22 Tō Tigsas tiwag mi ige nonon mavan heylō me lelqelqevōnō n̄a Bētsayta. Tō yatkel et mavantēy me namatbē vitwag hiy Tigsas, tō kēy mēvēhge maymay Tigsas so kē nitan̄ namnen apwon so niak wē kē. 23 Tō Tigsas mētēy namnen namatbe nan, tō nivantēy yak kē den nalo vōnō. Tō kē minih van lemtan namatbē nan, ba mōm̄ōk namnen apwon, tō nivēhge kē so, "?Wō nēk net vēglal yatkel haphap?"

24 Tō net nan met kal hag, ba metet kēlkēl tō kē mavap so, "O-oh, no met ige et kēy vanvan kēlkēl, ba ikēy qeleso nēqētēnge ēwē."

25 Tō Tigsas nitan̄ lokse namnen n̄a lemtan namatbē en, tō kē metet, wah, namtan niwē galgalsi. 26 Tō Tigsas mohole maymay van hiy kē so, "Nēk nitog vanvan lokse van lelo vōnō anen, ba nēk m̄ōl togolgol n̄a lepnō nōnōm."

31 Tigsas mahatig den napnō liwo Taya, tō kē nivan heylō lepnō Saydon, van dēn̄ mahē kēy ōl so Dekapolis, sisqet Lēbē Liwo a Kalili. 32 Mahē a kē mēdēn̄ lepnō nen, tō yatkel et mavantēy me net vitwag hiy kē a noqoywon, ba nōlōt. Tō kēy vēhge Tigsas so nitan̄ namnen apwon tō kē niwē lokse.

33 Tō Tigsas melep net nan, kōyō mavan yak den ige sil. Tō Tigsas nim̄ōk nēqētbōhōn n̄a lēdēln̄an. Tō kē minih van lēqētqētbōhōn tekelgi tō nim̄ōk n̄a lagayman net nan. 34 Tō Tigsas matkal hag alge tō kē mōm̄ōkheg apap ba mavap so, "Ephata." Nēdēmdēm nan so, "Nēk wak." 35 Tō vagtiwag ēwē, nēdēln̄an nim̄lō tō kē niyon̄teg galsi, wa nagayman mēwē tō kē nihole galsi.

36 Tō Tigsas mōlgontegoy kēy so kēy tog vavasemlō van hiy ige sil. Ba mahē kē mōlgontegoy bah kēy en, vaga kēy et yon̄teg te ba gaygayka malig se hag. 37 Ige sil mamamakē aē yeh veg Tigsas, tō kēy mavap so, "Yēhē, vel haphap a kē niakak en, itōktōk vēlēs. Net a moqoywon tō am̄ag, ba togtōkē kē moyon̄yon̄teg lok, net mey a nōlōt ba kē mohohole lok."

46 Tigsas tiwag mi ige tin̄qoy nonon mavan heylō me Jeriko, ba mahē a kēy mavan veteg Jeriko, nisil liwo madam tatag Tigsas. Ba net matbē vitwag nahag sili metehal, nahan Batimeas. Net gōh ēntēn Timeas, vaga kē nivēvēhge nēsēm den net a kē nivan sisqet kē me en. 47 Mahē a namatbē nan moyon̄teg so Tigsas Tanasaret navanvan tō metehal en, tō kē niqtēg ōlōl Tigsas. Kē mavap so, "!Tigsas! !Ēntēn Devēt! !Nēk magaysēn no!"

48 Woqse et mohole boel kē, wa mavap so, "!Togtog yon̄!" Ba kē et tog yon̄ te ba mōlōl liwo malig se hag, ba mavap so, "!Tigsas! !Inēk Ēntēn Devēt! !Nēk magaysēn no!"

49 Tigsas mitighiy, ba mavap van hiy kēy so, "Atmi ōlōl kē me."

Tō kēy vap van hiy namatbē nan so, "Itōk, nēk hatig. Tigsas niōlōl nēk so van me hiy kē."

50 Namatbē nan moyow hatig den natnon, ba musuwyeg veteg namalmal a kē matatyip goy tō kē aē, tō nivan me hiy Tigsas ēgēn. 51 Tigsas mēvēhge namatbē nan wo, "?Nēk nemyōs so nok ak nahap van hiy nēk?"

Tō kē meplu so, "Vatgo, no nemyōs so nok etet lok."

52 Tō Tigsas mavap van hiy kē so, "Itōk, nēk van, Ḡod mal ak wē nēk, veg nēdēmtig nōnōm namaymay." Vag tiwag ēwē kē metet lok, tō madam tatag Tigsas lemtehal.

30 Ba mahē a kēy kalbat me lēm̄ nen, ige lelo ēm̄ en mavasemlō van hiy Tigsas so qēlgan Simon mey nalqōvēn entō letno tamge nonon, veg kē mogom, nogom momyiy maqal kē. 31 Tō Tigsas mavan me hiy kē, wa mētēy namnen tō niyaphatig kē hag nen, tō nogom momyiy nibah den kē, tō kē nilep me negengen hiy kēy ēgēn.

40 Net vitwag a nēwēyēs, kē mavan me met Tigsas, tō kē mavatiqaw hōw lengon wa mēvēhge kē so nimyin̄ kē. Kē wo, "Ēy, so nēk wo nemyōs, tō nēk tak wenwen vēh no."

41 Ba Tigsas memgaysēn yeh kē, tō mōm̄ōk namnen apwon ba mavap van hiy kē so, "O-oh, no nemyōs. !Nēk wenwen lok!" 42 Tō nogom nonon nibah ganwon, tō nataqn̄ēn niwenwen lok.

3 Kē hohole lapgetō en, tō ige bulvet hah me net gom vitwag a nayn̄on vōyō namat. 4 Ba kēy et van sisqet te Tigsas, veg nēm̄ nan nōyheg et. Tō kēy meyem kal hag lēkle-ēm̄, wa mak namtem̄lō liwo hag lēkle-ēm̄ en, togolgol apwon Tigsas. Mahē kēy mak bah namtem̄lō lēkle-ēm̄ en, tō kēy voyoy tēqēl kē hōw a kē nen letno tamge nonon. 5 Tigsas met nēdēmtig nonoy namaymay en, tō kē mavap van hiy net gom nan so, "Intik, nubug del nōnōm, no mal dēmveteg qēt."

6 Ba yatkel vatvatgo Bele hag gehtō lelo ēm̄ en, kēy dēmdēm yoyon̄ mahgey so, 7 "?Qeleave tō net gōh nihohole qele gōh? !Nohohole gōh nehet! Kē tak hethet vēh nahan Ḡod, veg Ḡod mahgen te dēmveteg vēh nubug non net."

8 Vagtiwag ēwē Tigsas mēglal nēdēmdēm nonoy, tō nivap van hiy kēy wo, "?Bahap tō kimi dēmdēm hethet qelenen? 9 ?Mey qeleave netwoyig so vap van hiy net gom gōh, ‘Nubug nōnōm mal dēmveteg qēt,’ si so, ‘Nēk hatig, lep natamge nōnōm, ba m̄ōl’?

10 "Ba no nemyōs so kimi ēglal so Ninti Et, naman nonon aē lemyam gōh so tēdēmveteg vēh nubug non net." Tō Tigsas mavap van hiy net gom nen so, 11 "Nok vap van hiy nēk so, hatig, lep natamge nōnōm, ba m̄ōl."

12 Vagtiwag ēwē, net gom nan mahatig, melep natamge nonon lengoy del, tō nivan. Ige del mamamakē aē a nēkēkēn, tō kēy mōlwē Ḡod, ba mavap so, "!Meqtēg yak te tō me en, gēn etet qete nahap vitwag qele agōh!"

1 Lōqōn̄ vitwag se, mahē Tigsas mahayveg hay lēm̄ tatay nen, net vitwag hag tō nen, namnen nehet, kē tit hon̄yeg tenenen vēhte. 2 Ba yatkel et den kēy etet yoyon̄ tō Tigsas en, so kē tak qeleave, kē tak wē vēh net nan Lōqōn̄ M̄ōkheg si tateh. Veg kēy soksok namtehal a so ak sisgoy kē aē.

3 Tō Tigsas mavap van hiy net nan so, "Ēy, nēk van me ba tig me lengon ige sil gēn." 4 Tō Tigsas nivēhge van hiy kēy wo, "?Nele nongēn vap so gēn so ak qeleave Lōqōn̄ M̄ōkheg? ?So gēn ak nahaphap mey nēwē, si ak nahaphap mey nehet? ?So vaēh net, si wuhmat net?" Ba kēy et vulu goy te kē. 5 Tō Tigsas mololgagay, tō metet velvel kēy. Ba kē memgaysēn se kēy, veg nēqtēy namaymay wowoh. Tō kē nivap van hiy net nan so, "Nēk hon̄yeg tenenen namnē." Tō kē nihon̄yeg tenenen namnen tō niwē.

25 Ba nalqōvēn vitwag mavan me a nogom non naqal kē, ba nogom nan maqal kē bēte son̄wul nanm̄e vōyō, ba et bah hōn te. 26 Tō vaga kē et malaklak te, kē niyon̄teg nehet velqōn̄. Kē mal wēl vatag ige tokta a nam̄adeg, ba kē et wē hōn te, nēsēm nonon meqlen̄ yeghuquy ēwē, ba nogom nonon milwo malig se van. 27,28 Ba kē moyon̄teg noyoy veg Tigsas, tō kē mavan tiwag me mi ige sil a lēklan Tigsas. Kē nidēmdēm mahgen so, "Wun nok tan̄qal ēwē namalmal nonon en, tō nogom mino nibah." Tō kē niol namnen van tō nitan̄qal namalmal non Tigsas. 29 Kē matan̄qal bah namalmal nonon Tigsas en, tō vag tiwag ēwē kē moyon̄teg van lataqn̄ēn so nogom nonon mabah, tō kē mēwē.

22 Ba net liwo vitwag, kē nilwo goy nēm̄ tatay non ige Tisrael, nahan Jayrus. Mahē kē met Tigsas, kē mavan me mataqlun̄ goy nangon. 23 Tō kē mēvēhge maymay kē van wo, "Nam̄alm̄al su mino mogom liwo, yipteg kē nimat. Nēk van ēgē me ba tan̄ namnē apwon tō kē niwē lokse."

24 Tō Tigsas nitatag kē, tō kōyō van. Ba nisil liwo matatag se kē, ba kēy navan walēg biyimyin̄ kē.

38 Kēy van dēn̄ me nēm̄ non Jayrus nen, Tigsas et van a nisil liwo taqtō anen, ba woqse valiqō a kēy yayahōlōl beten̄ten̄. 39 Tō kē nihayveg hay lēm̄, tō nivap van hiy kēy so, "Atmi nitog ten̄ten̄. Nam̄alm̄al gōh et mat te, kē memtiy ēwē."

40 Ba yatkel et boyboy hiy kē aē. Tō Tigsas mōvōylō kēy, tō melep imam wa tita nonon nam̄alm̄al en, tiwag mi itēlge nonon, tō kēy hayveg hay mahē a nam̄alm̄al entō aē en. 41 Tō Tigsas nitēy namnen m̄alm̄al en, ba mavap van hiy kē mi nagatgat nonoy so, "Talita kumi." Nēdēmdēm nan so, "M̄alm̄al su, nēk hatig." 42 Tō nam̄alm̄al nan nihatig, tō nivanvan kēlkēl. Nēte nonon son̄wul nanm̄e vōyō. Mahē a kēy met nage qele gōh, tō kēy mamamakē aē a nilwo.

37 Kēy hōhō yow nen wah, nelen̄ liwo nihatig, miyip maymay me nen, tō mak nēbē liwo nen melkos a melkos. Tō nēbē niqtēg hayhayveg hay lelo bō-ōt nen, yipteg so nōbō-ōt niyoy. 38 Ba Tigsas entō lekye bō-ōt en nemtiy. Kē mēqēthēlēn̄ mi nēqēthēlēn̄. Tō ige nonon ōlōl matyak kē, tō kēy vap van hiy kē so, "!Vatgo, et van nen! !Sisqet gēn mat, ba nēk et su dēmdēm hōn te aē!"

39 Tō Tigsas nihatig hag tō nigatgoy nelen̄ wo, "!Tog yoyon̄!" Wa tō kē magatgoy se nēbē wo, "!Hal yoyon̄!" Tō nelen̄ nitay, wa vel haphap del nitog yoyon̄ qēt, tō mahē nivan hōw tō nitay lawlaw. 40 Tō Tigsas mavap van hiy ige tin̄qoy nonon so, "?Bahap tō kimi mētēgteg? ?Kimi et dēmtig qete?"

41 Ba ikēy del memtēgteg qēt, tō kēy vēy hohole lok hiy kēy mahgey wo, "!Yēhē! ?Wō nahan et gōh? Nelen̄ wa nēbē, kōyō del moyon̄teg kē."

35 Yipteg mahē nimyēpyep, tō ige non Tigsas mavan me hiy kē, tō kēy vap so, "Vētmahē gōh tateh gengen geh, ba yipteg nalo niyoy. 36 Itōk so nēk vētleg m̄ōlm̄ōl ige gōh tō kēy van lēm̄ wa lepnō a sisqet geh me agōh, tō kēy wēl negengen."

37 Ba Tigsas mavap van hiy kēy so, "Atmi lep van negengen hiy kēy."

Tō ige nonon mavap van hiy kē so, "?Qeleave? ?Nēk nemyōs so kemem wēl negengen mi nēsēm tey vagyō so ven̄en kēy aē?"

38 Tō Tigsas mavap van hiy kēy so, "?Wō nēbrēyt vēvēh aē nen? Atmi van ba et."

Kēy metsas bah en, tō kēy mavap van hiy kē so, "Tēvēlēm wōy, tiwag mi nōmōmō wōy vōyō."

39 Tō Tigsas mavap van hiy ige sil so kēy haghiy how liviwti vivitwag loyoplih m̄am̄al anen. 40 Tō ige sil mahaghiy hōw lēvēwti a nam̄adeg, yatkel viwti net m̄eldēl vag tiwag, ba yatkel viwti, ikēy son̄wul tēvēlēm. 41 Bahnentō Tigsas melep nēbrēyt tēvēlēm, tiwag mi nōmōmō vōyō nen, tō kē matkal hag alge ba mēvēwē Ḡod aē. Tō kē mōtōq woywoy nēbrēyt nan, ba melep van hiy ige tin̄qoy, tō kēy asēg van hiy ige sil. Bastō kē mōtōq lalat nōmōmō vōyō se qelenen, tō masēg se van hiy kēy. 42 Tō ige del megen a natqay misis qēt. 43 Tō kēy mehn̄ēn yakyak nagayte gengen a kēy megengen lēlēge tō en, natbey son̄wul nanm̄e vōyō a noy geh. 44 Nisil a megen negengen gōh, ikēy tey vag tēvēlēm, ba meptah vēlēs ige tam̄an.

48 Ba Tigsas netgeh a kēy hōhō tō lōbō-ōt en. Ba kēy yon̄teg nememeh bōhōhō, veg kēy hōhō goy namte len̄. Ba mahē ninognog meyen me wah, Tigsas nivan me hiy kēy, a kē nivanvan apwo bē. Tō Tigsas nivan basay kēy so nivan tasga. 49 Ba mahē a kēy met kē a nivanvan me apwo bē en, ba kēy dēmdēm so natmat. Tō kēy gaygayka ēgēn, 50 veg kēy del met kē, tō kēy memtēgteg a nēkēkēn. Ba Tigsas mavap ēgē van hiy kēy so, "Tig maymay. !Ino agōh! Kimi nitog mētēgteg." 51 Tō Tigsas niyem kal hag hiy kēy nen, wah, nelen̄ nitay. Tō kēy mamamakē aē a nēkēkēn,

1 Lōqōn̄ tegha se, nisil liwo mahaytiwag me hiy Tigsas, ba negengen nagay mabah. Bahnentō Tigsas mōlōltiwag me ige tin̄qoy nonon, tō mavap van hiy kēy so, 2 "No nemgaysēn ige sil agōh, veg kēy mal tog vatag mi no nōqōn̄ vētēl, tō negengen nagay mal qēt. 3 So no wo mēvētleg m̄ōlm̄ōl kēy a et gengen te en, nataqn̄ēy tem̄geygey bamaygay a metehal, Wa yatkelgi den kēy, napnō nonoy yeh tewiwi."

4 Ba ige tin̄qoy nonon mavap van hiy Tigsas so, "?Wō gēn telep me negengen nagay lōme ave? Mahē gōh yeh den napnō."

5 Tō Tigsas mēvēhge lokse kēy wo, "?Ba nēbrēyt vēvēh mi kimi?"

Kēy vap so, "Liviyō."

6 Tō Tigsas mavap van hiy ige sil so kēy hag hiy hōw lēvētan. Bastō kē melep nēbrēyt liviyō nen, ba mēvēwē Ḡod aē. Tō kē mōtōq woywoy bah en, tō nilep van hiy ige nonon so kēy asēg van hiy ige sil. Tō kēy mak qeleanen. 7 Ba yatkel mōmō susu se aē. Tō Tigsas matatay goy bah nōmōmō geh nen en, tō kē nilep van hiy ige nonon so kēy aseg se van hiy ige sil en. 8 Ige sil del megen toqsis qēt, tō lēkle gengen, ige nonon mehn̄ēn yakyak nagayte gengen a kēy megengen lēlēge tō en, natbey liviyō. 9 Ige sil a megen negengen nan en, ikēy tege tey vag vet, ba meptah ēwē ige tam̄an. Tō me atgiy, Tigsas nivētleg m̄ōlm̄ōl kēy lepnō nonoy.

12 Taval meyen nan hag en, kēy hatig den Betani tō vanvan me hiy Jerusalem nen, ba namaygay mak Tigsas. 13 Tō Tigsas met nēqētēnge fik tigtō a yeh ba nayon a nemtōqtōq. Tō Tigsas nivan so niet tow so nēwan aē. Ba mahē a Tigsas mavan sisqet me, kē met hag en vēlēs yon geh, veg et wōl nan qete a so kē niō nēwan. 14 Tō Tigsas mohole van hiy nēqētēnge en so, "Net tit gen vēhte nēwe n̄ēh te." Ba ige nonon moyon̄teg nohohole a kē mavap en.

20 Talōw nan hag nen, kēy mahatig a lemtap qōtō, kēy vanvan me metehal nen wah, kēy et van qelekē nēqētēnge fik a kē mivipdeg tō en mal seygol dēn̄ a lōgōygōyyēn. 21 Pita mēdēm lok nohohole non Tigsas, tō kē mavap so, "Vatgo, nēk et. Nēqētēnge a nēk mivipdeg tō anoy en mal seygol."

22 Tō Tigsas mavap van hiy kēy so, "Atmi dēmtig Ḡod. 23 Nok vap van hiy kimi nēhēyhēywē. So net vitwag wo nēdēmtig maymay Ḡod en, tō kē nivap van hiy natō liwo gōh so, ‘Nēk hatig, ba yow n̄a lenaw,’ tō Ḡod toyon̄teg kē. Sowo nēdēmtig nonon et vōvōyō te, ba kē nēdēmtig so nohohole a kē mavap en, tak tig, tō Ḡod tak tatag qele a net nan mavap en. 24 So kimi wo matatay hiy Ḡod bahapte, ba dēmtig so Ḡod mal lep van hiy kimi, tō Ḡod telep van hiy kimi. 25 Kimi wo moboel net vitwag, tiy wē yeh so kimi dēmveteg nēmgōn am̄ag den kimi tig kal hag ba tatay. Tō Ḡod Imam nonmi hag alge en qoyo dēmveteg nimgumi.

23 Lamahē nen, net vitwag mahayveg hay me lēm̄ tatay, ba net nan, nuvu het mēhēw kē. 24 Tō kē mōltaw a nēkēkēn ba mavap so, "!Tigsas Tanasaret! ?Wō nēk van me so akteg kemem? ?Nēk so ak hethet kemem, ah? Ba no mal ēglal nēk. !Inēk gōh, Nitiy Et Yon̄ non Ḡod!"

25 Ba Tigsas mohole maymay van hiy nuvu het nan, wa mavap so, "!Ēy, nitog hohole! !Kalō den kē!" 26 Tō nuvu het nan mak nataqn̄ēn meyeyey a meyeyey, tō kē mōltaw a nēkēkēn, tō nuvu het nan nikalō den kē.

1 Vētmahē a kēy mēdēn̄ me tekel bē liwo nen, tō kēy vēykal hay aslil a lepnō non ige Tekerasa. 2 Tō Tigsas mēhēw den nōbō-ōt wa tō so nivēykal aslil. Ba et misin hōn te wah, net vitwag nikalō me den negeay tamat, tō nivan me hiy Tigsas. Net nan, nuvu het mēhēw kē. 3 Natno togtog nonon vel geay tamat, ba tateh et so nilēg maymay lokse kē mi nējēn. 4 Veg kēy mal lēg vatag kē vag m̄adeg mi nējēn, leyn̄on wa lemnen, ba kē mewlēs m̄ētm̄ēt qēt. Kē namaymay wowoh, tō tateh et so nitēy maymay kē. 5 Vel anqōn̄ wa vel meyen kē nivanvan soloteg natno geay tamat wa n̄a wotō alge, tō kē niōlōl tawtaw ba nihelhel nataqn̄ēn mi nevet a nehey.

6 Ba kē met Tigsas a yeh lapgetō en, tō kē niskiyak me hiy Tigsas tō nitaqlun̄ goy kē, 7,8 tō kē nigayka ba mavap wo, "!Tigsas! !Inēk Ēntēn Ḡod a Neketket a Neketket! ?Wō nēk van me so ak nahap hiy no?"

Tigsas mavap van hiy kē so, "!Vu het, nēk kalō den net agōh!"

Veg bohohole gōh, tō net nan mavap so, "Lahan Ḡod, nok hole maymay van hiy nēk so nitog akak memeh no!"

9 Tō Tigsas mēvēhge kē wo, "?Nahe ihē?"

Ba kē mavap so, "Nahek ‘Nēvēwti Liwo,’ veg kemem nam̄adeg a nam̄adeg." 10 Tō natmat meten̄ten̄ van hiy Tigsas so kē nitog vōyvōy yak kēy den mahē anen. 11 Vētmahē nen, woqse qo gengen tō sili wutwut en. 12 Tō ige vu het mēvēhge maymay van hiy Tigsas so, "Nēk vētleg kemem n̄a lēvēwti qo, ba nēk ukēg kemem so hayveg hay hiy kēy."

13 Tō mak qeleanen, kē mukēg kēy, tō kēy van. Nuvu het del nen makalō den net nan, ba mahayveg qēt hay lelo qo. Noqo del nen, nognog van tēy vagyō (2,000), kēy meplag n̄a lebenben vitwag, tō kēy misisisgoy qēt n̄a lelo bē liwo, tō yoy qēt.

14 Mahē a ige betetgoy qo met van qelenen en, kēy migitgityak tō vasemlō noyoy ne age gōh lelo vōnō nonoy, wa lepnō tegtegha se a sisqet napnō nonoy. Tō ige sil van me, so et temuy nahap a Tigsas mak tō en.

11 Ba kimi vatvatne ige sil so net tit biyin̄ vēhte imam wa tita nonon. Ba kē nivap van hiy kōyō so, ‘Natkel hap aē mino a nok so lep van hiy kōmyō, so biyin̄ kōmyō aē, ba no tit lep vēhte van hiy kōmyō veg no mal vatvat vatag aē so lep van hiy Ḡod.’ 12 Tō nohohole gōh nigatgoy kē, tō kē tit biyin̄ vēhte imam wa tita nonon. 13 Ba lēdēmdēm gōh en, kimi mak nohohole non Ḡod qeleso nage yeghuquy ēwē, veg a bavatvatne tēlēvēnanmi a kimi vatvatne kēy aē en. Woqse dēmdēm mey nehet aē mi kimi."

14 Tō Tigsas niōlōl me ige sil so kēy van me hiy kē, tō kē nivap van hiy kēy so, "Atmi del yon̄teg galsi me nohohole mino tō kimi so yon̄teg vēglal. 15 Nahap taslil tit hayveg vēhte hay hiy net so nak lemlem kē. Ba nahaphap a nikalō me den net en, meynen a niak lemlem kē lengon Ḡod.

24 Tigsas mavan den Kalili, tō mavan me legeay vōnō Taya. Tō kē mavan tō mahayveg n̄a lēm̄ vitwag, ba kē et buste so ige sil so ēglal kē. Ba kē tit taqbat vēhte den kēy veg kēy mal ēglal kē. 25 Lepnō nen, nalqōvēn vitwag, nam̄alm̄al nonon, nuvu het mēhēw kē. Ba nalqōvēn nan moyon̄teg noyoy so Tigsas mal dēn̄ me, tō kē nivan me tō nitaqlun̄ goy hōw lengon Tigsas. 26 Ba nalqōvēn gōh, ikē et Juw te, kē nage telepnō Fonisia n̄a Siria. Tō kē mēvēhge maymay van hiy Tigsas so kē nivōylō natmat den ēntēn.

27 Tō Tigsas mavap van hiy nalqōvēn nen so, "Itōk so ven̄en toqsis bah ige nētnētm̄ey en. Ba et wē te so lep nagay te gengen nagan ige nētnētm̄ey ba suwyeg van hiy ige tok."

28 Ba nalqōvēn meplu goy Tigsas so, "Welan, hēywē, ba ige tok a laln̄e tono gengen en, kēy gengen goy nigin gengen nagan ige nētnētm̄ey a nisisisgoy."

29 Tō Tigsas mavap van hiy kē so, "Veg nēk meplu goy no qelenen, itōk, no mal galeg. Nēk hatig ba m̄ōl. Nuvu het mal kalō qēt den nam̄alm̄al nōnōm."

30 Nalqōvēn mōm̄ōl lok me en, tō kē et van qelekē nam̄alm̄al nonon en yoyon̄ tō a letno tamge nonon, a nuvu het mal kalō qēt den kē.

17 Net vitwag den kēy mavap so, "!Vatgo! No mavantēy me intik hiy nēk so ak wē kē veg nuvu het mēhēw kē, tō kē et hohole te. 18 Yatkel mahē a nuvu het niqal maymay kē en, kē nisisgoy n̄a lēvētan, ba nosog nikakalō me den naplan wa nigaygayyēy nēlwon. Tō nataqn̄ēn nit gotgomiy. Ba no mēvēhge ige hal nōnōm so kēy vōy yak nuvu het gōh den kē, ba kēy akak lēlēge."

19 Tō Tigsas mavap van hiy kēy so, "Kimi togtō qiyig kē nēdēmtig nonmi et maymay te. ?Wō no totog tiwag mi kimi gaydēn̄ an̄ēh? ?Nok so biyin̄ se kimi vag vēh? Atmi lep me nēnētm̄ey en."

20 Tō kēy lep kē me hiy Tigsas ēgēn. Mahē a nuvu het met Tigsas nen, kē mak nēnētm̄ey nan nataqn̄ēn me yeyey a me yeyey, tō kē nisisgoy hōw lēvētan. Tō kē nitatatwul kēlkēl wa nosog nikakalō me den naplan. 21 Ba Tigsas mēvēhge van hiy imam nonon so, "?Wō nēte vēvēh vatag a kē niakak qelegōh?"

Imam nonon mavap so, "Nage gōh maqal tō kē a kē nusu lapgetō. 22 Nuvu het gōh mal akak etgal kē vagm̄adeg so niak sisgoy nēnētm̄ey nan lep wa lēbē, so niwuh mat kē. So nēk wo tak vēh nahap qiyig vitwag, ba nēk magaysēn kemem, wa biyin̄ kemem."

23 Tigsas mavap van hiy imam nonon so, "Ḡod tak vēh vel haphap, so nēk wo nēdēmtig."

24 Tō vag tiwag woy, imam non nēnētm̄ey en mohole mi neten̄ten̄ so, "Welan, no nēdēmtig. Ba nēk biyin̄ no, veg nēdēmtig mino nusu."

25 Mahē Tigsas met nisil nivanvan me hiy kē en, kē mohole maymay van hiy nuvu het nan so, "Vu het ne qoywon wa ne lōt. !Nok vap van hiy nēk! !Nēk kalō den nēnētm̄ey agōh! Ba nēk nitog vanvan lok me hiy kē."

26 Tō nuvu het en mōltaw, wa mak nēnētm̄ey nan mamat higap. Wa nataqn̄ēn me yeyey a me yeyey, tō nuvu het nan nikalō den kē. Ba kēy met van en, qeleso nēnētm̄ey nan mamat, tō nisil mavap so, "Kē mal mat." 27 Ba Tigsas mētēy namnen wa niyap hatig kē, tō nitig ketket ēgēn.