1 Dēm tow van nakaka veg Abraham kōyō Melkēsēdek.✝ Vag tiwag Abraham mepgapgal tiwag mi yatkel mayanag tegtegha. Tō Abraham malalaket goy kēy, tō melepyak qēt namlay den kēy. Mahē Abraham mōm̄ōl lok me den napgal nan en, kē metsas Melkēsēdek. Melkēsēdek gōh, kē namyanag liwo lelqelqevōnō Salem, wa kē nipris non Ḡod a neketket yeh. Tō Melkēsēdek mavawē Abraham. 2 Wa tō Abraham mohog natayt van hiy Melkēsēdek. Nahah a Melkēsēdek en, nēdēmdēm nan alon so "Mayanag mey a netnenen lengon Ḡod." Wa tō nahah vōyō negi en, so "Mayanag Tasalem," nēdēmdēm nan so, "Mayanag ne Tam̄at."

3 Melkēsēdek en, tateh et vitwag so niglal imam wa tita nonon, wa tateh et vitwag niglal so kē mowot tō an̄ēh, si so mamat tō an̄ēh. Nayapyap yon̄ gōh nihole gatay kē qeleso kē tahag lap letno Pris Liwo. Bastō kē qeleso Ēntēn Ḡod a totogtog lap vaga.

4 !Et tow van hiy Melkēsēdek en, ikē neketket a neketket yeh! Tamayge Abraham mohog van hiy kē namlan vivitwag den son̄son̄wul den nahaphap a kē melep mimiy ēwē tō.

5 Gēn mal ēglal nēvēnan ige Juw so hog van namlay vivitwag hiy ige pris. Ige sil Tujuw tiwag mi ige non Levi mey a kēy nipris en, kēy del ige ginwotwot non Abraham. Ba Mosis mal ōl gontegoy ige non Levi so lep namlay den ige yathēthēy. Ige pris gōh netegha den Melkēsēdek. 6 Veg Melkēsēdek et van tabay te me den Levi. Ba kē melep namlay vivitwag den son̄son̄wul gōh den Abraham. Tō kē mavawē Abraham a Ḡod mal vatvat vatag van hiy kē. 7 Tō gēn del nēglal so net liwo tavawē vēh net mey a antan den kē.

8 Togtōkē ige pris mey a kēy lep namlay vivitwag en, ikēy tamat vēh veg ikēy net. Ba Melkēsēdek en, Nayapyap Yon̄ nivasemlō so kē totog ēh lap.

9 Levi en, kē nileplep me namlan den ige sil. Ba mahē Abraham mohog namlan hiy Melkēsēdek en, mey gōh qeleso Levi mahgen mohog van namlan heylō Abraham. 10 Veg Levi niginwotwot non Abraham. Bastō Melkēsēdek neketket den Levi.

11 Namgumgu namun ige pris so ak tenenen ige sil lengon Ḡod. Ige pris a mavan tabay me den Levi am̄ag en, kēy so tak galsi tō en, togtō gēn tit mōyōs vēhte nipris tegha. Ba veg kēy et haytēyēh te, tō Ḡod metyak Nipris Liwo gayaq qeleso Melkēsēdek. Aron, ikē nipris totogyeg a mavan me den Levi. Mahē a letno liwo non Aron en, Ḡod melep van Nele hiy Mosis so qeleave namgumgu namun ige pris. 12 Tō mahē a nipris tegha nivan me en, tō nele nen teleh lokse.

13 Gēn hole tō gōh veg nipris gayaq en, kē et van tabay te me den Levi, tateh, kē mavan tabay me den ēthēn Levi, a Juda. Wa tateh ginwotwot non Juda a memgumgu tō lolta. 14 Welan, ikē niginwotwot non Juda, tō Mosis et hole sas te van nipris a so tavan me den Juda.

15 Wa tō, nim̄ōleg so nele teleh lokse, sowo nipris gayaq tavan me lemtehal non Melkēsēdek. Veg namtehal gōh netegha den namtehal non Aron. 16 Ige non Aron mavan me ige pris heylō nele a mavap so ige ginwotwot nonon vēlēs tavan me ige pris. Ba Welan mavan me nipris heylō lamaymay ne ēh nonon a tit bah vēhte. 17 Veg Nayapyap Yon̄ mavap aē so,

Inēk nipris a tit bah vēhte qeleso nēmētwun Melkēsēdek.✝

18 Nele tam̄ag nem̄geygey wa tateh wē nan geh, veg kē tit ak tenenen vēhte net so nitig van lengon Ḡod. Bastō Ḡod mōm̄ōk yak nele nan, 19 tō mawak namtehal tegha a so gēn tavan sisqet vēh hiy kē aē. Namtehal nan nitiy wē yeh, tō gēn m̄ōk nēdēmdēm nongēn nitig maymay van aē.

20 Ḡod metyak nipris gayaq mi navatvat vitwag. Ba ige pris tam̄ag en, kēy mavan me ige pris heylō namtehal ne Le, ba et namtehal ne vatvat te. Navatvat nitiy wē yeh den namtehal ne Le. 21 Veg Ḡod mavatvat wa mōl gontegoy so nim̄ōk Tigsas nipris liwo. Ḡod mavap so,

Welan Ḡod mōl gontegoy kē mahgen,

tō kē tit leh vēhte nēdēmdēm nonon, so

"Inēk nipris a tit bah vēhte."✝

22 Veg bege gōh en, Tigsas mavan me so niaktig nakavanan mey a nitiy wē yeh den nakavanan tam̄ag.

23 Tigsas kē nitiy pris liwo nongēn, tō tateh hap so nilep yak kē den namgumgu nan. Ba ige pris tam̄ag en, kēy ige et ēwē, tō namatmat ēwē telep yak kēy den natno liwo ne pris liwo. Veg mahē nipris liwo vitwag nimat en, net tegha teleh kē. Mak tō am̄ag ige m̄adeg mavan me nipris liwo. 24 Ba Tigsas tēh lap, tō kē nitiy pris liwo tasga qelenen, a tateh ōlsēn geh. 25 Veg bege gōh, ihēte a nivan sisqet Ḡod heylō Tigsas en, Tigsas tavaēh lap kē, veg Tigsas titig lap lengon Ḡod so nivēhge Ḡod so nimgaysēn kē. Tigsas temyin̄ lap kē vaga veg nēh non Tigsas tit bah vēhte.

26 Tigsas ikē nitiy pris liwo veg kē noyon̄, wa tateh gengenyeg geh mi kē. Kē newenwen a newenwen. !Kē nam̄e et tenenen so nimyin̄ gēn! Tō Ḡod melep ha kē den ige gengenyeg, tō melep kal kē hag lōtōk. 27 Tō Tigsas et qele te ige pris lililwo tam̄ag a kēy olol vag m̄adeg. Ige Pris nan melep van nolol velqōn̄ so tamgoy nubug. Am̄ag kē molol mi nōbōlōk veg nubug nagan, tō me atgiy kē molol mi nani veg nubug nagan ige sil.✝ Ba Tigsas en, kē melep kal nolol nonon vag tiwag woy ēwē. Tō nolol nan et sipsip te, ba kē mukēg nēh nonon mahgen so nitamgoy matm̄ēt nubug nagan ige sil. 28 Veg Nele non Mosis movonyak ige m̄egeygey wa ige gengenyeg so van me nipris liwo. Ba lēklan me atgiy en, navatvat non Ḡod so kē tetyak Ēntēn a netnenen a notogtog lap vaga, tō nivonyak kē so nivan me nam̄e pris liwo.