1 Nēdēmtig en, kē nēdēmdēm maymay bēdēmdēyē navatvat non Ḡod. Tō nēdēmtig niak vēglal gēn so nahap a gēn et etgeh te en, kē hēyhēywē. 2 Veg bēdēmtig nonoy en, Ḡod met lolwē ige lililwo tam̄ag. 3 Heylō nēdēmtig nongēn en, gēn ēglal galsi so Ḡod mitin̄ namyam mi nohohole nonon.✝ Ak tō so nahaphap a gēn tetsas vēh lemyam gōh en, Ḡod mitin̄yak den nahap mey a gēn tit etsas vēhte.

4 Heylō nēdēmtig non Abel en, kē melep van nolol a nitiy wē yeh den Ken.✝ Tō Ḡod mavap so nolol nonon itōk, tō met lolwē kē so kē netnenen. Abel mal mat, ba heylō lēdēmtig nonon, kē hole lapgetō. Veg togtōkē nēmētwun nivatvatne gēn bēdēmtig.

5 Heylō nēdēmtig non Enok en, Ḡod melepyak kē den namyam gōh, a kē et van heylō te namatmat.✝ Net et etsas te natayben veg Ḡod melep yak kē qeleanen. Am̄ag den Ḡod nilepyak kē en, Ḡod met lolwē kē veg kē mak malaklak Ḡod. 6 Asaw den nēdēmtig en, net tit ak malaklak vēhte Ḡod. Net mey nēdēmtig so Ḡod agōh, wa nēdēmtig so Ḡod telep van nayseyse en, net nan nosoksok Ḡod. Ba net mey a et dēmtig te qeleanen, kē et soksok te Ḡod.

7 Heylō nēdēmtig non Noah en, kē mavaēh ige nonon den nililip.✝ Veg Noah mēdēmtig Ḡod mahē a Ḡod mohole vētday van hiy kē so nililip tavan me. Tō Noah et et qete nililip nan, ba kē mēdēmap Ḡod mi namtēgteg, tō mowos nabaklap liwo. Heylō nēdēmtig non Noah en nēvēvēg liwo maqal ige sil telemyam. Tō Ḡod mavap so Noah netnenen veg bēdēmtig nonon.

8 Heylō nēdēmtig non Abraham en, kē mēdēmap nōlōl non Ḡod, tō kē mavan yak den mahē nonon, tō nivan hiy mahē tegha a kē et ēglal te.✝ Tō Ḡod mavatvat so lep nēvētan nan van hiy kē.

9 Tō heylō nēdēmtig nonon en, kē motog lepnō a Ḡod mavatvat van hiy kē, ba kē nahalvan ēwē.✝ Kē motog lēm̄ tēvēlgapye, wa tō ēntēn Isak kōyō bōbō Jakop en, kōyō motog se qeleanen. Tō nēvēyvēyne ne vatvat nan nivan tabay van hiy kōyō. 10 Abraham mak qelegōh veg kē dēyē lapgetō nitiy vōnō a nēhyēn aē, a Ḡod mahgen mētēymat wa mowos.

11 *Heylō nēdēmtig non Abraham en, kē mavan me imam. Abraham mal tamayge, wa ēgnōn a Sera, kē et leplepm̄ey te. Ba kē nēdēmtig so Ḡod taktig qēt navatvat nonon.✝ Tō Ḡod mak so kōyō tavawot vēh nēnētm̄ey.✝

12 Ak tō so niginwotwot m̄adeg mavantabay me den net vitwag, net mey a et leplepm̄ey te. Ba heylō ēwē navatvat en, mak tō kēy nēvēwti qele nivit hag lemyayawoy, wa qele nēvētan yow ale en, a tit vatah qēt vēhte.

13 Ige lililwo gōh mamat tēy nēdēmtig nonoy, ba kēy et tēy qal te hap qete a Ḡod mavatvat tō van hiy kēy aē. Ba kēy netsas nahaphap yeh tewiwi lapgetō, tō kēy malaklak aē. Tō kēy mavasemlō so kēy togtō lemyam gōh qeleso nahalvan ēwē, kēy et tēgvōnō telemyam gōh te.

14 Ige mey a hohole qelegōh en, kēy vasemlō so kēy soksok nitiy vōnō nonoy. 15 Ba sowo kēy dēmdēm lok napnō nonoy tam̄ag lemyam gōh en, togtō kēy tōm̄ōl lok, ba kēy et ak te. 16 Ige gōh nemyōs napnō tegha nonoy mey a nitiy wē yeh, a hag lōtōk en. Veg bege gōh en, mahē kēy ōl Ḡod so ikē Ḡod nonoy en, Ḡod et mamayge te aē. Veg Ḡod mal tēymat napnō liwo nonoy.

17,18 Heylō nēdēmtig non Abraham, mahē Ḡod mehlet etgal kē en, Abraham mukēg Isak so niolol aē.✝ Isak en, kē vitwag woy a ēntēn Abraham, tō Ḡod mavatvat gatay kē so, "Heylō Isak en, ige ginwotwot nōnōm telep nahami." Abraham melep navatvat nan, ba kē mētēymat so niwuh mat kē tō niolol aē van hiy Ḡod. 19 Veg Abraham mēdēmdēm so Ḡod tak ēh lokse vēh net den namatmat. Tō hēyhēywē, kē melep lokse me Isak, qeleaso kē mēh lok den namatmat.

20 Heylō nēdēmtig non Isak en, kē mavawē Jakop kōyō Esau tō so nahaphap mey nēwē tavan vēh me hiy kōyō.✝

21 Heylō nēdēmtig non Jakop, mahē a sisqet so kē nimat en, kē mitig taqlun̄ mi nēqētōwtōw nonon so niōl liwo Ḡod, tō kē nivawē yoge yantēntēn Jōsēp.✝

22 Heylō nēdēmtig non Jōsēp, mahē sisqet so kē nimat en, kē mavap so Ḡod telep yak ige Tisrael den Itsip.✝ Tō kē mēvēyvēyne so kēy tivig nihiy nonon n̄a lepnō non ige Tisrael.

23 Heylō nēdēmtig, mahē a Moses mowot me en, imam wa tita nonon mōlōn̄veg kē bōwōl vētēl.✝ Veg nēqēt mayanag Fero mavayēg so wuh nēnētm̄ey tam̄an del non ige Tisrael. Kōyō mōlōn̄veg kē veg kōyō met van so nēnētm̄ey nan itōktōk lēs. Tō kōyō et mētēgteg te so tigoy nele non nēqēt mayanag.

24 Namalmal non Fero matayak tō Moses, ba heylō nēdēmtig, mahē Moses milwo hag en, kē et buste so kēy ōl kē ēntēn namalmal nan.✝ 25 Veg kē et buste so nidam namtehal negengenyeg a namlaklak nan namaltē ēwē. Ba kē memyōs so niqultiwag mi ige non Ḡod so kē niyon̄memeh tiwag mi kēy. 26 Mahē ige Titsip mohole het van hiy kē veg Kraēs en, Mosis et dēmdēm te van aē. Mosis mēdēm so meygōh itōk veteg nam̄e haphap del non Itsip, veg Mosis dēmdēm ēwē beyseyse a Ḡod so lep van hiy kē.

27 Heylō nēdēmtig en, Moses mavan yak den Itsip. Mahē nēqēt mayanag mololgagay kē en, Moses et mētēgteg te ba mavan tasga qeleso kē met ēwē van hiy Ḡod mey a net et etgeh te.✝ 28 Heylō nēdēmtig non Moses, tatag van naln̄e vayēg non Ḡod en, Moses magaleg Negengen Yowlege wa metetetn̄eg naday van lemte ēm̄ nonoy.✝ Kē mak qelegōh tō so nin̄sel a Ḡod mēvētleg so wuh ige matgayaq non ige Titsip en, kē tit tan̄qal vēhte ige Tisrael.

29 Heylō nēdēmtig en, ige Tisrael mavan woy Nanaw Lawlaw qele vanvan wotanmas.✝ Ba mahē ige Titsip mehlet temuy en, kēy moyoy wa mamatmat qēt.

30 Heylō nēdēmtig en, ige Tisrael mavan walēg napnō Jeriko bōqōn̄ liviyō.✝ Tō me atgiy en, negeay vet walēg Jeriko matatamyuy qēt.

31 Heylō nēdēmtig non Rahab a nalqōvēn telemtehal en, kē et mat te tiwag mi ige helhel le Tejeriko.✝ Kē et mat te veg kē melep vasgēt galsi yoge et Tisrael mey a mavan bat tō so et wiwiyeg nalo vōnō.✝

32 ?Nok so vap se qeleave? No mal hole hoyo meh, tō no tit hole gatay se vēhte Gideon, Barak, Samson, Septa, Devēt wa Samuel tiwag mi ige lēgēlgēg. 33 Heylō nēdēmtig en, ige gōh mak woqse haphap. Kēy malalaket goy ige tavale bepgapgal. Kēy van tēy nele wa vēvēg tenenen. Kēy mētēy nahaphap a Ḡod mavatvat tō aē. Kēy mitigoy nalayon so tit kuy vēhte kēy. 34 Kēy mavan heylō nep ba kēy et metewot te. Kēy meplaplag qelen̄ den nan̄ye gasel bepgal. Ige sosol mavan me mamaymay. Kēy mavan me mamaymay bepgapgal. Kēy mōvōy ige vēwti halvan bepgapgal. 35 Ige lōqōvēn melep lok me yantēntēy den namatmat.

Mahē ige helhel nele makak tēqtēqyeg kēy en, kēy et buste so van taywah. Ba kēy memyōs so mat mi noyon̄ memeh, tō so tēy nēh lap aē. Veg nēh lap itōk veteg nēh telemyam agōh. 36 Yatkel et en, kēy moboyboyheg kēy wa tō melm̄elm̄eh kēy. Kēy mēlēg yatkel et mi nējēn wa mōm̄ōk kēy lēm̄ yētyēt. 37 Kēy miyim matmat kēy mi nevet. Kēy mosom̄ēt nataqn̄ey aē vōyō tō kēy mamatmat. Kēy tot mat kēy mi nagasel bepgal. Yatkelgi nem̄say, tateh noy leleh, tō kēy malmal ēwē mi nipni sipsip ba nipni nani. Kēy yon̄ memeh, wa ige a helhel nele mak nehet hiy kēy. 38 Kēy nam̄e et, tō namyam gōh et sey te so kēy so tog aē. Ba kēy motog soloteg lepnō vadalm̄eg wa luwutwut wa leqyo vet wa lelo lē.

39 Ige del gōh en, Ḡod met lolwē kēy bēdēmtig nonoy, ba kēy et tēy qal te nahap a Ḡod mavatvat van hiy kē. 40 Veg Ḡod mētēytēymat nahaphap mey nēwē yeh veg gēn, tō asaw den gēn en, kēy tit tēy qēt vēhte navawē. Namanig nan so Ḡod tuqultiwag gēn tiwag mi kēy, tō kē telep nayseyse hiy gēn del vag tiwag ēwē.