1 Sōwlē, igōhkē namanig ne hohole nonmem, Kraēs nam̄e pris liwo nongēn. Tō hag lōtōk alge en, kē nahag letno liwo a lemtō non Ḡod a Nitiy Man. 2 Kē nimgumgu lelo ēm̄ tēvēlgapye alge. Ḡod mahgen mētēymat nahaphap lelo ēm̄ tēvēlgapye nan. Net et tēymat te tō.

3 Namgumgu namun ige pris del en so hog van nalen̄a tiwag mi nolol. Veg bege gōh, nam̄e pris gōh so nilep temun hap se van hiy Ḡod.

4 So Kraēs wo totog lapgetō me lemyam gōh en, togtō kē tit van vēhte me nipris veg woqse pris tog vatag tō en. Kēy lep van nolol hiy Ḡod tatag van nele vayēg non Mosis. 5 Kēy mugumgu lelo ēm̄ tēvēlgapye mey a kēy mak tatag ēwē qeleso nēm̄ tēvēlgapye talge. Nēm̄ tēvēlgapye lemyam gōh en, ikē nototgal wa nēnēnēn ēwē. Nitiy ēm̄ tēvēlgapye non Ḡod n̄a lōtōk. Igōhkē nēhēyhēywē, veg mahē Mosis nitēytēymat so nigilgeg nēm̄ tēvēlgapye nan en, Ḡod mavap so, "Nēk tēymat galsi vel haphap del gōh qele a no mal vasemlō vatag van hiy nēk hag luwutwut alge en."✝

6 Ba togtōkē namgumgu non Kraēs nitiy wē yeh den namgumgu namun ige pris tam̄ag, qeleaso nakavanan nonon Tigsas nitiy wē yeh den nakavanan tam̄ag. Veg nahaphap a Ḡod mavatvat heylō Tigsas en, kēy itōk veteg navatvat tam̄ag.

7 Nakavanan tam̄ag mavan heylō me Mosis. So nakavanan nan tēwē tō en, togtō tateh kavanan tegha se. 8 Ba Ḡod mitil bōwōn ige sil veg kēy et tatag te nele ne kavanan nan. Tō Ḡod mavap so,

Welan Ḡod vap so, "!Yēhē! Mahē vanvan tege tō en

a no qoyo lep nakavanan gayaq van hiy ige ginwotwot Tisrael

wa hiy ige ginwotwot Tujuda.*

9 Ba et qele te nakavanan a no melep tō van hiy ige tamatmayge nonoy.

Lamahē nen no mētēy namney, tō melep lō kēy den Itsip,

ba kēy et dēmap te nakavanan nan,

tō veg bege gōh en,

ino Welan, tō no mavap so no tit dēmsas se vēhte kēy.

10 Bastō nakavanan gayaq a no telep van hiy ige ginwotwot Tisrael en, qelegēn.

No tōm̄ōk nele mino lēdēmdēm nonoy,

tō no tayap van lelo taqay.

Tō no tavan me Ḡod nonoy,

wa tō kēy tavan me ige mino.

11 Tō tateh et se tavatne ēthēn si so ige telepnō nonon a so,

‘Ey, nēk van me ēglal Ḡod.’ Tateh.

Veg ige del qēt tēglal no,

teqtēg mi ige woywoy, dēn̄ ige a neketket yeh.

12 Veg no temgaysēn kēy wa tēdēmveteg nēmgōy,

wa negengenyeg nonoy, no tit dēmsas lok vēhte."✝

13 Mahē a Ḡod mohohole gatay nakavanan gayaq gōh en, nēdēmdēm nan so nakavanan tam̄ag mal leh. Tō nahaphap tēnēte mey mal leh en, sisqet niqleqlen̄.