1 Yēhē yaplupluk lēvēwti et a Ḡod mōlōl gēn, yathithik wa yatētētek yon̄, dēmsas vaga Tigsas. Kē nahal wa nipris liwo nongēn, mey a gēn vavasemlō vaga so gēn nēdēmtig kē. 2 Kē natatagoy galsi namgumgu a Ḡod metyak tō kē aē, qeleaso Mosis memgumgu galsi tō hiy Ḡod. Ige non Ḡod en, qeleso kēy del notogtog lēm̄ nonon. Tō Ḡod metyak Mosis so nietgoy ige a lēm̄ nonon. Ba Tigsas en, ikē a mowos tō nēm̄ non Ḡod en.

3 Tō Ḡod met so nahan Tigsas neketket den nahan Mosis. ?Gēn so ōlwē net beteytey ēm̄, siso ōlwē nēm̄ a net nan metey kal tō en? 4 Woqse ēm̄, wa woqse et a mowos kal nēm̄ en, ba Ḡod mahgen mitin̄ nahaphap del lemyam. Bastō nahan Tigsas neketket den nahan Mosis veg Ḡod mitin̄ tō namyam heylō Tigsas.

5 Tō natno liwo non Tigsas neketket yeh den natno liwo non Mosis. Veg Mosis en, kē net bemgumgu lēm̄ non Ḡod, ba Tigsas nitiy et benon ēm̄. Mosis gōh, kē neskalgoy galsi namgumgu a Ḡod melep van hiy kē. Namgumgu namun en, kē net lēgēlgēg bētēytēymat ige sil boyoy a so Ḡod tavasemlō me atgiy. 6 Ba Kraēs en, kē Ēntēn Ḡod, tō Ḡod mōm̄ōk kē so nim̄agoy ige sil del lēm̄ nonon. Tō kē neskalgoy namyōs non Ḡod. Tō gēn se ige non Ḡod a notog lēm̄ nonon. Ba gēn so dēmtig navatvat nonon wa nitog mētēgteg. !Gēn dēmdēyē navatvat nonon wa sēsē gēn aē!

7 Bastō, qele Nuvu Yon̄ mavap en, so

!Qiyig gōh, mahē kimi yon̄teg naln̄an Ḡod en,

atmi yon̄teg ba dēmap!

8 Amtan Ḡod wo, "Nitog so niqtimi nimaymay,

qele mahē kimi mavan yak den Itsip,

tō van soloteg hiy mahē van lepnō vadalm̄eg.

9 Vētmahē nen ige yatqōtqōmi met namakaliw a no mak,

ba kēy mehelhel nele tasga hiy no bēte son̄wul vet.

10 Veg bege gōh en, no mololgagay kēy,

tō mavap so, ‘Natqay et sewsew te hiy no vaga,

tō kēy et ēglal m̄ōleg te nēmētwuk.’

11 No mololgagay yeh kēy wa mōm̄ōk nēvēn̄vēn̄ van hiy kēy so

kēy tit hayveg vēhte van lepnō tog m̄ōkheg mino."✝

12 Yēhē yathithik wa yatētētek, etgoy nalotaqami den negengenyeg, ba dēmtig Ḡod mey a nēh, tō so kimi tit tigkēlē vēhte kē. 13 Veg nem̄eygal tiple galgal kimi, tō niqtimi tiple maymay aē. Bastō atmi hole vēybiyin̄ kimi qiyig wa vel qōn̄ del.

14 Veg igēn tavan me yaplōplōn Kraēs, so gēn wo tig maymay gaydēn̄ lōlsē ēh nongēn. Dēmtig maymay tasga qeleso gēn mowowtēyak tō me am̄ag.

15 Yēhē no mal hole vatag se so,

!Qiyig gōh, mahē kimi yon̄teg naln̄an Ḡod en,

atmi yon̄teg ba dēmap!

Nitog so niqtimi nimaymay,

qele mahē kimi mavan yak den Itsip.

16 ?Kē nivap veg "ige a moyon̄teg ba kēy nēqēt maymay," wo kē nihole gatay ihē? Kē nihole gatay ige a Mosis mitig helem̄ag tō kēy den Itsip. 17 ?Ba Ḡod mololgagay tō ihē bēte son̄wul vet? Ige mey a kēy megengenyeg, tō kēy matmat ganwon lepnō vadalm̄eg. 18 ?Tō ihē geh a Ḡod mal m̄ōk nēvēn̄vēn̄ so kēy tit hayveg vēhte van lepnō tog m̄ōkheg nonon? Ige mey a kēy et yon̄teg te kē. 19 Bastō gēn mal m̄ōleg aē veg kēy, so ige mey a et dēmtig te en, kēy tit hayveg vēhte lepnō tog m̄ōkheg.