yesu ngammakia, "Mwabandu mwenga mana mukotwike kwibona myasu na mangelongelo mwau’bi’lyali katu." 49 Yu’lu' mpi’ndo wa silikali ngammakia, "Bwana, nikulu’ba wise mwana wangu' abile balo anawaali." 50 Yesu ngammakia, "Uyende bai, mwana wako ayu’yu’kilwe." Aywo mundu ngau’bi’lya gaalongei Yesu, ngabu’ka. 51 Paabile mundi’la aakwembine na atumisi bake ngabammakia panga, mwana wake aai mwu’mi. 52 Nembe ngalaluya saa yayu’yu’kilwe mwana, ngabammakia, "Oma wammu’i liso musaa saba ya muntwekati." 53 Abo tati' ba mwana ngabaku’mbu’kya panga ayo nga yai saa yabakiyilwe na Yesu, "Mwana wako ayu’yu’kilwe." Kwa nyo ywembe pamope na boti ba panyumba yake ngabamwu’bi’lya Yesu. 54 Awo waai mwasu wenebi’li' waupangite Yesu kabu’ka Yudea yenda Galilaya.

20 Nnwawa yumo ntamwe wa nkongomokwa kwa myaka ku’mi na ibi’li', aaisi nsu’gu' ya Yesu no kunywa mpindo wa ngu’bo yake. 21 Mwanjaa aalongei pamwoyo wake panga, "Mana nikunywile ngu’bo yawati bai, naayu’yu’ki’lwa." 22 Nembe Yesu paagalambwike, ngammona na kummakia, "Wenga wa mwi’nja wangu', ube na mwoyo nku’lu'! Imani yako ikutepwile." Yu’lu' nnwawa ngayu’yu’ki’lwa saa yi’yi’lu’yi’lu'.

25 Na nkati yabe kwabile na nnwawa yumo mwene utamwe wa nkongomokwa kwa myaka ku’mi na ibi’li'. 26 Nnwawa ywo aatiauka muno kwo yenda kwa ang’anga bambone. Pamope no panga aatumi mali yake yoti, aayu’yu’kilweli ila aayendeli minya muno. 27 Paayu’wine abali ya Yesu, nnwawa ywo aatiisa no yingya pakatikati ya lipi’nga lya bandu kusu’gu' ya Yesu no kunywa ngu’bo yake. 28 Aapangite nyo kwa mwanjaa aabaite pamwoyo wake panga, "Mana nikunywile ngu’bo ya Yesu bai, nalu’a yu’yu’ki’lwa."

29 Popopo nkongomokwa wake ngauyu’ma na ngaibona payi’ga yake panga payu’yu’kilwe.

43 Bai, kwai na nnwawa yumo pakatikati ya si’lu' kipi’nga sa bandu, ywembe abi na utamwe wa nkongomokwa kwa myaka ku’mi naibi’li'. Pamope no panga aayomwi ili’be yake yoti kwapelekya aganga, ntu’pu' ywaakombwi kuntepwa. 44 Aywo nnwawa aammi’ngi’yite Yesu nsu’gu', ngapakunywa mpindo wa nganju yake. Pakunywile, popopo utamwe wake waatikummu’ka. 45 Yesu ngalaluya, "Aywo nyai ywanikunywile?" Boti ngababaya panga, ntu’pu' mundu ywakukunywile. Nembe Petili ngabaya, "Mpi’ndo, kipi’nga sa bandu kitekuti’li’ta no kukutwi’li’lya." 46 Lakini Yesu ngabaya, "Kubi na mundu ywanikunywile, mwanjaa nigabweni makakala kaganibu’ka." 47 Yu’lu' nnwawa waibweni panga akombwali iya, ngapapitya nnu’ngi' ya Yesu ku’no kalendema kwo yogopa, ngaitu’ya pai, Yesu kannola. Apo, ngalongela nnu’ngi' ya bandu boti kitumbu sa kunkunywa Yesu na kitumbu sapatike tepulwa. 48 Yesu ammakiye panga, "Biti, kwo u’bi’lya kwako uponi, uyende kwa amani."

Mwi’nja wa mpangakasi wa silikali na mau' yumo bendatepulwa

18 Yesu paabile kaabakia makowe go, ngaisa mpi’ndo yumo na kunkilikitya nnu’ngi' yake kammakia, "Mwi’nja wangu' awile nambi’yambi', lakini sonde li’li’li', wise saubi’ke luboko lwako panani yake, li’nga apate yu’ka." 19 Yesu pamope na banamasi' bake ngabammi’ngi’ya yu’lu' mundu.

23 Yesu paaikite kasake yu’lu' mpi’ndo, ngaabona bandu kabayi’mba myambo yo lombola kwa pilimbi, na kipi’nga sa bandu kabapanga ndu’ti, 24 ngaabakia, "Mubu’kange! Kwa mwanjaa mwi’nja yu' anawaali, ila atigonja bai." Ngabamweka kwa kunsalawa. 25 Payomwi kwabi’ngya panja balu' bandu, ngayingya nnyumba na kunkamwa luboko yu’lu' mwi’nja, nembe ngayi’ma.

22 Bu’kapo ngaisa mundu yumo nku’lu' wa nyumba ya kunnu’ba Nnu’ngu' ywakemelwage Yailo. Paamweni Yesu, ngaitaikulya nnu’ngi' yake, 23 nganku’ku’li’kya kabaya, "Biti wangu' nsene endakomya. Sondesonde nikulu’ba tubu’ke ukammi’ki moko gako li’nga ayu’yu’ki’lwe no lama." 24 Bai, Yesu ngayenda pamope nakwe. Bandu baingi baatikunki’ngama na ngababa kabapatigana kila pandu.

38 Pabaaikite kunyumba yake, Yesu ngayu’wa ndu’ti, kili’lo no lombola muno. 39 Ngayingya nnyumba ngaabakia, "Mboni mupanga ndu’ti no li’la? Biti anawaali ila atigonja bai." 40 Bembe ngabamweka kwa kunsalawa. Bai ngaabi’ngya panja boti, ngaatola abelei ba yu’lu' biti na balu' banamasi' bake yingya ku’lu' kuswi kwaabile aywo biti. 41 Bu’kapo ngankamwa luboko, ngammakia, "Talita, koumu," lombolya kwake, "Biti, nikubakia, uyumuke!" 42 Popopo biti ywo ngayi’ma, tumbwa tyanga. (Aabile wa nng’elo wa myaka ku’mi na ibi’li'.) Apo bandu baatisangala pi’ta.

31 Yesu ngaalaluya, "Bandu ba lubelekwo lu', nalandaniye na kili’be gani? Bandu ba uyi’me gani? 32 Landana kwabe kati bana babatamaga palisoko, kababakiana kipi’nga simo na si’ngi',

‘Tumwonekiye ngoma, namwenga mwinikeli!

Tunnyi’mbi myambo ya ili’lo lakini muli’ili!’

33 "Kwa mwanjaa Yoani paisile, nembe endage punga na anywageli wi’mbi', namwenga mwabaite, ‘Ayingililwe na moka!’ 34 Nembe Mwana wa Mundu aisi kaalya no nywa, na mwenga mubaya, ‘Munninge ayu' mundu mila no lobya, mbwiga wa alonga koli na bene sambi!’ 35 Ata nyo, ikima ya Nnu’ngu' ikong’ondeli panga inannoga kwa balu' boti babaiyi’ki’tya."

Yesu kasake Simoni Mfalisayo

36 Mfalisayo yumo ankemite Yesu akalye kilyo kasake. Ngayingya nnyumba ya ywo Mfalisayo, aatitama no lya. 37 Bai, pakilambo si’lu' kwai na nnwawa yumo mwene sambi. Paayu’wine panga, Yesu abile nnyumba ya ywo Mfalisayo, aapu’twi supa ya liwe yene mauta ganannungya.

41 Apo ngaisa mundu yumo ywakemelwage Yailo, mpi’ndo wa nyumba ya kunnu’ba Nnu’ngu'. Aitaikuli pamagu’lu' ga Yesu na kunnu’ba ayende kasake. 42 Kwa mwanjaa mwi’nja wake ywabelekwi kisake, ywa myaka ku’mi na ibi’li' endekomya.

Yesu paayendage, bandu bendekuntwi’li’lya na kunkunywa ku’no na ku’no.

49 Paabile balo kalongela, Yailo aaletilwe abali bu’ka kaya, "Mwi’nja wako awile, sakunsulukia muno Mwalimu saku'." 50 Yesu pagayu’wine go, ngammakia Yailo, "Kaneuyogope, we wu’bi’li bai alu’a tepulwa."

51 Yesu paikite kasake Yailo, annyi’ki’tiyeli mundu yingya nnyumba pamope nakwe, ila aayingi na Petili, Yoani, Yakobi na abelei ba aywo mwi’nja. 52 Bandu boti baabile kabali’la no lombola mwakipitike kiwo sake. Yesu ngaabakia, "kanemuli’le, mwana atigonja bai, anawaali!" 53 Bandu ngabamweka kwa kunsalawa panga atangiteli kiwo, mwanjaa bembe baatangite awile. 54 Lakini Yesu ankamwi luboko na kummakia, "We mwana, yumuka!" 55 Bwu’mi wake ngaubuyangana, no yumuka. Yesu ngaabakia, bampei kilyo. 56 Abelei bake batisangala kummona mwu’mi, lakini Yesu ngaaking’indya panga, kanebammakiye mundu ywoywoti aga gagapangilwe.

Kiwo sa Lasali

1 Bai, kwai na mundu yumo ywakemelwage Lasali aai ntamwe. Aywo atamage kukilambo sa Betania na alu’mbu’be Malia na Malita. 2 Malia nga yu’lu' ywaampakiye Bwana mauta mumagu’lu' na kumponwa kwa nywili yake. 3 Bai, abo akinaalu’mbu’be ngabapeleka abali kwa Yesu, "Bwana, yu’lu' mbwigalyo ywaumpendile endaminya."

4 Yesu paayu’wine nyo ngabaya, "Utamwe wo wakumpanga awee lili, ila kwa kitumbu sa kunkwi’ya Nnu’ngu'. Endaminya li’nga kwa ndi’la yo, Mwana wa Nnu’ngu' akwi’yi’lwe."

5 Yesu aapendi Malita, Malia na Lasali nnuna wabe. 6 Pamope no yu’wa panga Lasali aai ntamwe, lakini Yesu aayendeli tama pandu po kwa masu’ba gabi’li'. 7 Bu’kapo ngaabakia banamasi' bake, "Tuki’li’bu’ki kai' ku Yudea." 8 Banamasi' bake ngabammakia, "Mwalimu, ganapi’tali masu’ba gambone bu’ka pa Ayahudi pabapalage kukuku’mbwa maliwe, nambi’yambi' upala yenda kai'?" 9 Yesu ngaayangwa, "Kubile na masaa ku’mi na gabi’li' ga muntwekati mulisu’ba limo. Bai, mundu mana atyangite muntwekati aawesali ku’bala kwa mwanjaa aubona bweya wa padunia yi’no. 10 Lakini mundu mana atyangite kilo, alu’a ku’bala kwa mwanjaa ntu’pu' bweya nkati yake." 11 Yesu paayomwi longela ago, ngaabakia, "Mbwiga litu Lasali atigonja, lakini nenga niyenda kunnyumuya." 12 Banamasi' bake ngabammakia, "Bwana, manaitei agonjike lugono, bai alu’a yu’yu’ki’lwa." 13 Bembe bakitage Yesu aabile kannongelya Lasali panga agonjike lugono, lakini aabile kalongelya kiwo sa Lasali. 14 Bai, Yesu ngaabakia mpu’la, "Lasali ayomwike,

Yesu agaamulisa mabi’mbi' ga baali gatame liki

23 Nembe Yesu ngayingya mungalaba, banamasi' bake ngabammi’ngi’ya no longwana nakwe. 24 Lolekeya, baimukya mabi’mbi' mubaali kagapukatya no tumbwa kwiwi’ki’lya ngalaba yoti. Apo, yai Yesu agonjike lugono. 25 Banamasi' bake ngabamwegelya na kunnyumuya kabammakia, "Bwana, twendawaa! Utukosopoli!" 26 Yesu ngaabakia, "Mwanjaa namani muyogopa, mwenga mwabene imani njene?" Bu’kapo, ngayi’ma na kuukalipya wu’lu' nsunga na mabi’mbi', ngakubaa liki muno. 27 Balu' bandu baatisangala kababaya, "Ayu' mundu, mundu gani? Ata nsunga wa mubaali wendakunnyu’wa!"

15 Pakwabile kitamwiyo, banamasi' bake baatikunyendelya ngabammakia, "Pandu pano palupu’ngu’ti', na lisu’ba lipilile. Walage bandu li’nga bayende kumisengo bakaipi’mi ilyo." 16 Yesu ngaayangwa, "Ipalikwali bayende, mwapeyange mwenga ilyo." 17 Lakini bembe ngabannyangwa, "Tubile nago makati matano, na omba abi’li' bai." 18 Yesu ngaabakia, "Munileti pano." 19 Ngaamulisa bandu batamange mumanyei. Bu’kapo Yesu ngagatola galu' makati matano na omba abi’li', ngalola kunani na kunsukulu Nnu’ngu'. Bu’kapo ngagametwa galu' makati, ngaapeya banamasi' bake, nabembe ngabapeya bandu. 20 Bandu boti ngabalya no yukuta. Bu’kapo banamasi' ngabakongwa yakulya yaiigile, batwi’li’ye itu’ndu' ku’mi na ibi’li'. 21 Mayumu ga bandu babaalile analu’me mitumbi 5,000, pangali kwabalangilya alwawa na bana.

25 Kungu’ku', Yesu aayendeli banamasi' bake katyanga panani ya masi'.

Yesu apeya kilyo bandu elupu nsese

32 Yesu aakemite banamasi' bake, ngabaya, "Naabi’kya kiya aba bandu, kwa mwanjaa babile nanenga kwa masu’ba gatatu na ntu’pu' kilyo. Nipendili kwaleka babu’ke pangali lya baakane induka mundi’la." 33 Banamasi' ngabammakia, "Pano tubile palupu’ngu’ti', tulu’a pata kwaku' kilyo sa kwali’ngana bandu bambone kati ba?" 34 Yesu ngaalaluya, "Mubile na makati gali’nga?" Ngabannyangwa, "Tubile na makati saba na omba asene bai." 35 Bai, Yesu ngaamulisa bandu batame pai'. 36 Bu’kapo ngagatola galu' makati saba na balu' omba, ngaansukulu Nnu’ngu', ngagametwa, ngaapeya banamasi', nabembe ngabaabagana bandu. 37 Boti baatilya no yukuta. Bu’kapo banamasi' ngabakongwa makombo, ngabatwi’li’ya itu’ndu' saba. 38 Abo babaalile baai analu’me elupu nsese pangali balangilya alwawa na bana.

Li’pa koli ya nyumba ya Nnu’ngu'

24 Pabaaikite Kapernaumu, bandu babakongwa koli ya nyumba ya Nnu’ngu' bannyendeli Petili ngabannaluya, "Buli, mwalimu winu endali’paga koli?" 25 Petili ngayangwa "Elo, endali’paga." Bai Petili paayingi nnyumba abi balo analongelali, Yesu ngannaluya, "Simoni, wenga wibona buli? Akulungwa ba dunia bakongwa koli bu’ka kwa kinyai? Kwa benekaya au kwa ageni?" 26 Petili ngayangwa, "Bu’ka kwa ageni." Yesu ngammakia, "Aya kumbe, benekaya bapalikwali. 27 Lakini li’nga kanetwausi, uyende kulitanda liku’lu' ukataikuli ndowana, wantole omba ywaalongolya kola, waumukwe nkano wake, na nkati waikolya mbanje ya koli. Waitole ukali’pe kwa twenga twabi’li'."

Nkongo wa ntini wangali pambika

18 Pammalau' yake kindai', Yesu paabile kaki’li’bu’kya ku Yelusalemu, ngaminya njala. 19 Ngaubona ntini gumo mbwega ya ndi’la, ngauyendelya, lakini aukoli ntu’pu' itunda, ila maakapi sika. Bai ngaubakia, "Katu kaneupambike itunda kai'!" Na papalu’palu' wu’lu' ntini ngauyu’ma. 20 Banamasi' pabaubweni, ngabasangala kababaya, "Kwa mwanjaa namani ntini wu' uyu’mite kwa kiimuimu?" 21 Yesu ngaayangwa, "Kakape nimmakianga, mana mwapanga na imani pangali kyukala, mwawesa kai' panga nya baili, ila ata mana mukibakiye kitu’mbi' si', ‘Yokoka ukaitumbukiye mubaali,’ ilu’a pangika. 22 Na mana mubile na imani, sosoti samwaalu’a lu’ba kwa sala, mwaapata."

37 Kimbu’nga kikali' satumbwi pukatya, mabi’mbi' ngagaiku’mbwa yi’lu' ngalaba na ngaitumbwa twi’lya masi'. 38 Yesu aabile nsu’gu' ya ngalaba, agonjike no yegekya ntwe wake pakiyegekyo. Bai, banamasi' ngabannyumuya na kummakia, "Mwalimu, utangite panga twenga twendawaa?" 39 Bai, ngayumuka ngaukalipya gu’lu' nsunga na kugaamulisa mabi’mbi', "Tama liki! Tu’ya!" Apo kimbu’nga ngakikotoka no tama liki. 40 Bu’kapo Yesu ngaabakia banamasi' bake, "Mboni mwendayogopa? Buli, ntu’pu' imani?" 41 Nabembe ngabayogopa muno, ngababa kabalaluyana, "Ayu' nga nyai, ata nsunga na mabi’mbi' gendakunnyu’wa?"

35 Ata palyabile lisu’ba kalipilya, atumilwe bake Yesu baatikunnyendelya na kummakia, "Pandu pano palupu’ngu’ti' sika na lisu’ba lipilile, 36 nantali waalage bandu ba li’nga bayende kumigunda na kumisengo ya papipi bakapi’me ilyo." 37 Lakini Yesu ngaabakia, "Mwapei ilyo mwenga." Nabembe ngabannaluya, "Buli, tukapi’me makati kwa mbanje dinali mya ibi’li', na kwapeya ilyo?" 38 Yesu ngaalaluya, "Mubile na makati gali’nga? Muyende mukalinge." Pabalingite, ngabammakia, "Kubile na makati matano na omba abi’li'."

39 Bai Yesu ngaamulisa atumilwe bake baatamike pai' mumanyei bandu boti muiku’ta iku’ta. 40 Nabembe ngabatama muiku’ta iku’ta ya bandu mya na ya bandu amusini. 41 Bu’kapo Yesu ngagatola galu' makati matano na balu' omba abi’li', ngalola kunani no sukulu, ngagametwa makati na kwapeya atumilwe bake baabagane bandu. Na balu' omba abi’li' nyinyonyo aabagine boti. 42 Bandu boti baatilya no yukuta. 43 Nabembe atumilwe bake ngabakongwa makombo ga makati na omba, ngabatwi’li’ya itu’ndu' ku’mi na ibi’li'. 44 Isabu ya bandu babaalile makati yaabile analu’me elupu tano.

48 Ngaabona banamasi' bake kabaauka endelesa ngalaba yo, kwa mwanjaa nsunga waabile kawaaki’li’bu’ya nsu’gu'. Bai kakupala saa, Yesu ngaayendelya banamasi' bake katyanga panani ya masi'. Ngapala kwapi’ta, 49 lakini pabamweni katyanga panani ya masi', baganiyage panga lyoka, ngabakemelya, 50 kwa mwanjaa boti pabaamweni baatiyogopa. Apo Yesu ngaabakia, "Mukangamale! Nga nenga, kanemuyogope!" 51 Naywembe ngau’bu’ka nkati ya ngalaba, na wu’lu' nsunga ngautama liki. Nabembe ngabasangala muno,

Yesu apeya kilyo bandu elupu nsese

1 Mumasu’ba galu' kipi’nga sa bandu saatikongolekana kai'. Nabembe pabaakosike kilyo, Yesu ngaakema banamasi' bake na kwabakia, 2 "Asi' kipi’nga sa bandu nikibi’kya kiya, kwa mwanjaa batami pamope nanenga kwa masu’ba gatatu na nambi’yambi' ntu’pu' kilyo. 3 Mana naabakiye bayende kasabe pangali lya baalu’a induka mundi’la, kwa mwanjaa bi’ngi' babe baaumi kuutalu."

4 Banamasi' bake ngabannyangwa, "Pano patubileye palupu’ngu’ti' sika, tulwapata kwaku' makati ga kwali’ngana bandu ba boti?" 5 Yesu ngaalaluya, "Mubile na makati gali’nga?" Ngabayangwa, "Tubile na makati saba." 6 Yesu ngaamulisa boti batame pai', ngatola galu' makati saba, ngasukulu, ngagametwana na kwapeya banamasi' bake li’nga baabagane bandu. Nabembe ngabapanga nyo. 7 Kai' kwaabile na tuomba tusini. Yesu ngasukulu, na kwaamulisa banamasi' bake baabagane bandu. 8 Balu' bandu ngabalya no yukuta. Bu’kapo banamasi' ngabakongwa makombo gagaaigile, ngabatwi’li’ya itu’ndu' saba. 9 Bandu babaalile baai pipi na elupu nsese. Bu’kapo ngaalaga.

Yesu aukosya lasi ntini

12 Pammalau' yake pabaabile kabauma Betania, Yesu yamminyike njala. 13 Bai, ngaubona nkongo wa ntini wene maakapi maingi kwa kuutalu. Ngauegelelya li’nga aulinge, pi’ngi' kunani yake awesa pata litunda. Lakini paikite papipi nawo, aakibwenili kili’be ila maakapi sika, kwa mwanjaa nsimu wo waai wo pambikali. 14 Kwa nyo, Yesu ngaukosya lasi nkongo wu’lu' kaubakia, "Tumbulya nambi’yambi' ata milele, mundu kanealye litunda kai' bu’ka kunani yako." Paabile kalongela go, banamasi' bake bai kabayu’wa.

Liyi’gano bu’kana na ntini wauyu’mi

20 Pammalau' yake kindai' pabaabile kabapi’ta, baaubweni wu’lu' nkongo wa ntini uyu’mite woti ata ngi’ga yake. 21 Petili aaku’mbu’ki makowe gagaalongolile na ngammakia Yesu, "Mwalimu, uulinge wu’lu' nkongo wa ntini wawaaukosi lasi, uyu’mi."

22 Yesu ngaabakia banamasi' bake, "Mupalikwa mumwu’bi’li Nnu’ngu'. 23 Kakape nimmakianga, mundu ywoywoti mana alongei kwo u’bi’lya na pangali kyukala pamwoyo wake, kakibakia kitu’mbi' si' kiyokoke pakibile kikatu’le mubaali, kakape ilu’a pangika. 24 Kwa nyo nendakummakia, gogoti gamugalu’ba kamusali, muu’bi’li panga mwendagapokya, ago gaalu’a panga ginu. 25 Na pamuyi’ma salya, mana mubile na mayu’mano na mundu ywi’ngi', munsami, li’nga Tati' binu bababile kunani bansami mwenga makosa ginu."

Yesu aakema banamasi' alongoi

1 Lisu’ba limo, Yesu aayi’mi mbwega ya litanda liku’lu' lya Genesaleti, na bandu baingi baatikunti’li’ta no patigana kabapi’kania liyi’gi’yo lya Nnu’ngu'. 2 Apo Yesu ngaibona ngalaba ibi’li', mbwega ya litanda liku’lu'. Alopoli bene bai pambwega kabagu’lwa mbi’li’li' yabe. 3 Yesu ngayingya mungalaba yimo yayaabile ya Simoni, na kumpala aiekekeye mumasi' pasene kuutalu na mbwega ya litanda liku’lu'. Ngatama no yi’gana lipi’nga lya bandu ku’no abile mungalaba.

4 Payomwi yi’gana ngammakia Simoni, "Uendelese ngalaba mpaka papayendekiye, na mukatumbukiye mbi’li’li' yinu li’nga mulobe omba." 5 Simoni ngannyangwa, "Mpi’ndo, tutikeleka kilo soti loba lakini tupatikeli kili’be, ila mwanjaa ulongei wenga niyenda tumbukia." 6 Pabaatumbukiye mbi’li’li' yabe, ngabaloba omba bambone, mpaka mbi’li’li' yabe kaitumbwa kutwanika. 7 Ngabaakema ayabe ba mungalaba yi’ngi', li’nga sabaayangatiye. Ngabaisa no twi’li’ya omba ngalaba yoti ibi’li', ngaipala swika kwo topa.

8 Simoni Petili paagabweni go, ngakilikita nnu’ngi' ya Yesu na kummakia, "Bwana, ubu’ke nnu’ngi' yangu', kwa mwanjaa nenga namwene sambi." 9 Simoni na aine boti baatisangala pata omba banansima kati balu'. 10 Yakobi na Yoani, bana ba Zebedayo, baai alobi aine Simoni. Yesu ngammakia Simoni, "Kaneuyogope, bu’ka nambi’yambi' ulu’a loba bandu." 11 Ngabaleta ngalaba mbwega ya litanda liku’lu' ngabakileka kila kili’be, na kunki’ngama.

Yesu agaamulisa mabi’mbi' ga baali gatame liki

22 Lisu’ba limo Yesu na banamasi' bake bau’bwike mungalaba na ngaabakia, "Tuloke litanda tuyende mpaka kwiyi'." Bai, ngabatumbwa mwanja. 23 Pabaabile mungalaba, Yesu lwampatike lugono, ngagonja. Nsunga nkali' na masi' gaatiyu’gayu’ga no yingya nkati ya ngalaba, apo baakibweni kiwo kakiegelya. 24 Balu' banamasi' bannyendeli Yesu na kunnyumuya kababaya, "Mpi’ndo, mpi’ndo! Twenda waa!" Yesu ngayumuka na kuukalipya nsunga nkali' no yu’gayu’ga kwa masi', nawembe ngauyi’ma no tama liki. 25 Bu’kapo ngaabakia, "U’bi’lya kwinu kubi kwaku'?" Lakini bembe baatisangala no yogopa ku’no kababakiana, "Ayu' nga mundu gani, ywaukalipya nsunga no yu’gayu’ga kwa masi' nayembe yendakunnyu’wa?"

Yesu agaamulisa mabi’mbi' ga baali gatame liki

22 Lisu’ba limo Yesu na banamasi' bake bau’bwike mungalaba na ngaabakia, "Tuloke litanda tuyende mpaka kwiyi'." Bai, ngabatumbwa mwanja. 23 Pabaabile mungalaba, Yesu lwampatike lugono, ngagonja. Nsunga nkali' na masi' gaatiyu’gayu’ga no yingya nkati ya ngalaba, apo baakibweni kiwo kakiegelya. 24 Balu' banamasi' bannyendeli Yesu na kunnyumuya kababaya, "Mpi’ndo, mpi’ndo! Twenda waa!" Yesu ngayumuka na kuukalipya nsunga nkali' no yu’gayu’ga kwa masi', nawembe ngauyi’ma no tama liki. 25 Bu’kapo ngaabakia, "U’bi’lya kwinu kubi kwaku'?" Lakini bembe baatisangala no yogopa ku’no kababakiana, "Ayu' nga mundu gani, ywaukalipya nsunga no yu’gayu’ga kwa masi' nayembe yendakunnyu’wa?"