Hibruw 6

Ḡod tavawē ige et mey kēy yon̄teg navatvatne wa mugumgu mi navaksay, ba kē tēvēvēg ige mey kēy gesges den

1 Gēn tit qētēg lok vēhte lōtōti vatvatne tegtegha veg Kraēs. Navatvatne nan qeleso gēn dēmleh den namgumgu yeghuquy mey a gēn tamat vēh aē, ba dēmtig Ḡod tō so kē nivaēh gēn, 2 si navatvatne ne vasugyon̄, so batan̄tan̄ apwo et bavavawē, si bahahatig lok den namatmat, tiwag mi nēvēvēg bamatmat lap. 3 Vel haphap geh nen qeleso nōtōti ēm̄, ba gēn so tigtēy lap. Tō gēn galeg, sowo lemyōs non Ḡod.

4 Gēn so tigtēy maymay lap veg net mey a kē nigesges tō niukēg veteg nēdēmtig gōh en, kē tit van lok vēhte me. Dēmsas tow net vitwag a mavan me net non Kraēs. Kē mal van me lemyeyen, kē mal helet etgal navawē den alge, kē mal gen vatag nēwē non Ḡod. Wa kē may lep Nuvu Yon̄. 5 Kē metet tō naman ne meyeyen talge, wa metsas tō so nohohole non Ḡod nitiy wē yeh. 6 Bastō me atgiy en, kē nitig kēlē Kraēs. !Ba net qelegōh, kē tit dēmleh lokse vēhte! Veg mahē a kē niak qele gōh en, qeleso kē niwos mahgen Ēntēn Ḡod lokse lowolwol, wa niak mamayge Ēntēn lengon ige sil.

7 Dēmsas tow nēvētan vitwag. Nasm̄al mesm̄al how aē, tō kē niyip qēt nēbē. Tō nēvētan nan niak navavah nimtow galgalsi van hiy ige a mavah tō en. Tō Ḡod tavawē nēvētan nan. 8 Ba nēvētan a nowolkokon̄ay wa naplih het nimtow alon en, Ḡod qoyo vipdeg nēvētan nan. Veg nēvētan nan tateh wē geh aē, tō lōlsēn yow en, kēy teben nep van aē.

9 Yēhē yaplupluk, kemem mohole qeleagōh, ba veg kimi en, kemem nēglal so kimi damdam namtehal mey nēwē, a namtehal bavavaēh. 10 Nēmētwumi mavasemlō tō so kimi natam Ḡod, veg kimi memyin̄ tō ige nonon, wa tō kimi biyin̄ leptō kēy. Ḡod en, namtevun netnenen, tō kē tit dēm veteg vēhte namgumgu ēwē nonmi.

11 Tō kemem nemyōs so kimi vivitwag tigtēy lap navaksami, tō tig maymay lēdēmdēm nonmi so dēmdēyē beyseyse dēn̄ van lōlsi ēh. 12 Kemem et buste so kimi meyemyen̄. Ba atmi ak tatag ige mey a mitig maymay so dēmtig Ḡod tō melep navawē aē. Navawē nan nahap a Ḡod mavatvat tō van hiy ige bōbō tam̄ag.

Navatvat non Ḡod tit sisgoy vēhte

13 Dēmsas Abraham, kē melep navatvat den Ḡod. Mahē Ḡod mavatvat van hiy Abraham en, kē mohole gontegoy kē mahgen so niak dēw navatvat nan.✝6:13 Genesis 22:15-18 Veg tateh et se a nilwo den kē so nihole gontegoy kē aē. 14 Tō navatvat gōh kē mavap so, "No tavawē tō tavawē nēk, tō no tak nēk tavan me tam̄adeg wewti." 15 Bahnentō Abraham mēdēmdēyē bege gōh, gaydēn̄ a kē mētēy nahap a Ḡod mavatvat tō.

16 Mahē net vitwag nemyōs so niak dēw nohohole nonon en, kē nigatgoy lahah vitwag mey a neketket yeh. Tō nahah nan haytēyēh so ōl gontegoy kē. Veg kē mal ōl gontegoy galsi lengon net liwo en, tateh vēyvēyle lokse me atgiy. 17 Bastō, mahē Ḡod memyōs so niak dēw navatvat nonon, kē magatgoy lahah a neketket. Nohohole nan nivasemlō so kē tit leh vēhte nēdēmdēm nonon veg bavatvat nan. Tō ige mey a tog dēyē navatvat nan en, kēy nēglal galsi so navatvat nan taktig.

18 Veg Ḡod melep me hiy gēn nage vōyō so vahiy maymay gēn so dēmdēyē bavatvat nonon. Nage vōyō gōh nohohole ne vatvat tiwag mi nohohole ne gatgoy. Tō nohohole vōyō gōh tit leh vēhte, veg tateh galgal mi Ḡod. Gēn mey a mal valag van hiy Ḡod so kē nitigoy gēn, navatvat gōh tak muhuy gēn. 19 Veg gēn dēmdēyē navatvat non Ḡod, tō nalo taqangēn tahag hotog. Nēdēmdēyē nan qeleso nevetlēg a gēn til veteg mahē a noyoyōm̄. Wa gēn dēmdēyē so Tigsas niaktig navatvat non Ḡod. Tigsas mavan heylō nidin a Litiy Ēm̄ Bolol non Ḡod*6:19 nidin a Litiy Ēm̄ Bolol non Ḡod Leves gōh nihole gatay nahap mey alon Litiy Ēm̄ Bolol non Ḡod. Hebrews 9:2-3 nikaka se veg nidin nan. Mahē Tigsas mamat en, namalmal a nadam goy nahyan Ḡod en, kē memhaywoy. Matthew 27:51, Mark 15:38, Luke 23:45, nididin nan namalmal a nadam goy nahyan Ḡod mey noyon̄ a noyon̄. 20 Kē mak qelenen so nitig leh gēn van lengon Ḡod. Tō kē mal van me nam̄e Pris Liwo qele Melkēsēdek a nipris tam̄ag, tō kē tētēy tasga namgumgu qelenen tit bah vēhte.