1 Veg bege gōh, itōk so gēn haldin̄qoy goy galsi nahap a gēn moyon̄teg veg gēn tiple vayak den.

2 Dēmsas noyoy a ige in̄sel mavap lō me en, noyoy nan Nele non Ḡod. Tō kimi nēglal so vel helhele, wa nubug del gōh en, Ḡod telep van nēvēvēg a netgolgol bubug nan. 3 ?Sowo noyoy non in̄sel nēdēw qelegōh, ba qeleave boyoy non Welan? ?So gēn wo moqoywon galgal goy noyoy ēwē gōh, tō gēn titigoy vēh gēn den nēvēvēg gōh qeleave? Loyoy ēwē gōh en, Welan mahgen mavasemlō nitiy metehal bavavaēh et. Tō ige a moyon̄teg noyoy nan den kē en, kēy mavaplō me so ikē hēywē. 4 Tō Ḡod mahgen mavasemlō se so noyoy nan hēywē mi naman heylō woqse vēglal, wa woqse vahah a bamamakē. Wa tō heylō newē Vu Yon̄ tegtegha, a kē melep van tatag namyōs nonon.

5 Tō Ḡod et vonyak te ige in̄sel so kēy van me liwo goy namyam gayaq mey a vanvan lapgetō me en, a gēn hohole gatay tō agōh. Tateh.

6 Ba nayapyap tege van Layapyap Yon̄ en mavap qelegēn,

?Ḡod, bahap tō net nitiy wē yeh van lengē?

?Bahap tō nēk netgoy galgalsi ninti et nan?

7 Nēk mōm̄ōk tēqēl kē tusu ēwē leln̄an ige in̄sel,

tō me heygoy kē mi nēlēn̄as wa mi nēdēmap.

8 Tō nēk mōm̄ōk kē so kē nimyanag goy vel haphap, tō kē tavayvay vēh apwoy.✝

Nohohole gōh mavap so Ḡod mōm̄ōk ige et so kēy mayanag goy "vel haphap," nēdēmdēm nan so "vel haphap del," tō tateh hap geh se a et leln̄an te. Ba togtōkē en, gēn et et hōn qete so ige et mayanag goy vel haphap del. 9 !Ba Tigsas en, kē namyanag goy vel haphap del! Ḡod mak kē mēvēhgi et, mak tō kē motog natkelgi leln̄an ige in̄sel. Kē mak qelenen tō so Tigsas tamat wēl nisil del. Tō Tigsas me leh kēy den namatmat. Igōhkē nasgōp non Ḡod, a bemgaysēn. Tō me atgiy Ḡod me heygoy kē mi nēlēn̄as wa mi nēdēmap.

10 Ḡod mitin̄ vel haphap del, tō vel haphap del telep nēlēn̄as lok van hiy kē. Tō kē nemyōs so nivēl m̄adeg me yantēntēn, so kēy van me qultiwag van lēlēn̄as talge nonon. Ba net a tavaēh ige del en, itōk so kē nivan me nam̄e et yeh. Tō Ḡod mōm̄ōk Tigsas so nivaēh kēy. Tō Ḡod mētēymat kē heylō lemtehal ne yon̄memeh. Nēdēmdēm nan so Tigsas nesey so nivaēh yantēntēn Ḡod veg kē moyon̄memeh.

11 Tigsas mak yon̄ yantēntēn Ḡod. Tō Tigsas tiwag mi kēy en, kēy del niginwotwot vitwag woy. Veg bege gōh en, Tigsas et mamayge te so niōl kēy so ikēy yathēthēn wa tētētan.

12 Tō kē mavap so,

Ḡod, no tavasemlō nahe van hiy ige yathithik,

tō no tese neh bōl liwo nēk lēvēwti tēlēm̄ yon̄ nōnōm.✝

13 Tō kē mavap lokse so, "No tēdēmtig kē."✝ Tō kē mavap lokse so, "Ino agōh, tiwag mi ige nētnētm̄ey a Ḡod melep me."✝

14,15 Ige nētnētm̄ey nan, kēy net ēwē, nataqn̄ēy wa naday nonoy aē. Tō ige et, kēy nemtēgteg namatmat. Veg bege gōh, Satan tēyēt vēh kēy, veg kē namaymay buwuhwuh mat et. Mak tō lēh del nonoy en, qeleso kēy notogtog lēm̄ yētyēt non Satan. Ba Tigsas mavan me so nilalaket goy Satan. Kē mēvēhgi et, mi nataqn̄ēn, tō kē mamat. Ba namatmat non Tigsas mak so namaymay non Satan en yeghuquy ēwē. Togtōkē, Tigsas mukēg taywah ige a memtēgteg tō, a kēy motog tō lēm̄ yētyēt non Satan.

16 Gēn nēglal galsi so Tigsas et van te me so nimyin̄ ige in̄sel, ba kē mēvēhgi et so nimyin̄ ige ginwotwot non Abraham.

17 Veg bege gōh, kē mavan me mahaytēyēh galsi qele yathēthēn wa yatētētan, tō so kē tavan vēh me nam̄e pris liwo. Tō kē nam̄e pris a namgaysēn aē mi kē, wa kē neskalgoy galsi namgumgu non Ḡod. Namgumgu nan so kē nitamgoy negengenyeg a kēy mak tō.

18 Tō kē temyin̄ vēh ige mey a nem̄eygal taqal kēy, veg kē mahgen moyon̄teg tō nememeh mahē a nem̄eygal maqal kē.