Hibruw 5

Ḡod mal ōl Tigsas so kē nipris liwo qele Melkēsēdek

1 Gēn mal ēglal vatag nēmētwōn ige Pris Liwo. Vaga en, Ḡod nietyak net vitwag den ige tam̄an, tō nim̄ōk kal kē, so nimgumgu van lengon Ḡod a lahay del. Nipris Liwo gōh nilep van nolol hiy Ḡod, wa kē niolol mi nisipsip tō so nitamgoy negengenyeg non ige sil. 2 Kē nemhuy hiy ige mey a et mēnay te wa mavan ley den namtehal tenenen, veg kē se nem̄geygey. 3 Ba veg kē se nem̄geygey en, kē nolol mi nisipsip veg bubug nagan mahgen qele kē nolol bubug nagan ige sil.

4 Ḡod mahgen tetyak net so nivan me nipris liwo, qeleso Ḡod metyak tō Aron, a kē nipris liwo totogyeg leln̄an Mosis.*5:4 Aron, ikē ēthēn Mosis. Ḡod mōlōl Aron so nivan me Nipris Liwo totogyeg. Numbers 28 Ba net vitwag tit etyak vēhte kē mahgen so nilep natno liwo nan. Tateh. 5 Ba veg Kraēs en, qeleanen. Kē et m̄ōk te kē mahgen so nilep nahah a so nivan me Nipris Liwo, tateh. Ḡod mahgen mōm̄ōk kal kē, ba mavap van hiy kē so,

"Inēk Intik.

Qiyig gōh nok van me tiy Imam nōnōm."✝5:5 Psalm 2:7

6 Ba Layapyap Yon̄ vitwag se, mavap so,

Inēk nipris a tit bah vēhte

qeleso nēmētwun Melkēsēdek, a kē nam̄e pris tam̄ag.✝5:6 Genesis 14:17-24

7 Lamahē a Kraēs notog me lemyam gōh en, kē matatay so Ḡod nimyin̄ kē, wa natn̄ēh molon̄ den namtan. Kē mayayah ōlōl beten̄ten̄ hiy Ḡod a tavaēh vēh kē den namatmat. Tō Ḡod moyon̄teg kē veg kē mataqlun̄ goy Ḡod mi nēdēmap. 8 Tigsas ikē Ēntēn Ḡod ba namtehal nonon et towoyig te. Heylō nahaphap a mak tō kē moyon̄memeh lataqn̄ēn en, kē mavatne naln̄e yon̄teg. 9 Mahē kē mēdēn̄ lōlsi metehal nan, kē mavan me nitiy et bavavaēh ige et den namatmat. Tō ikē mavan me nōtōti ēh lap hiy ige mey a yon̄yon̄teg kē. 10 Tō Ḡod mal ōl Tigsas so kē nipris liwo qele Melkēsēdek a nam̄e pris tam̄ag.

Nohohole so ak matyak kēy

11 Kemem so hole woqse haphap veg bege agōh. Ba nemeh so vasem m̄ōleg van hiy kimi, veg kimi navatne meyemyen̄ ēwē. 12 Entō gōh kimi so vatne ige tegha ēgēn, ba tateh. Itōk so navatgo nivatne lokse kimi bohohole non Ḡod a niqtēg lokse a lōtōtēn. Kimi qeleso nētnētm̄ey a sisis laptō, ba et gengen te negengen maymay.

13 Ige nētnētm̄ey mey a sisis lapgetō en, ikēy qeleso ige et mey a et ēglal galsi qete navatvatne bemtehal tenenen. 14 Ba negengen maymay en, nagan ige mey a mal tamta vatag, veg kēy mal ēglal yak tō me so nēwē ave si nehet ave.