1 Atmi tog vēy tamtam kimi qeleso ige yathithimi wa ige yatētētami. 2 Kimi so tēymat vaga beleplep vasgēt ige halvan me lēm̄ nonmi. Veg me am̄ag yatkel et melep vasgēt tō ige in̄sel, a kēy et ēglal hōn te veg kēy. 3 Atmi dēmsas ige non Ḡod mey a ige sil ak tōqtōqyeg kēy, veg kimi tiple yon̄ memeh lataqn̄imi qele ikēy. Tō atmi dēmsas ige a kēy notog lēm̄ yētyēt, qeleso kimi notog tiwag mi kēy. 4 Atmi del dēmap namtehal ne legleg, tō etgoy galsi so kimi wenwen den legleg soloteg. Veg Ḡod tēvēvēg net mey a nilegleg soloteg siso nimtiy tiwag mi ēgnōn net tegha. 5 Nitog tamtam meh nēsēm lēh nonmi, ba tog malaklak mi natkel hap nonmi anen. Veg Ḡod mal vap vatag so,

No tit ukēg veteg vēhte nēk,

wa n̄ēh en, no tit dēmveteg vēhte nēk.✝

6 Nohohole nan mak tō gēn titig maymay vēh so vap so,

Welan Ḡod nemyin̄ tasga no,

tō no tit mētēgteg vēhte

nahap te a nisil takak hiy no en.✝

7 Atmi dēm m̄ōl lok hiy ige mey mal mat vatag, ige mey a mitig helem̄ag tō kimi, wa mavatne kimi bohohole non Ḡod. Dēm lōlhiy tow qeleave nēmētwuy, tō dam tatag kēy lemtehal ne dēmtig nonoy. 8 Tigsas Kraēs ikē haytēyēh qele anoy, qiyig, talōw, wa tō totog lap qeleanen.

9 Etgoy, veg ige vatvatgo tegtegha tiple ak so kimi kalen̄. Navatvatne nonoy netegha den noyoy ēwē. Nok hole gatay nele begengen non ige Juw, a nahap tē a kēy gengen siso et gengen te. Mahē kēy megen negengen nan en, tateh wē aē mi kēy. Ba nahap mey itōk so ak maymay kimi lelo taqami en, ikē nasgōp non Ḡod.

10 Nasgōp nan mavan heylō me nolol non Tigsas, a kē mamat so nitamgoy nubug. Ba ige pris lelo ēm̄ halgoy tēvēlgapye en, kēy et su sey hōn te so van tiwag me mi gēn lolta nongēn.

11 Tigsas meleh nolol bubug non ige pris tam̄ag. Am̄ag, vel ēte Nipris Liwo molol mi nisipsip bubug en, tō kē melep bat naday hay lelo Mahē Yon̄. Ba nataqn̄ēy sipsip en, kē nivan tēylō aslil den napnō, tō nep nigen qelen̄.✝ 12 Tō qelese anen Tigsas moyon̄ memeh aslil lemtegeay ne vōnō tō so niak yon̄ ige sil mi naday nonon.

13 Sōwlē, itōk so gēn kalō yak den napnō, tō van hiy Tigsas. Nitog dēmdēm van aē sowo ige sil wo mohole hethet hiy gēn qele a kēy mohole hethet tō hiy kē en. 14 Veg lemyam gōh en, tateh vōnō nongēn a totog lap. Ba gēn soksok nitiy vōnō mey a vanvan lapgetō me.

15 Sōwlē, itōk so vaga gēn lep van nitiy olol so vēwē Ḡod heylō Tigsas. Nolol nan so gēn ōlwē kē. Net mey a nivasemlō Tigsas mi naplan en, kē nōlwē Ḡod vaga. 16 Wa nitog lololqōn̄ so ak nahaphap mey nēwē hiy ige et, wa atmi vēyvēy biyin̄ kimi mi nahaphap nonmi, veg namgumgu qelenen en, ikē nolol mey a niak malaklak Ḡod.

17 Atmi dēmap ige lililwo goy kimi, wa yon̄teg galsi nohohole nonoy. Veg namgumgu namuy so etgoy kimi lemtehal bēdēmtig, tō Ḡod tēvēhge kēy aē. Yon̄teg kēy tō so kēy mugumgu mi namlaklak, ba et momoy yoyon̄ te. So kimi wo ak memeh kēy en, tō tateh wē aē mi kimi.

18 Yēhē, atmi tatay biyin̄ kemem. Veg kemem et yon̄teg te so nēdēmdēm nonmem nivēvēg kemem, ba kemem nemyōs so namtevumem nēwē vēlēs vaga. 19 Tō no nemyōs yeh so kimi vēhge van hiy Ḡod so kē nivētleg ēgē lok no me hiy kimi.

20 Nok tatay so Ḡod tavahiy maymay kimi. Ḡod betm̄at en, kē melep kal Welan nongēn Tigsas den namatmat. Tigsas en, ikē Net Liwo betet goy sipsip. Tō naday nonon molon̄ tō so niaktig nakavanan gayaq. Tō nakavanan nan taktig lap. 21 Tō kemem vēhge Ḡod so vahiy maymay kimi mi nahaphap ēwē del tō so kimi tak vēh nahap a kē nemyōs. Tō kemem tatay so kē tak nahap a kē temlaklak aē lēh nongēn. Kemem tatay so Ḡod tak vēh qelegōh heylō Tigsas Kraēs. !Lep nēlēn̄as van hiy Tigsas vaga! Qeleanen.

22 Yēhē yathithik wa yatētētek. No mayap me neletes malte gōh so hole biyin̄ kimi. No nemyōs so kimi yon̄teg galgalsi nahap a no mayap vasem me hiy kimi aē.

23 Togtōkē ēthēn gēn a Timoti, kē mal kalō den nēm̄ yētyēt. Ba kē wo mavan ēgē me gōh en, tō kamyō qoyo van me vatēp kimi.

24 No nemyōs so kimi vasemlō lemtap nēwē mino van hiy ige lililwo nonmi tiwag mi ige et del non Kraēs. Wa ige et n̄a Itali, kēy se vap lemtap nēwē van hiy kimi.

25 Nasgōp non Ḡod nitog mi kimi del.